သျှမ်းပြည်တောင်ပိုင်း မိုးဗြဲမြို့ တောင်ပေါ်ဒေသရှိ ပရဟိတကျောင်းတစ်ကျောင်းတွင် နေထိုင်သည့် ကလေးငယ် ၃ ဦးသည် မြေမြှုပ်မိုင်း နင်းမိကာ ပေါက်ကွဲပြီး ထိခိုက်ဒဏ်ရာရရှိခဲ့ကြောင်း သိရသည်။

ယမန်နေ့ (နိုဝင်ဘာ ၂၇) ရက်တွင် မိုးဗြဲ ပရဟိတကျောင်းနေသည့် ကလေး (၃) ဦး တောထဲသွားစဥ် နေ့လည် ၁၂ နာရီ၌ မိုင်းနင်းမိပြီး အသက် ၁၅ နှစ်အရွယ်ရှိ ကလေးငယ်တစ်ဦးမှာ ဦးခေါင်းတွင် မိုင်းကျည်စ ထိမှန်သွားခဲ့ကြောင်း Mobye Rescue Team မှ တော်လှန်ရေး မဟာမိတ်များနှင့် ပူးပေါင်းကာ သွားရောက်ကူညီခဲ့ကြောင်း တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“ကလေးတွေ တောင်ပေါ်မှာရှိတဲ့ ပရဟိတကျောင်းမှာနေတယ်။ သူတို့ တောထဲမှာ သွားဆော့ကစားရင်း မြေမြှုပ်မိုင်းကို နင်းမိတာ။ တစ်ယောက်က ဦးခေါင်းကို မိုင်းကျည်စထိလို့ ဆေးရုံတစ်နေရာကို ပို့ထားလိုက် ရတယ်။ ကျန်တဲ့ ကလေး ၂ ယောက်ကတော့ ဘယ်ခြေထောက်၊ ဒူးတွေမှာ ထိခိုက်ဒဏ်ရာတွေ ရသွားတယ် “ ဟု ၎င်း တာဝန်ရှိသူ တစ်ဦးက ပြောသည်။

မြေမြှုပ်မိုင်းနင်းမိသော ကလေးငယ်များသည် အသက် ၁၂ နှစ်၊ ၁၅ နှစ်နှင့် ၁၆ နှစ် အရွယ် ကလေးငယ်များ ဖြစ်ကြသည်။

တောင်ပေါ်ဒေသတွင် စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF တို့တိုက်ပွဲ ဖြစ်ပွားခဲ့ပြီးနောက် မြေမြှုပ်မိုင်းများ ရှိနေသဖြင့် တောထဲသွားလာပါက သတိထားရန် PDF အဖွဲ့ဝင် တစ်ဦးက ပြောသည်။

“တချို့တိုက်ပွဲဖြစ်ခဲ့တဲ့ နေရာမှာ စစ်ကောင်စီ ထောင်ထားတဲ့ မိုင်းတွေကတော့ ရှိကောင်းရှိလိမ့်မယ်။ မိုင်းတွေက အကုန်လုံး မရှင်းလင်းရသေးဘူး။ မသွားသင့်နေရာမှာ မသွားဖို့တော့လိုတယ်။ သွားနေရင်လည်း သတိထားရမယ် “ ဟု ၎င်းက ဆိုသည်။

ပြီးခဲ့သည့် နိုဝင်ဘာလ ၁၄ ရက် ဖယ်ခုံမြို့နယ် အင်းအရှေ့ဘက်ကမ်းတွင် စစ်ကောင်စီဘက်မှ လက်နက်ကြီး ခြိမ်းခြောက်ပစ်ခတ်မှုကြောင့် ၇ နှစ် ကလေး တစ်ဦး နှင့် အသက် ၃၀ အရွယ် အမျိုးသားတစ်ဦး ထိမှန်ခဲ့ကြောင်း သိရသည်။