သျှမ်းပြည်အရှေ့ပိုင်း တာချီလိတ်မြို့ ဟုန်ပန်းကွင်း ကားလမ်းပေါ်တွင် ကားနှင့် ဆိုင်ကယ်တစ်စီး တိုက်မိပြီး ဆိုင်ကယ်ပေါ်မှ အမျိုးသားတစ်ဦး ပွဲချင်းပြီးသေဆုံးသွားကြောင်း သတင်းသိရသည်။
ယနေ့ နိုဝင်ဘာလ ၂၉ ရက် နေ့လည် ၁၁ နာရီခွဲတွင် မြေသယ်ကား ကားတစ်စီးနှင့် အော်တိုကလစ် ဆိုင်ကယ် တစ်စီးတို့ တိုက်မိကြရာ ဆိုင်ကယ်ပေါ်မှ အသက် ၂၀ ဝန်းကျင် အမျိုးသားတစ်ဦး ဦးခေါင်ကွဲပြီး ပွဲချင်း သေဆုံးသွားကြောင်း ဦးလှမိုးလူမှုကူညီအသင်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ မြေသယ်ကားနဲ့ ဆိုင်ကယ် တစ်စီးတိုက်မိတာ။ ဆိုင်ကယ်ကတော့ ရှေ့ဘီးကောက်သွားတယ်။ လူက ဦးခေါင်း၊ ဗိုက်၊ ခြေထောက်တို့ ဒဏ်ရာရတယ်။ တစ်ခါတည်း ပွဲချင်းပြီးသွားတာ။ အခု အလောင်းကိုတော့ ဆေးရုံ ပို့ထားတယ် “ ဟု ၎င်းတာဝန်ခံတစ်ဦးက ပြောသည်။
လက်ရှိ သေဆုံးနေသူသည် မည်သူမည်ဝါ မရှိရသေးကာ ၎င်းမိသားစုဝင်များနှင့်လည်း အဆက်အသွယ် မရသေးပေ။
“ ယာဉ်စည်းကမ်း၊ လမ်းစည်းကမ်း လိုက်နာပြီး မောင်းဖို့တော့လိုတယ်။ ဆိုင်ကယ် မောင်းရင်လည်း ဦးထုပ်ဆောင်းပြီး မောင်းကြပါ “ ဟု ၎င်းက ဆက်ပြောသည်။
ယခု (နိုဝင်ဘာာလ) အတွင်း တာချီလိတ်တွင် ယာဉ်တိုက်မှုခင်း ၁၀ ကြိမ်ထက်မနည်း ဖြစ်ပွားပြီး ထိခိုက်ဒဏ်ရာ ရရှိသူများနှင့် သေဆုံး ၁ ဦး ရှိခဲ့ကြောင်း သိရသည်။
Leave a Comments