သျှမ်းပြည်မြောက်ပိုင်း မိုးမိတ်မြို့နယ် အတွင်းဖြစ်ပွားသည့် ထိတွေ့တိုက်ပွဲကြောင့် အာဏာသိမ်း စစ်ကောင်စီဘက်မှ အကျအဆုံးများကြောင်း သတင်းသိရသည်။
ပြီးခဲ့သည့် နိုဝင်ဘာလ ၂၆ နှင့် ၂၇ ရက် တို့တွင် မိုးမိတ်မြို့နယ် လွယ်မောက်ရွာ၊ ခါးခယ်ရွာ အနီးတွင် စစ်ကောင်စီ တပ်ဖွဲ့ ခလရ ၂၇၆ ၊ ၃၄၈ နှင့် ခမရ ၂၂၃ တို့နှင့် ကချင်လွတ်မြောက်ရေး တပ်မတော် KIA ပူးပေါင်းတပ်ဖွဲ့က ထိတွေ့ တိုက်ပွဲဖြစ်ပွားခဲ့ပြီး စစ်ကောင်စီဘက်မှ အကျအဆုံးများကြောင်း သတင်းသိရသည်။
“ထိတွေ့တိုက်ပွဲ နှစ်ရက်ဖြစ်တာ စစ်ကောင်စီ တပ်သားဘက်က အကျအဆုံးနဲ့ ထိခိုက်ဒဏ်ရာရသူ ၇/၈ ယောက် လောက်ရှိတယ်၊ KIA/PDF ဘက်က အကျအဆုံးရှိတာ မကြားမိဘူး၊ ဒီတိုက်ပွဲအပြီး စကစ ကနောက်ဆုတ် ပေးရတယ်၊ ခမရ ၂၂၃ ဆိုရင် သူတို့အခြေစိုက်တဲ့ မဘိမ်းမြို့ကို ဆုတ်သွားတယ်” ဟု မိုးမိတ်မြို့နယ်မှ ဒေသခံ အမျိုးသား တစ်ဦးက သျှမ်းသံတော်ဆင့်ကိုပြောသည်။
အဆိုပါ ထိတွေ့တိုက်ပွဲ အပြီး ခမရ ၂၂၃ စစ်ကြောင်းက မဘိမ်းမြို့အထိ ဆုတ်ခွာသွားကြောင်း ဒေသခံများက ပြောသည်။
ယင်း တိုက်ပွဲဖြစ်ပွားမှုကြောင့် လွယ်မောက်ကျေးရွာ နှင့် ခါးခယ်ရွာတို့မှ ဒေသခံ ၇၀ ကျော်တို့က ပန်ဆားစေး ရွာသို့ စစ်ဘေး တိမ်းရှောင်ရောက်လာရကြောင်း သိရသည်။
“တိုက်ပွဲဖြစ်တဲ့ ၂၆ ရက်နေ့မှာပဲ စစ်ရှောင် ၇၀ ကျော်က ပန်ဆားစေးရွာကို ရောက်လာတယ်၊ စာသင်ကျောင်း တွေမှာ လာပြီးတော့ ခိုလှုံ နေထိုင်တာပေါ့၊ ကျောင်းက မဖွင့်ရသေးဘူးလေ၊ စားဖို့သောက်ဖို့ နေထိုင်ဖို့ကို ရွာခံ တွေကပဲ အချင်းချင်း ကူညီစောင့်ရှောက်ပေးထားတယ်၊ မနေ့က ဒီဇင်ဘာလ ၁ ရက်နေ့မှာပဲ နေရပ်ပြန်သွား တယ်” ဟု မိုးမိတ်မြို့ခံ အမျိုးသားက ဆက်ပြောသည်။
လွယ်မောက်ကျေးရွာတို့မှ ပန်ဆားစေးရွာသို့ စစ်ရှောင်ရောက်လာသည့် စစ်ရှောင် ၇၀ ကျော်တို့သည် စစ်ရှောင်ပြီး ၄ ရက်အကြာ နေရပ်သို့ ပြန်သွားခြင်း ဖြစ်ကြောင်း အထက်ပါ ပုဂ္ဂိုလ်က ဆက်ပြောသည်။
လက်ရှိတွင် စစ်ကောင်စီတပ် ခလရ ၂၇၆ နှင့် ၃၄၈ တို့လည်း ထိတွေ့တိုက်ပွဲဖြစ်ပွားရာ လွယ်မောက်အနီးမှ ဆုတ်ခွာလာပြီး မြို့သစ်ရွာ အနီးတစ်ဝိုက် လှုပ်ရှားနေကြောင်း သိရသည်။
မိုးမိတ်မြို့နယ်အတွင်းသည် စစ်တပ်မှ နိုင်ငံတော် အာဏာသိမ်းယူပြီး နောက်ပိုင်း စစ်ကောင်စီတပ်ဖွဲ့ နှင့် တိုင်းရင်းသား လက်နက်ကိုင် တပ်ဖွဲ့တို့၏ ထိတွေ့တိုက်ပွဲ များပြားလာပြီး စစ်ကောင်စီဘက် ထိခိုက်ကျဆုံးမှု များပြားနေကြောင်းလည်း သိရသည်။
မိုးမိတ်မြို့နယ်အတွင်းတွင် အာဏာသိမ်း စစ်ကောင်စီတပ်အပြင် တိုင်းရင်းသား လက်နက်ကိုင် တပ်ဖွဲ့ဖြစ်သည့် SSPP/SSA တပ်ဖွဲ့၊ TNLA တပ်ဖွဲ့ နှင့် KIA ပူးပေါင်းတပ်ဖွဲ့တို့လည်း သွားလာလှုပ်ရှားနေသည်။
Leave a Comments