သျှမ်းပြည်မြောက်ပိုင်း မူဆယ်မြို့တပိုင်တနိုင် ဈေးသည်များကို တအောင်း (ပလောင်) အမျိုးသား လွတ်မြောက်ရေး တပ်မတော်က အခွန်ကောက်ခံနေကြောင်း စုံစမ်းသိရှိရသည်။
ယခင်တွင် ဘဏ်များ၊ ကုမ္မဏီာများ၊ စီးပွားရေးလုပ်ငန်းရှင်များကိုသာ အခွန်ကောက်ယူ သော်လည်း ယခု (အောက်တိုဘာလ) အတွင်းမှာ တပိုင်တနိုင် ဖွင့်လှစ်ထားသော အိမ်ဈေးဆိုင်များကို တစ်နှစ်စာအတွက် ကျပ် ၁၅ သိန်း အခွန်ဆောင်စေရန် လိပ်စာကဒ်များ ပေးဆောင်လာကြောင်း မူဆယ်မြို့မှ အမည်မဖော်လိုသူ ဈေးသည်အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ ကျမတို့က တပိုင်တနိုင်နဲ့ အိမ်မှာဈေးရောင်းတာ ဒီပုံစံအတိုင်းတစ်နှစ်လုံးရောင်းမှ အမြတ် ကျပ် ၁၅ သိန်း မရှိဘူး။ လမ်းဘေးဈေးဆိုင်ငယ်တွေ မကျန်တောင်းတယ်။ သူတို့ကအဲ့လောက် အတောင်းကြမ်းလာတော့ ကျမတို့ပြည်သူတွေလည်း ပေးရခက်၊ မပေးရခက်နဲ့ စိတ်မလုံခြုံမှုတွေ ခံစားရတယ်။ ဘယ်လိုမှ မပျော်တော့ဘူး “ ဟု ၎င်း အမျိုးသမီးတစ်ဦးက ပြောသည်။
တပိုင်တနိုင် အိမ်ဈေးဆိုင် ဖွင့်လှစ်ထားသည်မှာ သက်တမ်း (၁၀) နှစ်ခန့် ရှိပြီ ဖြစ်သော်လည်း တစ်ကြိမ်မျှ အခွန်မဆောင်ခဲ့ရ ဖူးကြောင်း ၎င်းကဆက်ပြောသည်။
အဆိုပါ အခွန်ကောက်ခံခြင်းနှင့် ပတ်သတ်ပြီး TNLA ဗိုလ်မှူးချုပ် တာဘုန်းကျော်ကို သျှမ်းသံတော်ဆင့်မှ ဆက်သွယ်မေး ခဲ့သော်လည်း ဖုန်းလက်ခံဖြေကြားခြင်း မရှိခဲ့ကြောင်း သိရသည်။
“ အခုလို ခက်ခဲတဲ့ကာလခေတ်ကြီးမှာ ကျပ် ၁၅ သိန်းပေးဖို့ ဘယ်သူမှ မတက်နိုင်ဘူး။ တတ်နိုင်တဲ့သူတွေတော့ ပေးတယ်။ အဲ့လောက်ကြီး မပေးရဖို့၊ အခွန်မဆောင်ရဖို့ အတွက် သူ့တို့ကို တောင်းဆိုချင်ပါတယ် “ ဟု ၎င်း အထက်ပုဂ္ဂိုလ် အမျိုးသမီးတစ်ဦးက ထပ်လောင်းပြောသည်။
မူဆယ်တွင် စစ်ကောင်စီတပ်ဖွဲ့နှင့် တိုင်းရင်းသားလက်နက်ဖြစ်တဲ့ သျှမ်းပြည်တိုးတက်ရေးပါတီ သျှမ်းပြည်တပ်မတော် (SSPP/SSA)၊ တအောင်း (ပလောင်) အမျိုးသား လွှတ်မြောက်ရေး တပ်မတော် TNLA နှင့် ကချင်အမျိုးသား လွှတ်လပ်ရေး တပ်မတော် KIA များလှုပ်ရှားသောနယ်မြေဖြစ်ပြီး နှစ်စဉ်နှစ်တိုင်း ပြည်သူ့ထံ အခွန်ကောက်ခံကြောင်း သိရသည်။
Leave a Comments