ကချင်ပြည်နယ် ဖားကန့်မြို့နယ်အတွင်း တိုက်ပွဲကြောင့် ဖားကန့် – လုံးခင်း ကားလမ်းမပေါ်ရှိ ပန်းတင်တံတားပေါ်တွင် လိုင်စင်မဲ့ကားများကို စစ်ကောင်စီက စတင်ဖမ်းဆီးနေကြောင်း သိရသည်။
ပြီးခဲ့သည့် နိုဝင်ဘာလအတွင်းမှ လိုင်စင်မဲ့ ကားများကို ဖမ်းဆီးမည်ဟု သတင်းထွက်ထားပြီးနောက်ပိုင်း ယမန်နေ့ ဒီဇင်ဘာ ၇ ရက် ညနေ ၄ နာရီဝန်းကျင်က လိုင်စင်မဲ့ကား အစီး ၃၀ ကျော်ကို စစ်ကောင်စီ စတင်ဖမ်းဆီးနေကြောင်း လုံးခင်းမြို့ဒေသခံ အသက် ၃၀ နှစ်အရွယ် အမျိုးသားတစ်ဦးက ပြောသည်။
“ သူတို့ ဖမ်းတဲ့နေရာက ဖားကန့်အထွက် ပန်းတင်တံတားပေါ်မှာဗျ။ ကျနော်သူငယ်ချင်း အဲ့ကနေ ဖြတ်သွားတာ ကားကိုဖမ်းထားတယ်။ လိုင်စင်မဲ့ ကားမျိုးစုံပဲ အစီး ၃၀ ကျော် ၅၀ ဝန်းကျင်လောက် ဖမ်းထားတာရှိတယ်။ စစ်ကောင်စီက သူတို့ ဘတ်ဂျက်အတွက် ဖမ်းနေတာပါ “ ဟု ၎င်း အမျိုးသားတစ်ဦးက ပြောသည်။
ထို့အပြင် ဒီဇင်ဘာ ၅ ရက်မှာ လုံးခင်းကျေးရွာအုပ်စု မှော်ပုံကျေးရွာထဲကို စစ်ကောင်စီက စစ်ကြောင်းထိုးစစ်ဆင်ပြီး ဒေသခံ ၈၀ ဝန်းကျင်ကိုလည်း ဖမ်းဆီးခေါ်ဆောင်သွားကြောင်း သိရသည်။
“ မနေ့တစ်နေ့က စစ်ကောင်စီ ရွာထဲကိုစစ်ကြောင်းထိုးပြီး ဒေသခံ ၈၀ ယောက်လောက်ကို ဘော်ဒါဆွဲခေါ်သွားတယ်။ ဒီနေ့ မနက်မှ အကုန်ပြန်လွှတ်လာတယ်လို့ ပြောတယ်။ ညညဆိုလည်း စစ်ကောင်စီ ဘက်က လက်နက်ကြီးတွေနဲ့ ထုတယ်။ အခုချိန်က ဘာပြောပြရမှန်းတောင် မသိတော့ဘူး ဒီကလူတွေ အကုန်လုံး ခက်နေတယ် “ ဟု ၎င်းကဆက်ပြောသည်။
ဖားကန့်မြို့နယ်ထဲတွင် ကျောက်စိမ်းအများအပြားထွက်သည့် မြို့ဖြစ်ပြီး ၊ စီးပွားရေး အကျိုးအမြတ်ကြောင့် စစ်ကောင်စီ နှင့် KIA တို့ တိုက်ပွဲပြင်းထန်လာလျက်ရှိသည်။
