Thursday, December 1, 2022

မိုးမောက်မြို့နယ် ကျေးရွာအတွင်း စစ်ကောင်စီတပ်စွဲထားပြီး စစ်ရေး တင်းမာနေဆဲ

Must read

ကချင်ပြည် မိုးမောက်မြို့နယ် လုံဂျာကျေးရွာ နှင့် နောင်ပေါင်း ကျေးရွာထဲ စစ်ကောင်စီက တပ်စွဲထားပြီး စစ်ရေးတင်းမာနေလျက်ရှိကြောင်း စုံစမ်း သိရှိရသည်။

စစ်ဘေးရှောင်များ

မိုးမောက်မြို့နယ်ထဲတွင် နိုဝင်ဘာ ၅ ရက်မှစပြီး တိုက်ပွဲငြိမ်သက်နေသော်လည်း စစ်ရေးက တင်းမာနေသဖြင့် စစ်ရှောင် (၆၀၀) ကျော်သည် နေရပ်သို့ မပြန်နိုင်သေးကြောင်း စစ်ဘေးရှောင်များကို ကူညီပေးနေသည့် အမျိုးသားတစ်ဦးက သျှမ်းသံတော်ဆင့် ကိုပြောသည်။

“တိုက်ပွဲက ငြိမ်နေတာတော့ ၃ ရက်လောက်ရှိနေပြီ။ စစ်ရေးတော့ တင်းမာနေသေးတာရှိတယ်။ စစ်ကောင်စီကလည်း ကျေးရွာထဲမှာ တပ်စွဲထားတာရှိတယ်။ တိုက်ပွဲတော့ အချိန်မရွေး ဖြစ်လာနိုင်မယ် ထင်တယ်” ဟု စစ်ဘေးရှောင်များကို ကူညီပေးနေသည့် အမျိုးသားက ဆိုသည်။

အဆိုပါ စစ်ကောင်စီက ကျေးရွာထဲတွင် တပ်စွဲနေထိုင်ထားသောကြောင့် ချမ်းမြေ့ဘုန်းကြီးကျောင်း နှင့် လောကမာရဇိန် ဘုန်းတော်ကြီးကျောင်း သို့ စစ်ဘေးရှောင်လာသည့် ပြည်သူများက နေရပ်ကို မပြန်နိုင်သေးကြောင်း သိရသည်။

“ စစ်ဘေးရှောင်တွေကတော့ မပြန်ရဲကြသေးဘူး။ တိုက်ပွဲ ဘယ်ချိန် ထဖြစ်မလဲ မသိတော့ ဒီမှာပဲ ဆက်နေကြသေးတယ်။ တိုက်ပွဲက အချိန်မရွေး ဖြစ်လာနိုင်တော့ စစ်ဘေးရှောင်တွေကလည်း စိုးရိမ်ကြတယ်လေ” ဟု မိုးမောက်မြို့ စစ်ဘေးရှောင်များကို ကူညီပေးနေသည့် သူက ပြောသည်။

သို့သော် စစ်ဘေးရှောင်များတစ်ချို့က စပါးရိတ်သိမ်းရန်အတွက် နေရပ်ကို နေ့အချိန် ပြန်သွားပြီး ညအချိန်တွင် စစ်ရှောင်စခန်း သို့ ပြန်လာအိပ်ကြောင်း သိရသည်။

“နေ့ အချိန်ဆိုရင်တော့ စပါးပြန်သွားရိတ်ရတယ်။ ညဆိုရင်တော့ ဒီကိုပြန်လာအိပ်တာပေါ့။ စပါးက မရိတ်ရင်လည်း မရဘူး။ နောက်နှစ်အတွက် စားစရာ မရှိဖြစ်မယ်။ အခု မရိတ်ရင်လည်း ကျွဲ၊ နွားတွေက လယ်ကွက်ထဲဝင်လို့ရှိရင် ကျနော်တို့ စပါးတွေကို စားပစ်တယ်။ ဒီထက်နောက်ကျသွားရိတ် ရင်တော့ စပါးတွေက မကျန်တော့ဘူး။ ကျွဲ၊ နွားထိန်းဖို့ လူလည်းမရှိဘူး” ဟု စစ်ဘေးရှောင်တစ်ဦးကပြောသည်။

လက်ရှိ ဆောင်းရာသီ ဝင်ရောက်လာသောကြောင့် စစ်ဘေးရှောင်များအတွက်က ဆေးဝါး သောက်သုံးရေ များ၊ အနွေးထည်များ လိုအပ်ကြောင်း သိရသည်။

ထိုအပြင် နေ့ခင်းတွင် စပါးပြန်ရိတ်သည့် သူအများစုသည် လူငယ်များ ဖြစ်သဖြင့် စစ်ရှောင်စခန်းထဲ ကျန်ရှိသည့် သက်ကြီးရွယ်အိုများ နှင့် ကလေးငယ်များအတွက် ချက်ပြုတ်စားသောက်ရန်လည်း ခက်ခဲနေသည်။

လက်ရှိမှာ ဆောင်းရာသီဝင်သည့် ကာလဖြစ်သဖြင့် စစ်ဘေးရှောင်များ အနွေးထည်များလည်း လိုအပ်နေသည်။

“ အခုက ဆောင်းရာသီဝင်ပြီဆိုတော့ အနွေးထည်တွေ လိုအပ်တယ်။ ဒီမှာက သက်ကြီးရွယ်အို နဲ့ ကလေးတွေ များတယ်။ ပြီးတော့ သောက်သုံးရေတွေ လိုအပ်တယ်။ ရေချိုးခန်းတွေကလည်း ပေါင်းသုံးနေရတယ်။ လူများတော့ ရေက အလုံလောက်မရှိဘူး။ နေ့ခင်းဆို လူငယ်တွေမရှိလို့ သက်ကြီးရွယ်အိုတွေအတွက် ဟင်းချက်ပြုတ်ဖို့ ရေသည်ဖို့အတွက် အခက်ခဲတွေ ဖြစ်ကြတယ်” ဟု ၎င်းက ပြောသည်။

ထိုကြောင့် စစ်ဘေးရှောင်ပြည်သူများက တိုက်ပွဲကို ရပ်တန့်ပေးရန်လည်း တောင်းဆိုကြသည်။

ကချင်ပြည် မိုးမောက်မြို့နယ် လုံဂျာ နှင့် နောင်ပေါင်းကျေးရွာဒေသခံ ၆၀၀ ကျော်ဝန်းကျင်က အောက်တိုဘာ ၂၀ ရက်နေ့ကစ KIA, PDF နှင့် စစ်ကောင်စီတို့ တိုက်ပွဲကြောင့် အမျိုးသမီး ၂ ဦး သေဆုံးခဲ့ရပြီး အမျိုးသမီး ၄ ဦး လက်နက်ကြီး ထိမှန်ခဲ့ပြီး ဆေးကုသမှု ခံယူနေရကြောင်း သိရသည်။

Leave a Comments

- Advertisement -spot_img

Latest article