စစ်ကောင်စီက နိုဝင်ဘာ ၃၀ ရက်တွင် ဒဂုံကျောင်းသား (၇) ဦးကို သေဒဏ်အမိန့် ချမှတ်လိုက်သည့်အပေါ်တွင် ထိုင်းနိုင်ငံ ချင်းမိုင် တက္ကသိုလ် ကျောင်းသား/သူများအဖွဲ့အစည်း က ရှုတ်ချကြောင်း သရုပ်ဖော် ကန့်ကွက်မှုကို ယနေ့ (ဒီဇင်ဘာ ၆) ရက် ညနေပိုင်းတွင် ပြုလုပ်ခဲ့သည်။
လာမည့် ဒီဇင်ဘာ ၇ ရက်တွင် စစ်ကောင်စီက ဖမ်းဆီးခံထားရသည့် ဒဂုံတက္ကသိုလ်ကျောင်းသားများကို သေဒဏ်ပေးမည်ဖြစ်ပြီး ၊ ထိုသေဒဏ်မှ လွတ်ကင်းအောင် နိုင်ငံတကာ ဖိအားပေးလုပ်ဆောင်ပေးရန်အတွက် အဓိက ရည်ရွယ်ပြီး လုပ်ဆောင်ခဲ့ကြောင်း သိရသည်။
“ကောလဟလ သတင်းအရဆိုရင် မနက်ဖြန်ကျရင် ဒဂုံကျောင်းသား ၇ ဦးကို သေဒဏ်ပေးမယ့် နေ့ဖြစ်တယ်။ ဒီနေ့ လုပ်လိုက်တဲ့ပွဲက သူတို့ကို စစ်ကောင်စီကို နိုင်ငံတကာက ဖိအားပေးဖို့ရယ်၊ ပြီးတော့ သေဒဏ်ပေးတာကို ရပ်တန့်ပေးဖို့အတွက်ဆိုပြီးတော့ ကျနော်တို့ အဓိက လုပ်ပေးတာ ဖြစ်ပါတယ်” ဟု ချင်းမိုင်တက္ကသိုလ် ကျောင်းသား/သူ အဖွဲ့စည်းထဲမှ တာဝန်ရှိသူတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်းတွင် နိုင်ငံရေး အကျဉ်းသားများဖြစ်သည့် နိုင်ငံရေး တက်ကြွလှုပ်ရှားသူများ၊ ကျောင်းသားများကို သေဒဏ်ချမှတ်မှုက ပိုမိုမြင့်တက်လာနေလျက်ရှိသည်။
အလားတူ ပြီးခဲ့သည့် ဇန်နဝါရီ ၂၁ ရက်တွင်လည်း ၈၈ မျိုးဆက်ကျောင်းသားခေါင်းဆောင် ဦးဂျင်မီ နှင့် အမျိုးသား ဒီမိုကရေစီအဖွဲ့ချုပ် (NLD) လွှတ်တော်ကိုယ်စားလှယ်ဟောင်း ဦးဖြိုးဇေယျာသော်တို့ကို စစ်ခုံရုံးမှ သေဒဏ်ချမှတ်ခဲ့သည်။
စစ်ကောင်စီ အာဏာသိမ်းပြီး ၂ နှစ်နီးပါးအတွင်းတွင် ပြည်သူ (၂,၅၆၅) ဦးကို သတ်ဖြတ်ခဲ့ပြီး (၁၃,၀၅၇) ဦးကို ဖမ်းဆီးထားကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP ၏ ယနေ့ ဒီဇင်ဘာ ၆ ရက်နေ့ ထုတ်ပြန်ချက်အရသိရသည်။
Leave a Comments