ကချင်ပြည်နယ် ဖားကန့်မြို့နယ် လုံးခင်းကျေးရွာအုပ်စု မှော်ပုံကျေးရွာအနီးတွင် စစ်ကောင်စီ နှင့် ကချင်လွတ်မြောက်ရေး တပ်မတော် KIA ၊ PDF ပူးပေါင်းတိုက်ပွဲကြား အရပ်သား ၁ ဦး နှင့် ကိုရင်ကြီး ၁ ပါး လက်နက်ကြီး ထိမှန်ခဲ့ကြောင်း စုံစမ်းသိရှိရသည်။
ယမန်နေ့ (ဒီဇင်ဘာ ၆) ရက် မှော်ပုံကျေးရွာအနီးထဲ ညနေ ၆ နာရီဝန်းကျင်တွင် စစ်ကောင်စီ နှင့် KIA ၊ PDF တို့ တိုက်ပွဲကြား လက်နက်ကြီး အပြန်လှန်ပစ်ခတ်မှုကြောင့် မှော်ပုံကျေးရွာက နေအိမ်ထဲ ပိတ်မိနေသည့် အမျိုးသားတစ်ဦး လက်နက်ကြီးကျရောက်ပြီး ပေါက်ကွဲသွားသည့် မိုင်းစ ရှပ်ထိသွားကြောင်း ဖားကန့်မြို့ ဒေသခံများထံမှ သိရသည်။
“ သူက မှော်ပုံထဲကို ပိတ်ခံနေရတဲ့ချိန်မှာ လက်နက်ကြီးက သူ့အိမ်ထဲကျပေါက်ပြီး ရှပ်ထိသွားတာ။ ခြေထောက် တစ်ဘက်ထိသွားတယ်။ အရမ်းကြီးတော့ စိုးရိမ်ရတဲ့ အဆင့်တော့ မဟုတ်ဘူး။ သူက တိုက်ပွဲဖြစ်တဲ့ချိန်က ရွာထဲမှာပဲ ရှိနေတာပေါ့” ဟု ဖားကန့်မြို့နေ သျှမ်းအမျိုးသမီးတစ်ဦးက ပြောသည်။
အလားတူ ကိုရင်ကြီးသည်လည်း ဘုန်းကြီးကျောင်းအတွင်း ခိုလှုံနေစဉ် လက်နက်ကြီးကြောင့် လက်မောင်း ထိခိုက်ဒဏ်ရာ ရရှိခဲ့ကြောင်း သိရသည်။
“ ကိုရင်ကြီးကတော့ လက်မောင်းနားမှာပဲ ထိသွားတာ။ သူလည်းအတူတူပဲ လက်နက်ကြီးထိသွားတာ။ ဘုန်းကြီးကျောင်းထဲ ခိုလှုံနေတဲ့ချိန်မှာ ထိသွားတာပေါ့” ဟု အထက်ပါ အမျိုးသမီးက ပြောသည်။
လက်ရှိသည် ထိုထိခိုက် ဒဏ်ရာရရှိထားသည့်သူကို လုံးခင်းကျေးရွာထဲတွင် ဆေးကုသမှု ခံနေရကြောင်း ဖားကန့်မြို့နေ သျှမ်းအမျိုးသမီးက ဆိုသည်။
ထိုအပြင် တိုက်ပွဲဖြစ်ပွားမှုကြောင့် ပြည်သူများအချို့က ဆန်ခါကျေးရွာ ဘုန်းကြီးကျောင်းသို့ ထွက်ပြေးတိမ်းရှောင်လာပြီး ညအချိန်တွင် လက်နက်ကြီး ကျရောက်ခဲ့သဖြင့် ထိုပြည်သူများသည် လုံးခင်းကျေးရွာသို့ ထပ်မံထွက်ပြေးတိမ်းရှောင်လာ နေရသည်။
“ မနေ့က ဆန်ခါကျေးရွာ ဘုန်းကြီးကျောင်းထဲကို အရင်ထွက်ပြေးသွားတာလေ။ အဲ့နားသွားနေလည်း လက်နက်ကြီးကျ တယ်။ ကံကောင်းလို့ မပေါက်ကွဲတာ။ အခုလည်း လုံးခင်းကျေးရွာထဲကို ထွက်ပြေးတိမ်းရှောင်လာ နေကြတယ်။ အခုက အဝတ်တွေအထုတ်တွေသွားယူနေကြတယ်” ဟု လုံးခင်းကျေးရွာနေ အမျိုးသားတစ်ဦးက ပြောသည်။
လက်ရှိ တိုက်ပွဲအတွင်း လက်နက်ကြီး အပြန်အလှန်ပစ်ခတ်မှုကြောင့် ပြည်သူများက စစ်ဘေးရှောင်လာသည့်နေရာကို လက်နက်ကြီး ကျရောက်မည်ကို စိုးရိမ်နေကြရကြောင်း သိရသည်။
ဖားကန့်မြို့နယ်ထဲတွင် ကျောက်စိမ်းအများအပြားထွက်သည့် မြို့တော်ဖြစ်ကြောင်း ၊ စီးပွားရေး အကျိုးအမြတ်ကြောင့် စစ်ကောင်စီ နှင့် KIA တို့ တိုက်ပွဲပြင်းထန်လာလျက်ရှိသည်။
