သျှမ်းပြည်မြောက်ပိုင်း မူဆယ်မြို့အတွင်း ရဲအယောင်ဆောင်ပြီး လမ်းသွားလာပြည်သူများကို တားဆီးစစ်ဆေးနေလျက်ရှိကြောင်း ဒေသခံများထံမှ စုံစမ်း သိရှိရသည်။
စစ်တပ်က အာဏာသိမ်းပြီး ၂ နှစ်ကျော်ကာလအတွင်းတွင် မူဆယ်မြို့မှာ ပြီးခဲ့သည့် ဇူလိုင်လက စပြီး ရဲဝတ်စုံများ ဝတ်ဆင်ကာ ရဲအတုအယောင်ဆောင်ဖြင့် လမ်းသွားလမ်းလာများကို စစ်ဆေးပြီး ငွေတောင်းယူမှုများလည်း ရှိနေကြောင်း မူဆယ်မြို့ ဒေသခံ တစ်ဦးက ပြောသည်။
“အရင်က လွန်ခဲ့တဲ့ ၅ လ လောက်ကတည်းက မင်္ဂလာ မူဆယ်မှာလည်း ကျနော်တို့ ကြုံဖူးတယ်။ လမ်းပေါ်မှာ စစ်ဆေးနေတာ။ အဲ့တုန်းကတော့ ရဲအစစ်လားလို့ ထင်တာပေါ့။ သူတို့ ရဲတွေဝတ်တဲ့ ဘောင်းဘီလိုတော့ ဝတ်ထားတယ်။ အင်္ကျီတော့ မပါဘူး။ အပေါ်က သာမာန်အင်္ကျီပဲ” ဟု ၎င်းက ပြောသည်။
အလားတူ ပြီးခဲ့သည့် နိုဝင်ဘာ ၂ ရက် ညနေ ၅ နာရီခွဲ ဝန်းကျင်တွင် မူဆယ်မြို့ စက်မှုတောင်ပန်းခြံ စက်မှု ဘုန်းကြီးကျောင်း အကွေ့နားတွင် ရဲ အယောင်ဆောင်ထားသည့် အမျိုးသား ၂ ဦးက လမ်းသွားလမ်းလာ နေသည့် ကားများကို တားပြီး စစ်ဆေးနေကြောင်း သိရသည်။
ထို ရဲအယောင် ၂ ဦးသည်လည်း ရဲဘောင်းဘီ ဝတ်ဆင်ထားပြီး တုတ်၊ ဓားများဖြင့် စောင့်ဆိုင်း စစ်ဆေးမှု ပြုလုပ်သည်။
“ ကျနော် အဲ့နေ့က ဧည့်သည် သွားပို့လာတာ။ အဲ့နားမှာ လူ ၂ ယောက်က ဆိုင်ကယ် နဲ့ ရဲဘောင်းဘီဝတ်ပြီးတော့ စောင့်နေတာ။ တကယ် ရဲမဟုတ်ဘူး။ ကျနော်က ဘယ် ရဲစခန်းကလဲ။ ဘာလို့ ၂ ယောက်ပဲ လာစောင့်တာလဲ လို့မေးတယ်။ ပြီးတော့ ရဲစခန်းကို ဖုန်းဆက်မေးမယ်နော် ပြောလိုက်တော့ သူတို့က ကျနော်ကို ပေးသွားတယ်။ ကားမှားတယ်ဆိုပြီး ပေးသွားလိုက်တာ” ဟု ကိုယ်တိုင် ကြုံတွေ့ခဲ့သည့် အမျိုးသား တစ်ဦး က ပြောသည်။
ရဲအယောင်ဆောင် ၂ ဦးသည် စစ်ဆေးနေချိန်တွင်လည်း ကားပေါ်မှ အတင်းဆင်းခိုင်းပြီး၊ ကားမှန်တံခါးများ အကုန်ချခိုင်းသည့် အပြင် ထိုရဲ အယောင်အဆောင် ၂ ဦး ၏ တဖက်လမ်းတွင်လည်း အုပ်စုတစ်စုကိုလည်း တွေ့ခဲ့ရကြောင်း ကိုယ်တိုင်ကြုံတွေ့သူ တစ်ဦးက ပြောပြသည်။
“ သူတို့တွေက လမ်းပေါ်မှာတော့ ၂ ယောက် လောက်ပဲ ထွက်စောင့်နေတာ။ ပြီးတော့ လမ်းဘေးခြုံထဲမှာ လူအုပ်ကြီး စောင့်နေတာ။ အဲ့ထဲမှာ တုတ်တွေ၊ ဓားတွေနဲ့ စောင့်နေကြတယ်။ သူတို့က ကားပေါ်ကနေ ဆင်းခိုင်းတယ်။ စစ် စရာရှိတယ်ပြောပြီး တော့ အတင်းဆင်းခိုင်းတာ။ ကျနော်က မဆင်းလိုက်လို့ ဘာမှ မဖြစ်ဘူး” ဟု အထက်ပါ ကိုယ်တိုင်ကြုံတွေ့ခဲ့သည့် အမျိုးသားက ပြောသည်။
ထိုအပြင် မူဆယ်မြို့တွင် ဆိုင်ကယ် လုယက်မှုများ၊ ရဲ အတုစစ်ဆေးမှုများလည်း ပေါများလျက်ရှိနေပြီး လုံခြုံမှုအတွက် အလွန် အားနည်းနေကြောင်း ဒေသခံများက ပြောသည်။
“ ဒီလိုပဲ လုပ်စားတဲ့ သူတွေကလည်း အများကြီးရှိနေတာ။ မူဆယ်မှာ အဲ့လို ရဲအတုတွေ စစ်ဆေးနေတာ ခဏခဏကြားရတယ်။ ညအချိန်ဆို အဲ့လို တားပြီးစစ်နေတာ။ လုံခြုံမှုပိုင်းက အရမ်းကို အားနည်းသွားပြီး။ ပိုက်ဆံရှိတဲ့သူအတွက်ကော၊ ပိုက်ဆံမရှိတဲ့ သူအတွက်ကော လုံခြုံမှုတွေ မရှိတော့ဘူး” ဟု မူဆယ်မြို့ ဒေသခံတစ်ဦးကပြောသည်။
မူဆယ်မြို့သည် မြန်မာ – တရုတ်နယ်စပ်မြို့ဖြစ်ပြီး လက်နက်ကိုင် အဖွဲ့အစည်း အများအပြား သွားလာလှုပ်ရှားသည့် ဒေသဖြစ်သည်။
ယခုနှစ် အောက်တိုဘာ ၁၇ ရက်တွင်လည်း အမျိုးသမီး ၂ ဦး လမ်းလျှောက်သွားလာချိန်တွင်လည်း အမည်မသိ ၂ ဦးက ဆိုင်ကယ်ဖြင့် ဖုန်းလုယက် ယူဆောင်သွားကြောင်း သိရသည်။
