Sunday, February 5, 2023

ဖယ်ခုံမြို့နယ် တစ်လအတွင်း အရပ်သား ၆ ဦး လက်နက်ကြီးထိ၊ ၃ ဦး မြေမြှုပ်မိုင်းထိ

Must read

သျှမ်းပြည်တောင်ပိုင်း ဖယ်ခုံမြို့နယ် ၊ မိုးဗြဲမြို့တွင် စစ်ကောင်စီ၏ လက်နက်ကြီး ရမ်းသမ်းပစ်ခတ်မှုကြောင့် အရပ်သား (၆) ဦး ထိခိုက်ဒဏ်ရာရရှိခဲ့ပြီး မိုးဗြဲမြို့တွင် ကလေးငယ် (၃) ဦး မြေမြှုပ်မိုင်းနင်းမိကြောင်း သတင်းရရှိသည်။

လက်နက်ကြီး ထိမှန်သူ

ထို နိုဝင်ဘာလ အတွင်း မိုးဗြဲမြို့တွင် ကလေးငယ် (၃) ဦး မြေမြှုပ်မိုင်းနင်းမိကာ ဖယ်ခုံမြို့နယ်ထဲတွင် ကလေး ၂ ဦး၊ အရပ်သား အမျိုးသမီး ၂ ဦး နှင့် အမျိုးသား ၂ ဦး တို့ ထိခိုက်ဒဏ်ရာ ရရှိခဲ့သည်။

လက်ရှိတွင်လည်း ထိခိုက်ဒဏ်ရာရရှိထားသူများကို လုံခြုံသည့် နေရာသို့ ပို့ဆောင်ထားပြီး ဆေးကုသ နေကြောင်း သိရသည်။

“ဖယ်ခုံ က ထိခိုက်လူနာတွေကတော့ တစ်ချို့လည်း ဆေးကုသနေရသေးတယ်။ ဆေးရုံမှာပို့ထားပေးတယ်။ တစ်ချို့ ဒဏ်ရာမပြင်းထန်တဲ့ သူတွေဆိုရင်တော့ သက်သာလာပါပြီ” ဟု ဖယ်ခုံမြို့နယ် ဒေသခံ အမျိုးသားတစ်ဦးက ပြောသည်။

လက်ရှိတွင်လည်း နိုဝင်ဘာ ၂၈ ရက်နေ့မှ ယမန်နေ့ ၃၀ ထိ စစ်ကောင်စီက ဖယ်ခုံမြို့နယ် အနောက်ဘက်ကမ်း တွင် ည ပြည်သူများ အိပ်ချိန်တွင် လက်နက်ကြီးတွေကို ဆက်တိုက် ရမ်းသမ်းပစ်ခတ်နေလျက်ရှိနေကြောင်း သိရသည်။

“ ၃ ရက်ရှိနေပြီ သူတို့ ပစ်နေတာ။ ည အချိန်မှ ပစ်တာပဲ။ ဖယ်ခုံ အနောက်ဘက်ကမ်းဘက်ကို ပစ်တာ။ ဘယ်နားကျလဲဆိုတာတော့ အတိကျ မသိရသေးဘူး။ ထိခိုက်ဒဏ်ရာရတာရှိမရှိလည်း အသေးစိတ်တော့ မကြားမိသေးဘူး” ဟု ဖယ်ခုံမြို့ ဒေသခံ အမျိုးသားတစ်ဦးက ပြောသည်။

အလားတူ မိုးဗြဲမြို့တွင်လည်း စစ်ကောင်စီက ကင်းပုန်းချ တပ်စွဲထားသည့်အတွက်ကြောင့် ပြည်သူများအနေဖြင့် ည ၇ နာရီမှ မနက် ၅ နာရီထိ အပြင်ထွက် သွားလာခြင်းမပြုရန် နှင့် မိုးဗြဲမြို့တွင် ငြိမ်းချမ်းမည်မဟုတ်ကြောင်း နိုဝင်ဘာ ၂၈ ရက်တွင် မိုးဗြဲ PDF မှ ထုတ်ပြန်ထားသည်။

လက်ရှိတွင်လည်း မိုးဗြဲမြို့ နှင့် ဖယ်ခုံမြို့ ကျေးရွာဘက်က ပြည်သူများတစ်ချို့သည် ညအချိန်တွင် စိုးရိမ် ထိတ်လန့်စွာ နေထိုင်ရပြီး တစ်ချို့ကလည်း ထွက်ပြေးတိမ်းရှောင်နေကြကြောင်း သိရသည်။

“ တစ်ချို့တော့လည်း ရွာတွေမှာ လုပ်စရာရှိလို့နေနေကြတာပဲ။ စိုးရိမ်စိတ်နဲ့နေကြရတာပေါ့။ တစ်ချို့လည်း စပါးရိတ်ဖို့နေကြတယ်။ တစ်ချို့ကတော့ တစ်ခြားနေရာက စစ်ဘေးရှောင်စခန်းတွေမှာ သွားနေကြတယ်” ဟု ဖယ်ခုံမြို့နယ်အတွင်း နယ်လှည့်ပေးနေသည့် ကျန်းမာရေး အဖွဲ့ကပြောသည်။

စစ်တပ်က အာဏာသိမ်းပြီးနောက်ပိုင်း ဖယ်ခုံမြို့နယ်ထဲတွင် စစ်ကောင်စီက အောက်တိုဘာ နှင့် နိုဝင်ဘာလတွင် တိုက်ပွဲဖြစ်ပွားမှုမရှိဘဲ စစ်ကောင်စီဘက်မှ တစ်ဖက်သတ် လက်နက်ကြီး ရမ်းသမ်း ပစ်ခတ်ကြောင်း သိရသည်။

Leave a Comments

- Advertisement -spot_img

Latest article