Thursday, December 1, 2022

အမျိုးသားနေ့ အထိမ်းအမှတ်အဖြစ် နိုင်ငံရေးပုဒ်မနှင့် တခြားပုဒ်မ အကျဥ်းသားများကို စစ်ကောင်စီမှ လွတ်ပေး

Must read

အမျိုးသားနေ့ အထိမ်းအမှတ်အနေဖြင့် စစ်ကောင်စီမှ အကျဥ်းထောင်အသီးသီးမှ ပြစ်ဒဏ်ကျခံလျက်ရှိသည့် အကျဥ်းသားအများအပြားလွတ်ငြိမ်းချမ်းသာခွင့်ပေးခဲ့ကြောင်း သတင်းရရှိသည်။

လားရှိုးထောင်ရှေ့

အာဏာသိမ်းစစ်ကောင်စီ အနေဖြင့် ပြစ်ဒဏ်ကျခံလျက်ရှိသည့် အကျည်းသား(၆၀၀၀)နီးပါးကို လွတ်ငြိမ်းချမ်းသာခွင့် ပေးမည်ဟု ကြေညာခဲ့သည်။

ထိုထဲတွင် အင်းစိန်ထောင်မှ နိုင်ငံရေးအကျဥ်းသားဖြစ်သည့် ၈၈မျိုးဆက်ကျောင်းသားခေါင်းဆောင် ဦးမြအေး၊ ရွှေညဝါဆရာတော်၊ NLDပါတီ ပြောရေးဆိုခွင့်ရှိသူ ဒေါက်တာမျိုးညွန့်၊ စာရေးဆရာ မောင်သာချိုတို့ လွတ်မြောက်လာခဲ့သည်။

ထိုနည်းတူ သျှမ်းပြည်တောင်ပိုင်း ညောင်ရွှေမြို့နယ် တောင်လေးလုံးအကျဥ်းထောင်မှ နိုင်ငံရေး အကျဥ်းသားများ နှင့် အကျဥ်းကျနေသူ အမျိုးသမီးများ စုစုပေါင်း ၂၉ ဦး လွတ်မြောက်လာကြောင်း ကနဦး သိရသည်။

အဆိုပါ လွတ်မြောက်လာသူများတွင် သံလွင်သွေးချင်း အယ်ဒီတာ မမြဝန်းရံ အပါအဝင် ၅၀၅ ပုဒ်မ နှင့် တခြားသော အကျဥ်းသား အမျိုးသမီးများ စုစုပေါင်း ၂၉ လွတ်မြောက်လာကြောင်း အမည်မဖော်လိုသူ ရှေ့နေတစ်ဦးက သျှမ်းသံတော်ဆင့်ကို ပြောသည်။

တောင်လေးလုံးအကျဥ်းထောင်

“အမျိုးသမီးတွေကို အရင်ဆုံးလွတ်ပေးတာတဲ့၊ အခု အမျိုးသမီးစုစုပေါင်း ၂၉ ဦး လွတ်လာပြီလို့ ကြားတယ်၊ အခုတော့ အမျိုးသားတွေကို လွတ်ဖို့ စာရင်းလုပ်နေတာတဲ့၊ စုစုပေါင်း အရေအတွက်တော့ မသိရသေးဘူး” ဟု အထက်ပါ ရှေ့နေက ပြောသည်။

အလားတူ သျှမ်းပြည် မြောက်ပိုင်း လားရှိုးမြို့ ရှိ ပြည်နယ် အကျဥ်းထောင်မှလည်း အကျဥ်းသား ၁၃ ဦးထွက်လာပြီ ဖြစ်ကြောင်း နီးစပ်သည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“လားရှိုးထောင်ကနေ ကျားရော မရော ၁၃ ဦးကို ကားနဲ့ ရဲစခန်းဘက်ကို ခေါ်သွားတယ်၊ ခံဝန်ကတိတွေ ထိုးဖို့ ဆိုလားပဲ၊ ထပ်ထွက်လာဖို့လည်း ရှိတယ်လို့ သိတယ်၊ အသေးစိတ် အချက်အလက်တွေတော့ မသိရသေးဘူး” ဟု အထက်ပါ အမျိုးသားက ပြောသည်။

လက်ရှိတွင် စစ်ကောင်စီမှ လွတ်ငြိမ်းချမ်းသာခွင့်ပေးသည့် သျှမ်းပြည် အတွင်းမှ အကျဥ်းသားများ၏ အရေအတွက်ကိုလည်း ဆက်လက် စုံစမ်းနေလျက်ရှိပြီး ဆက်လက်ဖော်ပြသွားမည်ဖြစ်သည်။

ယခု အချိန်ထိ စစ်ကောင်စီ၏လွတ်ငြိမ်းချမ်းသာပေးသည့် အကျဉ်းသား ထဲတွင် ဩစတေးလျစီးပွားရေး ပညာရှင် မစ္စတာရှောင်တာနယ် ၊ ဗြိတိန် သံအမတ်ဟာင် မစ္စဗစ်ကီဘိုမင်း၊ ဂျပန် ဒါရိုက်တာ မစ္စတာ တိုရိုကူဘိုတာ ၊ အမေရိကန် နိုင်ငံသား ကျော်ဌေးဦးနဲ့ မစ္စဗစ်ကီဘိုမင်း၏အမျိုးသား ပန်းချီထိန်လင်း တို့ကို ပြန်လွှတ်ပေးပြီး ပြည်နှင်ဒဏ်ပေးခဲ့ကြောင်းသိရသည်။

ထို့အပြင် ပုဒ်မ ၅၀၅(က) နှင့် တရားစွဲ ခံထားရသည့် အနုပညာရှင် ဘုန်းသိုက်၊ ဖွေးဖွေး၊ ဟေမာန် သူသူအောင်၊ မယ်မင်းဘုံ၊ စုမွန်၊ နီနီခင်ဇော်၊ သီဟဖြိုး၊ ယွန်းဝတီလွင်မိုး၊ သဇင်ထူးမြင့်၊ ထက်ထက်ထွန်း၊ နန်းခင်ဇေယျာ တို့ ၁၁ ဦးလည်း အမှုပိတ်ပေးထားသည်ဟု စစ်ကောင်စီက ထုတ်ပြန်ကြေငြာထားသည်။

ထိုသို့လွတ်မြောက်လာသူများတွင် နိုင်ငံရေးအကျဥ်းသား အနည်းစုသာပါဝင်ပြီး အများစုမှာ ခိုး၊ ဆိုး၊ လုယက်သူများ ဖြစ်သဖြင့် ပြည်သူများအနေဖြင့် လုံခြုံရေးသတိထားကြရန်လည်း ရှေ့နေများက ပြောဆိုလိုက်သည်။

Leave a Comments

- Advertisement -spot_img

Latest article