ကမ္ဘာ့ကုလသမဂ္ဂ UN ထောက်ပံ့သည့် WFP တံဆိပ်ပါသည့် ဆန် သည် အရည်အသွေးကြောင့် ကရင်နီ စစ်ရှောင်များ စားသုံးရန် ခက်ခဲသဖြင့် ပြန်လည်ရောင်းပြီး ဒေသထွက် ဆန်များကို ဝယ်ယူ စားသုံးရကြောင်း သိရသည်။

ကရင်နီ (ကယားပြည်) စစ်ဘေး ဒုက္ခသည်များအတွက် ပြီးခဲ့သည့် ဇူလိုင်လပိုင်း က WFP တံဆိပ်ပါ ဆန်အိတ် ၅၀ ကီလိုဂရမ်အိတ်ကို စစ်ဘေးရှောင် တစ်ဦးလျှင် ဆန် ၆ ပြည် နှင့် စားနပ်ရိက္ခာ ကူညီထောက်ပံ့ပေးခဲ့ကြောင်း သိရသည်။

စတုတ္တကြိမ်မြောက် ကမ္ဘာ့ကုလသမဂ္ဂ UN က ထောက်ပံ့ပေးတဲ့ WFP တံဆိပ်ပါ ဆန်အမျိုးအစားမှာ အရည်အသွေးကြောင့် စားသုံးရန် ခက်ခဲသဖြင့် ပြန်လည်ရောင်းချပြီး ဒေသထွက်ဆန်များကို ဝယ်ယူ စားသုံးရကြောင်း လွိုင်ကော်မြို့ စစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ စားနေကြ ဆန် ရွှေရင်အေး၊ ရွှေအပ်ဆန်တို့ က အဆင်ပြေတယ်ဗျာ။ WFP တံဆိပ် ဆန်က အရမ်းမာတယ်၊ စားလို့အဆင်မပြေဘူး။ သူတို့ သိုလှောင်ထားတဲ့ နေရာက အဆင်မပြေသလား၊ ဆန်က တခါတလေ တိုးတာတွေ ရှိတယ်။ တချို့က သျှမ်းဆန် နဲ့ ရောပြီး စားရတယ်။ အချို့က မစားနိုင်တော့ ဒီ UN ကပေးတဲ့ ဆန်ကို ရောင်းပြီး သျှမ်းဆန်တွေကို ပြန်ဝယ်စားရတယ် “ ဟု ၎င်းအမျိုးသားတစ်ဦးက ပြောသည်။

စစ်အာဏာသိမ်းပြီးနောက်ပိုင်း ကရင်နီ (ကယားပြည်) တွင် တိုက်ပွဲကြောင့် လွိုင်ကော်မြို့ပေါ်ရှိ စစ်ဘေးဒုက္ခသည် များအတွက် WFP တံဆိပ်ပါ ဆန်အမျိုးအစားကို လက်ရှိမှာ လေးကြိမ်မြောက် ကူညီထောက်ပံ့ပေးနေကြောင်း သိရသည်။

သျှမ်းပြည်တောင်ပိုင်း ဆီဆိုင်မြို့နယ် ကရင်နီ (ကယားပြည်) စစ်ဘေး ဒုက္ခသည်များကို ကူညီနေသူ အမျိုးသားတစ်ဦးက ကမ္ဘာ့ကုလသမဂ္ဂ UN က ထောက်ပံ့ပေးသည့် စားနပ်ရိက္ခာတွေမှာ မြို့ပေါ်ရှိ စစ်ဘေးရှောင်စခန်းသာ ရောက်ပြီး ကျေးလက်ဒေသရှိ စခန်းငယ်တွေမှာတော့ တစ်ကြိမ်မှ မရောက်ရှိလာကြောင်း ဆိုသည်။

“ စဖြစ်တဲ့ အချိန်တုန်းကတော့ ICRC တစ်ခါလောက်တော့ ဝင်သွားတယ်။ စစ်ဘေးရှောင်စခန်း အကြီးတွေမှာပဲ ဝင်သွားတယ်။ ဒုတိယပိုင်းမှာလည်း ICRC တွေက စားနပ်ရိက္ခာအနည်းအကျဉ်း နဲ့ သုံးဖို့ငွေ တစ်ခေါက် ထောက်ပံ့တာတွေရှိတယ်၊ ဒါပေမယ့် ကျနော်တို့ဆီ ရောက်မလာဘူး စာရင်း ရထားတဲ့ ကျေးလက်ဒေသက စခန်းငယ်တွေမှာ UN ကထောက်ပံ့ပေးတယ်ဆိုပြီး ဒီနေ့ ဒီချိန် တခါမှ ရောက်မလာဖူးသေးဘူး “ ဟု ၎င်းအမျိုးသားတစ်ဦးက ပြောသည်။

ယင်းကဲ့သို့ ပေးဝေလှူဒါန်းထားသည့် ဆန်အိတ်များက ဈေးကွက်သို့ ရောက်ရှိသွားပြီး ရောင်းဝယ်မှုများ ဖြစ်နေခြင်းနှင့် ပတ်သက်ပြီး WFP ကို ဆက်သွယ်မေးမြန်းရာ WFP ၏ ပံ့ပိုးကူညီပေးမှုများ ပိုမိုထိရောက်မှုရှိစေရန်အတွက် ဆက်လက်လုပ်ဆောင်သွားမည်ဟု သျှမ်းသံတော်ဆင့်ကို ပြောသည်။

“WFP က လှူဒါန်းထားတဲ့ စားနပ်ရိက္ခာအချို့ အကျိုးခံစားခွင့်ရှိသူ မိသားစုဝင်တွေက သူတို့ရရှိထားတဲ့ ဆန်ရိက္ခာ အနည်းအကျဉ်းကို တခြားအိမ်သုံးပစ္စည်းတွေ၊ အစားအစာတွေနဲ့ လဲလှယ်ရောင်းချတတ်ကြပါတယ်၊ မြေပြင် မှာ ရောက်နေတဲ့ WFP ဝန်ထမ်းတွေလည်း ကူညီမှုတွေ ပိုမိုထိရောက်စေဖို့အတွက် စဥ်ဆက်မပြတ် ပြုလုပ်လျက် ရှိပါတယ်” ဟု မြန်မာနိုင်ငံဆိုင်ရာ ဌာနေကိုယ်စားလှယ် Mr. Stephen Anderson က ပြောကြားသည်။

ကမ္ဘာ့ကုလသမဂ္ဂ UN က ထောက်ပံ့သည့် စားနပ်ရိက္ခာ အစီစဉ် WFP တံဆိပ်ပါ ဆန်အမျိုးအစား အိတ် ၅၀ ကီလိုဂရမ်အိတ် တစ်အိတ်ကို လက်ရှိမှာ ကျပ်ငွေ (၅၂,၀၀၀) ကျပ်အထိ ကာလ ပေါက်ဈေး ရှိနေကြောင်း သိရသည်။