သျှမ်းပြည်အရှေ့ပိုင်း တာချီလိတ်မြို့တွင် သူခိုးများပြားလာပြီး အဆောင်ထဲထိ ဓားပြတိုက်မှုရှိလာကြောင်း စုံစမ်းသိရှိရသည်။
ပြီးခဲ့သည့် ဒီဇင်ဘာ ၁၄ ရက် ည ၈ နာရီ ဝန်းကျင်တွင် မဲခေါင်ရပ်ကွက်တွင်း အဆောင်တစ်ခုထဲ အမဲရောင်ဝတ်စုံဖြင့် လူ ၃ ယောက်က လက်နက်ကိုင်ဆောင်လာပြီး အဆောင်တွင်း နေထိုင်သည့် အမျိုသားတစ်ဦးကို ဓားပြတိုက်ခဲ့ကြောင်း သိရသည်။
“ ကျနော် အလုပ်ကနေ ပြန်လာတာ။ ကျနော် ပြန်လာတဲ့ လမ်းမှာလည်း ကားနဲ့ နောက်ကနေလိုက်လာနေတယ်။ အဆောင်ရောက်တော့ တစ်ယောက်က လိုက်ဝင်လာပြီးတော့ လာတိုက်ခိုက်တာ။ ပြီးတော့ အနောက်ကနေ သေနတ်ကိုင်ပြီး ၂ ယောက်က လိုက်ဝင်လာတာ” ဟု ကိုယ်တိုင် ကြုံတွေ့ခံရသူ တစ်ဦးက ပြောသည်။
ထိုသို့ ဓားပြတိုက်မှုကြောင့် ဖုန်း နှင့် ရွှေဆွဲကြိုး များ ပါသွားကြောင်း သိရသည်။
ထိုအပြင် တာချီလိတ်မြို့တွင် ပြန်ပေးဆွဲမှုဖြင့် ဓားပြတိုက်ယူနေကြောင်း သိရသည်။
“ သူတို့က ပြန်ပေးဆွဲချင်တာ။ ကျနော် နားလာတုန်းကလည်း ကျနော်သူငယ်ချင်းကို ဖမ်းထားတယ်။ ပိုက်ဆံပေးပြီး လာထုတ်လို့ပြောတယ်။ ပြီးတော့ ကျနော်ကို ဖမ်းခေါ်သွားချင်တာ။ အဆောင်ကလူလည်း အော်လို့ သူက ပြန်ထွက်ပြေးသွားတာ” ဟု အထက်ပါသူက ပြောသည်။
တာချီလိတ်မြို့တွင် နယ်မှလာပြီး အလုပ်လုပ်ကိုင်သူများကလည်း များပြားလျှက်ရှိပြီး တချို့က ဆွေမျိုးမရှိသောကြောင့် အဆောင်တွင်း ငှားနေကြသည်။
“ တာချီလိတ်မှာ အလုပ်လာလုပ်တဲ့သူတွေလည်း အများကြီးရှိတယ်လေ။ ပြီးတော့ ထိုင်းနိုင်ငံက ဝရမ်းပြေးတွေလည်း အများကြီးရှိတယ်။ သူတို့တွေက အဆောင်မှာ လာငှားနေကြတယ်။ သူတို့တွေက ဆွေမျိုးတွေမရှိဘူးလေ။ အဲ့ကြောင့် ဓားပြတွေကလည်း အဆောင်မှာ နေတဲ့သူတွေကို ပိုပြီး ဓားပြတိုက်တာရှိတယ်။ ဟိုနေ့က ဖြစ်သွားတဲ့ ကလေးဆိုလည်း ကျိုင်းတုံမှာနေတာတဲ့” ဟု တာချီလိတ်မြို့ ဒေသခံက ပြောသည်။
တာချီလိတ်မြို့သည် စစ်တပ်က အာဏာသိမ်းပြီးနောက်ပိုင်း လုံခြုံမှုမရှိသည့်အပြင် ရဲများကလည်း သူခိုးများကို ဖမ်းဆီးမှုလည်း မရှိကြောင်း ဒေသခံများ ပြောပြချက်အရ သိရသည်။
“ ဆိုင်ကယ် ခိုးခံရတာလည်း အများကြီး ရှိတယ်။ ရဲတွေကလည်း မဖမ်းဘူး။ အမှုတွေလည်း မလိုက်ဘူး။ သူခိုးတွေကလည်း မလိုက်ဖမ်းဘူး။ သွားတိုင်ရင်လည်း သေချာလိုက်ပေးတာမရှိဘူး” ဟု ဒေသခံ တစ်ဦးက ပြောသည်။
တာချီလိတ်မြို့တွင် အာဏာသိမ်းပြီး နောက်ပိုင်း အွန်လိုင်းဂိမ်း ၊ KTV, Club များ ပေါများလာပြီး နယ်မှ အလုပ်လာလုပ်သူများလည်း များပြားလာပြီး သူခိုး၊ ဓားပြများလည်း နေ့စဉ် ခိုးယူနေလျက်ရှိကြောင်း သိရသည်။
Leave a Comments