စစ်ကောင်စီ ဦးဆောင် ပြုလုပ်သည့် ငြိမ်းချမ်းရေးဆွေးနွေးပွဲသည် ငြိမ်းချမ်းရေးကို အမှန်တကယ် လိုလားမှု မရှိကြောင်း Myanmar Peace Monitor မှ ပြုလုပ်သည့် သုတေသီ စာတမ်းမှာ ဖော်ပြထားသည်။
စစ်အစိုးရ ခေတ်အဆက်ဆက်သည် ငြိမ်းချမ်းရေး ဆွေးနွေးမှု ခေါ်ယူသည့်အချိန်တိုင်း မြေပြင်ရှိ တိုင်းရင်းသား လက်နက်ကိုင် တပ်ဖွဲ့များနှင့် ထိတွေ့တိုက်ပွဲ အစဥ်ဖြစ်ပွားနေကြောင်းလည်း ဒီဇင်ဘာ (၃၀) ရက်နေ့က ပြုလုပ်သည့် နိုင်ငံတကာ မြန်မာသတင်းအဖွဲ့ (BNI) မြန်မာ့ငြိမ်းချမ်းရေး စောင့်ကြည့်လေ့လာရေး အဖွဲ့မှ “စစ်အာဏာရှင် အဓွန့်ရှည်ရေး အတွက် အသုံးချခံ ငြိမ်းချမ်းရေး” သုတေသီ စာတမ်းမှာ ဖော်ပြထားသည်။
“၂၀၁၂ နဲ့ ၂၀၁၅ ခုနှစ် နှစ်ခုရဲ့ စစ်ကောင်စီနဲ့ တိုင်းရင်းသား လက်နက်ကိုင် တပ်ဖွဲ့တွေရဲ့ တိုက်ပွဲဖြစ်ပွားတဲ့ ရက်နဲ့ ငြိမ်းချမ်းရေး တွေ့ဆုံဆွေးနွေးမှု ကိန်းဂဏန်းတွေက အရမ်းကိုကွာတယ်၊ အဲ့ကတည်းက ပြည်တွင်းစစ် အရှိန် မြင့်တက်ခဲ့တယ်၊ အဲ့နောက် ၂၀၁၉ မှာလည်း စစ်အုပ်စုနဲ့ NLD အစိုးရ အားပြိုင်မှုကြောင့် စစ်ပွဲတွေ ထပ်ပြင်းထန်ခဲ့တယ်၊ ပြီးတော့ အခု နွေဦးတော်လှန်ရေးကနေ ဒီအခုချိန်အထိ စစ်တပ်ဘက်က ငြိမ်းချမ်းရေး စနစ်လို့သာ ပြောတာ၊ သူတို့ကို တော်လှန် ခုခံနေတဲ့ အဖွဲ့အစည်းတွေနဲ့ ပတ်သက်လို့ သူ့မှာငြိမ်းချမ်းလိုတဲ့ စိတ်ဆန္ဒတွေ မပြဘူး” ဟု Myanmar Peace Monitor မှ အကြီးတန်း သုတေသီ တစ်ဦး ကပြောသည်။
စစ်ကောင်စီသည် ဖက်ဒရယ်ပြည်ထောင်စု တည်ဆောက်ရေးအတွက် တိုင်းရင်းသား လက်နက်ကိုင် တော်လှန်ရေး အဖွဲ့ (ERO) များ၏ လှုပ်ရှားမှုများကို အကြမ်းဖက် လှုပ်ရှားမှု အဖြစ် ပုံဖော်နေခြင်းဖြစ်ပြီး နှစ်ဖက် အပစ်အခတ်ရပ်စဲရေးထက် ပိုလုပ်ဆောင်နိုင်ခြင်း မရှိသည့် တွေ့ဆုံဆွေးနွေးမှု များသည် နိုင်ငံရေးဆွေးနွေးပွဲ၊ ငြိမ်းချမ်းရေး ဆွေးနွေးပွဲဟုပင် နာမည်မတပ်နိုင်ကြောင်း Myanmar Peace Monitor မှ အကြီးတန်း သုတေသီ တစ်ဦး ကပြောသည်။
“ကျနော်တို့ BNI – Myanmar Peace Monitor အဖွဲ့ကနေ အခု စာတမ်းအတွက် စစ်တပ် ဦးဆောင်တဲ့ ငြိမ်းချမ်းရေး ဆွေးနွေးပွဲတွေက မြန်မာပြည် ငြိမ်းချမ်းရေးကို အမှန်တကယ် ရရှိနိုင်မလားဆိုပြီး မေးလိုက်တော့ မရှိနိုင်ဆိုပြီး ဖြေဆိုသူ (၈) ဦးရှိခဲ့တယ်၊ ရနိုင်တယ်ဆိုပြီး ဖြေပေးတဲ့သူက တစ်ဦးမှ မရှိဘူး၊ သူတို့ ငြိမ်းချမ်းရေး ဆွေးနွေးမှုက အပစ်အခတ်ရပ်မယ်၊ စီးပွားရေး လုပ်ကိုင်ခွင့် ပေးမယ် ဒီလောက်နဲ့ ပိုမလာနိုင်တော့ နိုင်ငံရေးဆွေးနွေးပွဲ၊ ငြိမ်းချမ်း ရေးဆွေးနွေးပွဲလို့တောင် နာမည်မတပ်နိုင်ဘူးလို့ ပြောဆိုသုံးသပ်တာလည်းရှိတယ်” ဟု အထက်ပါ ပုဂ္ဂိုလ်က ပြောဆိုရှင်းလင်းခဲ့သည်။
၂၀၁၃ ခုနှစ်မှ စတင်ကာ လေ့လာစောင့်ကြည့်ခဲ့သော BNI – Myanmar Peace Monitor ၏ မှတ်တမ်းအရ ၂၀၂၁ စစ်အာဏာမသိမ်းခင် အချိန်အထိ စစ်ကောင်စီ နှင့် တိုင်းရင်းသား လက်နက်ကိုင် တပ်ဖွဲ့တို့၏ ထိတွေ့တိုက်ပွဲဖြစ်ပွားသည့် ရက်နှင့် ငြိမ်းချမ်းရေး တွေ့ဆုံဆွေးနွေးမှု နေ့ရက်ကြား ဆက်စပ်မှု အခြေအနေများသည် ဆွေးနွေးမှု တစ်ရက်ဖြစ်တိုင်း ထိတွေ့တိုက်ပွဲ နှစ်ရက်တိုးလာကြောင်း “စစ်အာဏာရှင် အဓွန့်ရှည်ရေး အတွက် အသုံးချခံ ငြိမ်းချမ်းရေး” စာတမ်းအရ သိရှိရသည်။
ငြိမ်းချမ်းရေးခေါင်းစဥ်ဖြင့် စစ်ကောင်စီမှ တိုင်းရင်းသား လက်နက်ကိုင် တပ်ဖွဲ့များ(EAO/ERO) ထံ ချည်းကပ်ပုံ သည် (EAO/ERO) အား တစ်ဖွဲ့ချင်းဖြစ်စေ၊ စုဖွဲ့ထားသည့် တပ်ပေါင်းစု ဖြစ်စေ ညီညွှတ်မှု ပျက်ပြားစေရန် ခွဲခြား ဆက်ဆံခြင်း၊ သပ်လျှိုသွေးခွဲနည်းလမ်းများကို အသုံးပြုပြီး ချည်းကပ်လေ့ရှိသည်ဟု စာတမ်းတွင် ထုတ်ပြန်ပြောဆိုထားသည်။
