သျှမ်းပြည်မြောက်ပိုင်း နောင်ချိုမြို့နယ်- ပြင်ဦးလွင်မြို့ကြား မန္တလေး PDF နှင့် စစ်ကောင်စီတို့ တိုက်ပွဲဖြစ်ပွားပြီးနောက်ပိုင်း စစ်ရေးတင်းမာနေလျက်ရှိကြောင်း စုံစမ်းသိရှိရသည်။
ယခု နိုဝင်ဘာလအတွင်းတွင် စစ်ကောင်စီတို့ဘက် စစ်ဆေးထိုးဆင်လာပြီး ထိတွေ့မှုတွေရှိလာပြီး တိုက်ပွဲဖြစ်ပွားခဲ့ကြောင်း သိရသည်။
“ အခုတော့ စစ်ရေးတင်းမာနေတယ်။ တိုက်ပွဲမဖြစ်တာ၂ ရက်ရှိနေပြီ။ တိုက်ပွဲဖြစ်ပွားတာက နောင်ချိုမြို့နယ် နဲ့ ပြင်ဦးလွင်ကြားမှာဖြစ်တာ။ သူတို့ဘက်ကနေ စစ်ဆေးလုပ်ပြီး ထိတွေ့မှုတွေရှိလို့ တိုက်ပွဲဖြစ်ပွားခဲ့တာ” ဟု မန္တလေး PDF ကိုမိုးကြိုးက ပြောသည်။
ပြီးခဲ့သည့် နိုဝင်ဘာ ၁၆ ရက်တွင် စစ်ကောင်စီ နှင့် မန္တလေး PDF တို့ တိုက်ပွဲဖြစ်ပွားခဲ့ပြီး PDF ဘက်မှ ၄ ဦး ဒဏ်ရာ ရရှိခဲ့ကြောင်း သိရသည်။
“ ဒီနေ့ထိတော့ တိုက်ပွဲပြန်မဖြစ်သေးဘူး။ ၁၆ ရက်နေ့တုန်းကပဲဖြစ်တာ။ သူတို့ဘက်ကတော့ ခန့်မှန်းခြေ အင်အား ၁၀၀ ကျော်လောက်စစ်ရေးထိုးလာတာ။ ကျနော်တို့ဘက်တော့ ရဲဘော် ၄ ဦး ဒဏ်ရာအနည်းငယ်ရလာကြတယ်။ မစိုးရိမ်ရဘူး” ဟု အထက်ပါ မန္တလေး PDF မှ ရဲဘော်မိုး ကြိုးက ပြောသည်။
အလားတူ နိုဝင်ဘာ ၈ နှင့် ၉ ရက်တွင်လည်း စစ်ကောင်စီ နှင့် မန္တလေး PDF တို့တိုက်ပွဲဖြစ်ပွားခဲပြီး စစ်ကောင်စီဘက်မှ အရာရှိအဆင့် တစ်ဦး သေဆုံးခဲ့ကြောင်းသိရသည်။
ပြီးခဲ့သည့် ဩဂုတ်လတွင်လည်း စစ်ကောင်စီ နှင့် မန္တလေး PDF တို့ တိုက်ပွဲဖြစ်ပွားမှုကြောင့် ဒိုးပင်ကျေးရွာ၊ဟိုခိုကျေးရွာ၊ ကုလားကွဲကျေးရွာမှ ပြည်သူ ၁ထောင် ဝန်းကျင်က စစ်ဘေးတိမ်းရှောင် လာခဲ့ရကြောင်း သိရသည်
