ကယားပြည် (ကရင်နီ) ဒီးမောဆို့မြို့ ကုန်းသာကျေးရွာအတွင်း တပ်စွဲထားသော စစ်ကောင်စီတပ်များ ထိန်းချုပ်နယ်မြေကို ကယား (ကရင်နီ) တော်လှန်ရေးတပ်ပေါင်းစု (KRU) မှ ပြန်လည်ထိန်းချုပ် နိုင်ခဲ့ကြောင်း သတင်းရရှိသည်။
ကယား (ကရင်)နီ တော်လှန်ရေးတပ်ပေါင်းစု KRU နှင့် KNDF, KA, KGZ ပြည်သူ့ကာကွယ်ရေး တပ်ဖွဲ့ PDF တို့ ပူးပေါင်းကာ စစ်ကောင်စီ တပ်မ (၆၆) တပ်စွဲထားသော နယ်မြေကို ပြန်လည်နေရာယူနိုင်ခဲ့ကြောင်း KRU သတင်းပြန်ကြားရေးတာဝန်ခံ တစ်ဦးက သျှမ်းသံတော်ဆင့်ကို ပြောသည်။
“ ကုန်းသာရွာကို ကျနော်တို့ လုံးရင်းထွေး စစ်ဆင်ထိုးတဲ့အချိန်မှာ တပ်စခန်းက စွန့်ခွာထွက်ပြေးရတယ်။ ကျနော်တို့ဘက်ကလည်း ထိခိုက်မှုမရှိဘူး။ သူတို့ တပ်စခန်းက စွန့်ပြေးတော့ သူတို့ဘက်ကလည်း ထိခိုက်မှု မရှိပါဘူး “ ဟု ၎င်းပြန်ကြားရေး တာဝန်ခံ တစ်ဦးက ပြောသည်။
ထိုနယ်မြေကို ပြန်လည်ထိန်းချုပ်နိုင်ခြင်း မဟုတ်သေးဘဲ ပြန်လည်နေရာယူထားခြင်းဖြစ်ပြီး ဒေသခံများကို ပြန်လည်နေထိုင်ခွင့် မပေးသေးကြောင်း သိရသည်။
“အဓိကတော့ ကျနော်တို့ နယ်မြေကို ပြန်လည်ထိန်းချုပ်တာတော့ မဟုတ်ဘူး၊ စစ်တပ်စွဲထားတဲ့ နယ်မြေကို ကျနော်တို့ ပြန်လည်နေရာယူနိုင်ခဲ့တာ။ ယူပြီးရင် စနစ်တကျ နယ်မြေရှင်းလင်းမှုတွေလုပ်မယ်။ ဒီနယ်မြေ မှာစစ်ကောင်စီက အချိန်မရွေး ရောက်လာနိုင်တယ်။ ပြီးတော့ ဒေသခံ ပြည်သူတွေလည်း ထွက်ပြေးတာ ၇ လ လောက်ရှိပြီ။ ဒီနေ့ချိန်ထိတော့ ဒေသခံတွေက ပြန်လည်နေထိုင်ခွင့် မပေးသေးဘူး “ ဟု ၎င်းက ဆက်ပြောသည်။
ဒီးမော့ဆို့မြို့ ကုန်းသာကျေးရွာအတွင်း နယ်မြေများ ပြန်လည်ရှင်းလင်းနေစဉ်အတွင်း စစ်ကောင်စီ တပ်များ၏ ရိက္ခာ ၊ စွပ်ဗုံး၊ ကျည်ဆံ နှင့် အသုံးအဆောင်ပစ္စည်း များ သိမ်းပိုက်ရရှိထားကြောင်း သိရသည်။
Leave a Comments