မြန်မာ-ထိုင်းနယ်စပ်ဖြစ်တဲ့ သျှမ်းပြည်အရှေ့ပိုင်း တာချီလိတ်မြို့တွင် ထိုင်းဘတ်ငွေ (တစ်ထောင်) တန် စက္ကူအတု ပြန့်နှံ့လာနေကြောင်း စုံစမ်းသိရသည်။

တာချီလိတ်တွင် အဓိကအားဖြင့် ထိုင်းဘတ်ငွေများကို အသုံးပြုနေရသဖြင့် ဘတ်ငွေ (တစ်ထောင်) တန် ငွေစက္ကူအတု ပြန့်နှံ့လားခြင်းနှင့်ပတ်သက်ပြီး သတိထားကိုင်ဆောင်ရန် လိုအပ်ကြောင်း တာချီလိတ်ဒေသခံ ဆန်ဆိုင်းရပ်ကွက်နေ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ ပုံမှန်ဘတ်ငွေ အစစ်နဲ့တွေတော့ တကယ်တူပါတယ်။ သေချာမကြည့်ရင် အတုနဲ့ အစစ်ကို မခွဲခြားနိုင်ပါဘူး။ ငွေစက္ကူ အတုတွေက ကြည့်မယ်ဆို (๑๐๐๐) ဂဏန်းရဲ့ အပေါ်မှာထိုင်းဘုရင်ပုံ မပါဘူး။ ထိုင်းဘုရင်ပုံ ပါ၊ မပါကတော့ အလင်းရောင်ရှိတဲ့ဘက်ကို ငွေနဲ့ကာပြီး အဲ့(๑๐๐๐) ဂဏန်းရဲ့ အပေါ်ကွက်လပ်လေးက ကြည့်ရတယ် “ ဟု ၎င်းဒေသခံအမျိုးသားတစ်ဦးက ပြောသည်။

အဆိုပါ ထိုင်းဘတ်ငွေ (တစ်ထောင်) တန် ငွေစက္ကူအတုများ ကိုင်ဆောင်ထားသူများက ပြန်လည် အသုံးပြု၍ မရလျှင် နစ်နာမှုများစွာရှိကြောင်း ၎င်းကဆက်ပြောသည်။

“ ကိုယ့်ဆီကို ဈေးလာဝယ်ရင် သေချာစစ်ဆေးဖို့ လိုတယ်။ ဈေးသည်တွေဆိုရင် ပိုတောင်သတိထားရတယ်။ ကိုယ်ဆီကဝယ်သွားပြီး ကိုယ့်ကဒီငွေအတုကို ပြန်သွားသုံးလို့ မရရင် အလကား ရှုံးတယ်။ ထိုင်းဘတ်ငွေ (တစ်ထောင်) ဆိုတာက တန်ဖိုးအများကြီးရှိပါတယ် “ ဟု ၎င်းက ထပ်လောင်းပြောသည်။

လက်ရှိတွင် ငွေကြေးရေး ပြဿနာများနှင့် ပတ်သတ်၍ အထူးစုံစမ်းစစ်ဆေးရေး အဖွဲ့ (စစစ) မှာ တာဝန်ရှိသော်လည်း ယနေ့အချိန်ထိ ထိုကိစ္စရပ်များကို ကိုင်တွယ်ဖြေရှင်းခြင်း မရှိသေးကြောင်း သိရသည်။