သျှမ်းပြည်မြောက်ပိုင်း မူဆယ်မြို့သို့ အလုပ်လုပ်ကိုင်နေသည့် အမျိုးသား ၂ ဦးသည် အလုပ်မှ အပြန် စွမ်ဆော်ရပ်ကွက်တွင်းမှာ ဆိုင်ကယ် လုခံရပြီး ဓားခုတ်ခံရကြောင်း စုံစမ်းသိရသည်။

ယမန်နေ့ ဒီဇင်ဘာလ ၁၆ ရက် ညနေ ၄ နာရီ ဝန်းကျင်အချိန်တွင် စွမ်ဆော်ရပ်ကွက် အတွင်း လူပြတ်လမ်းကြားထဲမှာ ဆိုင်ကယ်ဖြင့် စီးလာသော အမျိုးသား နှစ်ဦးသည် ဓားခုတ်ခံရပြီး ဆိုင်ကယ်၊ ဖုန်း နှင့် ငွေများ လုယက်ခံလိုက်ရကြောင်း ၎င်းကို သွားရောက်ကူညီခဲ့သည့် မေတ္တာပန်းခင်း ပရဟိတ အသင်းမှ တာဝန်ခံတစ်ဦးက ပြောသည်။

“ အလုပ်ကနေ ပြန်လာပြီးတော့ စွမ်ဆော်ရပ်ကွက်ထဲမှာ ဓားခုတ်ခံရတာဗျ။ တစ်ယောက်ကတော့ ပေါင် မှာ ခုတ်ခံရတယ်။ နောက်တစ်ယောက်ကတော့ ဗိုက် ထိုးခံထားရလို့ မူဆယ် ဆေးရုံကြီးကို ပို့ထားရတယ်ဗျ။ သူတို့ စီးလာတဲ့ ဆိုင်ကယ်ရယ်၊ ဖုန်း၊ ပိုက်ဆံတွေ အကုန်ပါသွားတယ် “ ဟု ၎င်းတာဝန်ခံ တစ်ဦးက ပြောသည်။

အဆိုပါ ဓားခုတ်ခံရသူသည် အသက် ၃၀ ကျော် နှင့် အသက် ၄၀ ကျော် အမျိုးသား ၂ ဦး ဖြစ်ပြီး မူဆယ်မြို့မှာ ရွှေ့ပြောင်း အလုပ်လုပ်ကိုင်နေသည့် ဒေသခံများ ဖြစ်ကြောင်း သိရသည်။

ထို့အပြင် လောင်းကစားဝိုင်း ပေါများသည့် ရပ်ကွက် နှင့် လူများသွားလာနည်းပြီး လူပြတ်သည့် နေရာများမှာ မိမိအနေဖြင့် အသွားအလာပြုရန် သတိထားစေလိုကြောင်း ၎င်းက ဆက်ပြောသည်။

“ လူသွားလာပြတ်လပ်တဲ့နေရာ၊ လောင်းကစားပေါတဲ့ နေရာဆိုရင် အသွားအလာ သတိထားရမယ်။ စွမ်ဆော်ရပ်ကွက်ဆိုတာ လောင်းကစားဝိုင်းပေါတယ်၊ ဒုစရိုက်လည်း များတယ် “ ဟု ၎င်းက ထပ်လောင်းပြောသည်။

စစ်အာဏာသိမ်းပြီး နောက်ပိုင်း မူဆယ်မြို့တွင် နေအိမ်ဖောက်သွင်းမှု၊ ဓားပြတိုက်မှုများ မကြာခဏ ဖြစ်ပေါ်နေပြီး ဒေသခံ ပြည်သူများ စိတ်လုံခြုံမှု မရှိ ဖြစ်နေသော်လည်း ပြစ်မှု ကျူးလွန်သူများကို သက်ဆိုင်ရာရဲတပ်ဖွဲ့မှ ဖမ်းဆီးဆောင်ရွက် အရေးယူပေးခြင်း မရှိကြောင်း သိရသည်။