စစ်ကောင်စီမှ ပြောင်းလဲ ခန့်အပ်လိုက်သည့် သျှမ်းပြည်တရားလွှတ်တော် တရားသူကြီးချုပ် နှင့် တရားသူကြီးတို့မှ သျှမ်းပြည် တရားရေးကဏ္ဍ ပိုကောင်းလာမည်ကို ရှေ့နေများ မျှော်လင့်နေကြောင်း သတင်းသိရသည်။
ပြီးခဲ့သည့် ဒီဇင်ဘာလ ၅ ရက်တွင် သျှမ်းပြည် ပြည်နယ်တရားလွှတ်တော် တရားသူကြီးချုပ်ကို ဦးသန်းလွင်ဦး အဖြစ် သော်လည်းကောင်း၊ ပြည်နယ် တရားသူကြီးကို ဒေါ်နန်းမေယဥ် အဖြစ် သော်လည်းကောင်း ပြောင်းလဲ ခန့်အပ် လိုက်ကြောင်း စစ်ကောင်စီဘက်မှ ထုတ်ပြန်ကြေညာခဲ့သည်။
ယင်းကဲ့သို့ ပြောင်းလဲခန့်အပ်ခြင်းနှင့် ပတ်သက်ပြီး တရားရေး ကဏ္ဍ ကို ထိရောက်မှုဖြစ်စေလို ကြောင်း တောင်ကြီးမြို့နေ အသက် ၅၀ ဝန်းကျင် အထက်တန်းရှေ့နေတစ်ဦး အမျိုးသားတစ်ဦးက သျှမ်းသံတော်ဆင့်ကို ပြောသည်။
“လူနေရာအပြောင်းအလဲဖြစ်တာပါ၊ ဘယ်လိုပဲ ပြောင်းလဲမှုဖြစ်ဖြစ် တရားရေး ကဏ္ဍ ကို ပိုပြီးတော့ ထိထိ ရောက်ရောက် လုပ်နိုင်ဖို့ပဲ မျှော်လင့်မိပါတယ်၊ စစ်ဥပဒေတွေကိုပဲ မဟုတ်ပဲနဲ့ အရပ်သား ပြည်သူတွေရဲ့ အမှု တရားရေးကိစ္စလည်း ကောင်းမွန်စေချင်တယ်” ဟု တောင်ကြီးမြို့နေ ရှေ့နေက သျှမ်းသံတော်ဆင့်ကို ပြောသည်။
ဒီဇင်ဘာလ ၅ ရက် စစ်ကောင်စီ၏ ထုတ်ပြန်ချက်အရ ဦးသန်းလွင်ဦးကို ဖွဲ့စည်းပုံ အခြေခံဥပဒေ ပုဒ်မ ၄၁၉ အမိန့်အမှတ် ၇၇/၂၀၂၂ အဖြစ် ပြောင်းလဲ ခန့်အပ်လိုက်ခြင်းဖြစ်ပြီး တရားသူကြီး ဒေါ်နန်းမေယဥ်ကို နိုင်ငံတော် အုပ်ချုပ်ရေးကောင်စီ ဖွဲ့စည်းပုံ အခြေခံဥပဒေပုဒ်မ ၄၁၉ အမိန့်အမှတ် ၇၈/၂၀၂၂ အရ လွဲပြောင်းခြင်း ဖြစ်ကြောင်း အဆိုပါ ထုတ်ပြန်ချက်တွင် ပြောဆိုထားသည်။
ယင်းကဲ့သို့ ပြောင်းလဲ ခန့်အပ်လိုက်ခြင်းနှင့် ပတ်သက်ပြီး စစ်ကောင်စီတို့သည် ၎င်းတို့ လုပ်ပိုင်ခွင့်ကို အသုံးချပြီး နေ့စဥ်နှင့်အမျှ အပြောင်းအလဲများရှိနေကြောင်း အသက် ၃၀ ကျော် လားရှိုးမြို့မှ ရှေ့နေ အမျိုးသမီးတစ်ဦးက ပြောသည်။
“ဒါက သူတို့ လုပ်ပိုင်ခွင့်ကိုသူတို့ တောက်လျှောက်နေတယ်၊ နေ့စဥ်နဲ့အမျှ ပြန်တမ်းစာတွေလည်း ထုတ်နေတယ်၊ အဲ့ဒါတွေကို ကြည့်ခြင်းအားဖြင့် စစ်ကောင်စီဘက်က အပြောင်းအလဲ လုပ်ဖို့ ကြိုးစားနေတယ်လို့ မြင်တယ်၊ ဘယ်လို ဆက်ဖြစ်လာ မလဲတော့ မသိသေးဘူးပေါ့” ဟု ရှေ့နေ အမျိုးသမီးက သျှမ်းသံတော်ဆင့်ကို ပြောသည်။
ယခင် တရားသူကြီးချုပ် တာဝန်ထမ်းဆောင်ခဲ့သည့် ဦးကြွယ်ကြွယ်သည် အသက်အရွယ် ၆၅ နှစ်ပြည့်သဖြင့် တာဝန်မှရပ်နားခံရပြီး ၎င်းနေရာလစ်လပ်နေတဲ့ အတွက် စစ်ကောင်စီက ဦးသန်းဦးလွင်ကို လွှဲပြောင်းပေးသွားခြင်း ဖြစ်ကြောင်း အမျိုးသမီး ရှေ့နေကဆက်ပြောသည်။
သျှမ်းပြည်ရှိ တရားလွှတ်တော်များကို ခရိုင်တရားရုံး ၁၀ ရုံး၊ ကိုယ်ပိုင်အုပ်ချုပ်ခွင့်ရဒေသ တရားရုံး ၃ ရုံး၊ ကိုယ်ပိုင်အုပ်ချုပ်ခွင့်ရတိုင်း ၁ ရုံး၊ မြို့နယ်အလိုက် တရားရုံး ၅၀ ရုံးဖြင့် ဖွဲ့စည်းထားကြောင်းလည်း သိရသည်။
Leave a Comments