သျှမ်းပြည်တောင်ပိုင်း ဆီဆိုင်မြို့နယ် ဘန်းယဉ်ကျေးရွာအုပ်စု စစ်ကောင်စီ တပ်ရင်း ၄၂၅ မှ တပ်သား အချင်းချင်း ပစ်ခတ်မှု ဖြစ်ပွားခဲ့ကြောင်း စုံစမ်း သိရှိရသည်။
ပြီးခဲ့သည့် ဒီဇင်ဘာလ ၂၄ ရက် နံနက် ၉ နာရီ ဝန်းကျင်တွင် ဆီဆိုင်မြို့နယ် ဘန်းယဉ်ကျေးရွာအုပ်စု မင်္ဂလာဦးရပ်ကွက်ထဲမှာ တပ်ရင်း ၄၂၅ မှ တပ်သားများနှင့် အမည်မသိ တပ်ပြေးတစ်ဦး ပစ်ခတ်မှုဖြစ်ကာ တပ်ပြေးတစ်ဦး သေနတ်ပစ်ခံရပြီး ခြေထောက် ထိခိုက်ဒဏ်ရာ ရရှိခဲ့ကြောင်း ဘန်းယဉ်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ သူက မူးယစ်ဆေးဝါး ကြောင်တာလားတော့ မသိဘူး။ သောကြာနေ့ ညတုန်းက တပ်ထဲမှာ သူများကို ဓားနဲ့လိုက်ခုတ်ပြီး ထွက်ပြေးခဲ့တာ။ အဲ့ညတညလုံး တပ်ရင်း ၄၂၅ က သူ့ကို လိုက်ရှာတာမတွေ့ဘူး။ နောက်နေ့ မနက်ရောက်တော့ သူမင်္ဂလာဦး ရပ်ကွက်ထဲမှာ ရှိတယ်ကြားပြီး တပ်ရင်း ၄၂၅ က လာဖမ်းတာ။ သူကပြန်ပြီး ရန်ပြုတော့ ဟိုဘက်က သေနတ်နဲ့ ပစ်ခတ်လိုက်တယ် “ ဟု ၎င်းအမျိုးသမီးတစ်ဦးက ပြောသည်။
အဆိုပါ သေနတ်ပစ်ခတ်မှု ဖြစ်ပွားပြီးနောက် တပ်ပြေးတစ်ဦး ခြေထောက် ထိခိုက်ဒဏ်ရာရရှိပြီး တပ်ရင်း ၄၂၅ မှ ဖမ်းဆီးခေါ်ဆောင်သွားပြီး ချုပ်နှောင်ထားကြောင်း သိရသည်။
တပ်သားအချင်းချင်း ပစ်ခတ်မှုနှင့် ပတ်သက်ပြီး ပစ်ခတ်ခံရသူမှာ မည်သူမည်ဝါ နှင့် ရာထူးကို သျှမ်းသံတော်ဆင့်ဌာန စုံစမ်းထားချက်အရ မသိရှိရသေးပေ။
ထို့အပြင် သြဂုတ် ၁၁ ရက်တွင်လည်း ဘန်းယဉ်နယ်မြေ ရဲစခန်းမှ ရဲတပ်သား ပြည့်ဖြိုးကျော် ဆိုသူမှာလည်း ရဲပြေးတစ်ဦးအဖြစ် ထွက်ပြေးလွှတ်မြောက်နေကြောင်း သိရသည်။
