“UWSA” ထိန်းချုပ်သည့်ဒေသ ပန်ဆန်းမြို့နယ် နမ့်လွတ်ကျေးရွာအတွင်း ယနေ့ (နိုဝင်ဘာ ၃၀) ရက် နံနက် ၈ နာရီတွင် ကားတစ်စီးမှ ဗုံးပေါက်ကွဲမှုဖြစ်ကာ လူသေဆုံးမှုရှိကြောင်း သတင်းရရှိသည်။
အဆိုပါ ဗုံးပေါက်ကွဲသည့်နေရာသည် ပန်ဆိုင်းမြို့တွင်း လှုပ်ရှားနေသည့် TNLA တပ်ဖွဲ့ရုံးရှေ့ရှိ ခေါက်ဆွဲဆိုင်တွင် ဖြစ်ပွားခဲ့ခြင်းဖြစ်ပြီး ထိခိုက် သေဆုံးသူများ၏ အရေအတွက်ကို မသိရသေးကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ခေါက်ဆွဲဆိုင်ရှေ့ ရပ်ထားတဲ့ Alphard ကားတစ်စီးထဲကနေ ဗုံးပေါက်ခဲ့တာပါ၊ ဘယ်သူ ဘယ်အဖွဲ့က လုပ်တာ ကို မသိဘူး၊ ခေါက်ဆွဲဆိုင်ထဲမှာ လူကလည်း များနေတဲ့အချိန်ဆိုတော့ ဗုံးပေါက်မှုကြောင့် ထိခိုက်သေဆုံးသူ လည်း များတယ်၊ တိတိကျကျတော့ မသိရသေးဘူး” ဟု ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ထို ထိခိုက်ဒဏ်ရာရသေဆုံးသူများတွင် ကိုယ်ဝန်သည် အမျိုးသမီး နှင့် သက်ကြီး ရွယ်အိုများလည်း ပါဝင် ပြီး စုစုပေါင်း (၃၀) နီးပါးခန့်က ထိခိုက်ဒဏ်ရာရ သေဆုံးမှု ရှိနေကြောင်း ဒေသခံများက ပြောသော်လည်း သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပေ။
ဗုံးပေါက်ကွဲမှု နှင့်ပတ်သက်ပြီး UWSA မှ ပြောရေးဆိုခွင့်ရှိသူကို သျှမ်းသံတော်ဆင့်မှ အကြိမ်ကြိမ် ဆက်သွယ် မေးမြန်းခဲ့သော်လည်း မရရှိခဲ့ပေ။
လက်ရှိတွင် နယ်မြေခံ UWSA တပ်ဖွဲ့မှ တာဝန်ရှိသူများက လုံခြုံရေးအင်အားဖြန့်ကျက်ထားပြီး စစ်ဆေးမှုများ လည်း ပြုလုပ်နေကြောင်း သိရသည်။
