သျှမ်းပြည်မြောက်ပိုင်း ကျောက်မဲမြို့ရှိ ခိုမုန်းကျေးရွာအုပ်စုရှိ စစ်ကောင်စီ စစ်ဆေးရေးစခန်းတစ်ခု လက်နက်ကြီးဖြင့် ပစ်ခတ်တိုက်ခိုက်ခြင်း ခံရကြောင်း သတင်းသိရသည်။
ယမန်နေ့ နိုဝင်ဘာလ ၁၆ ရက် ညနေပိုင်း ၃ နာရီကျော်ဝန်းကျင်တွင် ခိုမုန်းကျေးရွာအုပ်စု တောင်နောက်ရွာရှိ ငြိမ်းချမ်းရေး ဘုရာကုန်းအနီး ကျောက်မဲမြို့အဝင် စစ်ကောင်စီ၏ စစ်ဆေးရေးဂိတ်တစ်ခုကို အမည်မသိ လက်နက်ကိုင် တပ်ဖွဲ့တစ်ခုမှ လာရောက် ပစ်ခတ်ခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“မနေ့က ညနေ ၃ နာရီကျော်အချိန်မှာ လက်နက်ကြီးနဲ့ လာပစ်ခတ်တိုက်ခိုက်ခဲ့တယ်၊ ဘယ်အဖွဲ့အစည်းလဲတော့ မသိရသေးဘူး၊ ပစ်ခတ်ချိန်လည်း ခဏလေးပဲကြာတယ်၊ လူသူ ထိခိုက်မှုမရှိဘူး၊ အဆောက်အုံတချို့ပဲ ထိခိုက် ပျက်စီးတယ်။” ဟု အသက် ၄၀ ဝန်းကျင် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ကောင်စီ စစ်ဆေးရေးဂိတ်သည် ငြိမ်းချမ်းရေးဘုရားကုန်းရှိ ဘုရားဝန်းနှင့် ကပ်လျက် ညောင်ပင် အောက်တွင် တည်ရှိနေခြင်းဖြစ်ပြီး စစ်ဆေးရေးဂိတ် ဖွင့်လှစ်ခဲ့သည်မှာ ၃ နှစ်ကြာခဲ့ပြီဖြစ်ကြောင်းလည်း သိရသည်။
ထိုပစ်ခတ်တိုက်ခတ်ခံရမှုအပြီး စစ်ကောင်စီတပ်ဖွဲ့မှ မြို့ဝင် မြို့ထွက်နေရာများနှင့် မြို့တွင်းလမ်းမကြီးတွင် စစ်ဆေးမှု တင်းကြပ်ထားပြီး စစ်အင်အားများလည်း နေရာအနှံ့ဖြန့်ထားကြောင်း ကျောက်မဲမြို့နေ ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ညနေပိုင်းဆေးရုံကနေ ပြန်လာတဲ့အချိန် ရပ်ကွက် ၉ လမ်းတောင့်မှာ စစ်ဆေးခံရတယ်၊ အမျိုးသားတွေ ပါတဲ့ကားတွေဆို ကားပေါ်က ဆင်းခိုင်းပြီးတော့ စစ်တယ်၊ စစ်သားတွေ လည်း နေရာအနံ့ အများကြီးပဲ” ဟု အသက် ၂၀ ကျော် ကျောက်မဲဒေသခံ အမျိုးသမီးတစ်ဦးက ပြောသည်။
ထို့အပြင် ယမန်နေ့ (နိုဝင်ဘာ ၁၆)ရက် ည ၉ နာရီဝန်းကျင်တွင်လည်း ကျောက်မဲမြို့မှ အကြောင်းရင်းမသိ သေနတ်ပစ်ခတ်သံ ၃ ချက်ထက်မနည်း ကြားရကြောင်းလည်း အထက်ပါ အမျိုးသမီးက ဆက်ပြောသည်။
ကျောက်မဲမြို့မှ ငြိမ်းချမ်းရေး ဘုရာကုန်းအနီး ကျောက်မဲမြို့အဝင် စစ်ဆေးရေးဂိတ် ပစ်ခတ်တိုက်ခိုက်ခံရခြင်း နှင့် ပတ်သက်ပြီး အသေးစိတ်အချက်လက်နှင့် ထိခိုက်ကျဆုံးမှုကို သျှမ်းသံတော်ဆင့်မှ သီးခြားအတည်ပြုချက် မရသေးပေ။
ယခုလ နိုဝင်ဘာလ ၈ ရက်တွင်လည်း ကျောက်မဲမြို့ ခရိုင်ရဲရုံးတွင် လက်လုပ်ဗုံးဖြင့် ပစ်ခတ်တိုက်ခိုက် ခံရပြီး ရဲတပ်သား ၂ဦးထိမှန်ဒဏ်ရာရရှိခဲ့သည်။
ကျောက်မဲမြို့သည် မြောက်ပိုင်းမဟာမိတ်တပ်များဖြစ်ကြသော ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) ၊ ကချင်လွတ်မြောက်ရေးတပ်မတော် (KIA) ၊ တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) ၊သျှမ်းပြန်လည်ထူထောင်ရေးကောင်စီ (RCSS) နှင့် စစ်ကောင်စီ တပ်ဖွဲ့ လှုပ်ရှားသည့်နယ်မြေဖြစ်သည်။
စစ်တပ်က အာဏာသိမ်းပြီးနောက် သျှမ်းပြည်အတွင်းရှိ မြို့နယ်အများစု အစိုးရရုံးတွင် ပေါက်ကွဲမှု မကြာခဏ ဖြစ်ပွားနေလျက်ရှိကြောင်း သိရသည်။
