သျှမ်းပြည်တောင်ပိုင်း လင်းခေးမြို့အနီးရှိ ပန်ဆတ်အမြောက်တပ်စခန်း စစ်ဆေးရေးဂိတ်တွင် စစ်ကောင်စီမှ စစ်ဆေးမှုများ တင်းကြပ်စွာ ပြုလုပ်သည့် အပြင် ခရီးသွား ပြည်သူများကိုလည်း ခြိမ်းခြောက်ပြောဆိုမှု ရှိနေကြောင်း စုံစမ်းသိရသည်။

လင်းခေးမြို့ အခြေစိုက် စစ်ကောင်စီအမြောက်တပ်၏ “ပန်ဆတ်” စစ်ဆေးရေးဂိတ်တွင် စစ်ကောင်စီတပ်သားတို့ သည် စစ်ကိုင်းတိုင်း ၊မကွေးတိုင်း၊ မန္တလေးတိုင်းဒေသကြီး၊ နေပြည်တော်၊ ကရင်နီ (ကယား)ပြည် နှင့် ချင်းပြည်နယ် မှတ်ပုံတင်ကိုင်ဆောင်သည့် ခရီးသည်များကို ရှာဖွေကာ တင်းကြပ်စွာ စစ်ဆေးနေကြောင်း သတင်းသိရသည်။

“ပန်ဆတ်စစ်ဆေးရေးဂိတ်က စစ်သားတွေက ကားပေါ် ကနေ ဆင်းခိုင်းပြီး မှတ်ပုံတင်ကိုတောင်းတယ်၊ ကျနော်တို့ နောက်ကားမှာ ၉မျဥ်းစောင်း မှတ်ပုံတင်ကိုင်တဲ့ သူတစ်ဦးရှိလို့ ၅ မျဥ်းစောင်း၊ ၈ မျဥ်းစောင်း ၊ ၉မျဥ်းစောင်း၊ကိုင်တဲ့သူတွေကို တခါတည်းဆွဲချလို့ရတယ် နော် ဆိုပြီးတော့ ခြိမ်းခြောက်ပြောတယ်၊ စစ်မေးတာလည်း စုံစိနေတာပဲ” ဟု ကြုံတွေ့ရသည့် ခရီးသည် တစ်ဦး က သျှမ်းသံတော်ဆင့်ကို ပြောသည်။

အာဏာသိမ်း စစ်ကောင်စီ လက်အောက်ခံ ပန်ဆတ် စစ်ဆေးရေးဂိတ်မှ စစ်သားများသည် လက်ရှိ စစ်ကောင်စီနှင့်တိုက်ပွဲ ပြင်းထန်နေသည့် ပြည်နယ် နှင့် တိုင်းဒေသကြီးမှ ပြည်သူများကို တင်းကြပ်စွာ စစ်ဆေးနေခြင်း ဖြစ်သည်။

ပန်ဆတ် စစ်ဆေးရေးဂိတ်မှ စစ်ကောင်စီ တပ်သားတို့သည် ခရီးသွားပြည်သူများကို စစ်ဆေးမေးမြန်းသည့်အပြင် ငွေကြေးတောင်းခံမှုများလည်း ရှိကြောင်းသိရသည်။

“ဘယ်ကလာလဲ ဘယ်ကိုသွားမလဲ မေးတဲ့အပြင် သွားမဲ့နေရာက ဘယ်သူတွေရှိလဲ၊ ဘာတွေတော်စပ်ကြလဲ ဆိုတာတွေပါ မေးတာ၊ စစ်မေးခံရတဲ့သူတွေက ကြောက်လွန်း လို့ မျက်စိမျက်နှာပျက်ကြတယ်၊ ပြီးတော့ ခရီးသည် တစ်ယောက်ကို ငွေကြေး ၅ ထောင်တောင်းတယ်” ဟု အဆိုပါ ခရီးလမ်းကို သွားရောက်ခဲ့သည့် အသက် ၄၅နှစ်အရွယ်ရှိ အမျိုးသားက ပြောသည်။

လင်းခေးမြို့အထွက် ပန်ဆတ် အမြောက်တပ်စခန်း စစ်ဆေးရေးဂိတ်မှ စစ်သားတို့သည် ညဘက်အခါတွင်လည်း အရက်မူးပြီး ခရီးသွားပြည်သူများကို စစ်ဆေးကြောင်း သိရသည်။

အဆိုပါ ဂိတ်စခန်းသည် လင်းခေး – မိုးနဲ လမ်းမှ လင်းခေးမြို့ အထွက် လမ်းမကြီးပေါ်တွင် တည်ရှိပြီး ခရီးသွား ပြည်သူများကို နေ့စဉ် စစ်ဆေးနေသည့် ဂိတ်စခန်းဖြစ်ကြောင်း သိရသည်။