သျှမ်းပြည်တောင်ပိုင်း နမ့်စန်မြို့ အခြေခံပညာအထက်တန်းကျောင်းသား အချင်းချင်း ရန်ဖြစ်ရိုက်နှက်ရာမှ ကျောင်းသားတစ်ဦး သေဆုံးမှု အထိ ဖြစ်လာကြောင်း စုံစမ်းသိရသည်။
ပြီးခဲ့သည့် နိုဝင်ဘာလ ၂ ရက် တွင် နမ့်စန်မြို့ အထကကျောင်းမှ ၉ တန်းကျောင်းသား နှင့် ၁၀ တန်းကျောင်းသား တို့ ရန်ဖြစ်ရာ ရိုက်နှက်ကြရာ ကျောင်းသားတစ်ဦးဖြစ်သည့် အသက် ၁၆ နှစ်အရွယ် မောင်အောင်မော်ဟိန်းသည် ၃ရက် သတိလစ် မေ့မျောခဲ့ပြီး ယနေ့ (နိုဝင်ဘာ ၅)ရက် မနက် ၂နာရီတွင် သေဆုံးသွားကြောင်း ဆွေမျိုးနီးစပ်သူ တစ်ဦးက သျှမ်းသံတော်ဆင့်ကို ပြောသည်။
မောင်အောင်မော်ဟိန်းကို နိုဝင်ဘာ ၂ရက်တွင် နမ့်ဆန်ဆေးရုံမှ တောင်ကြီးဆေးရုံသို့ ညတွင်းချင်းပို့ဆောင်ခဲ့ရာ ဆရာဝန်များ၏ ညွှန်ကြားချက်အရ ဦးခေါင်းခွဲစိတ်ကုသမှု ပြုလုပ်ရန်အတွက် နိုဝင်ဘာ ၃ရက်တွင် နေပြည်တော်ဆေးရုံသို့ ပို့ဆောင်ခဲ့ပြီး နေပြည်တော်တွင်သေဆုံးသွားခဲ့သည်။
“ကလေးတွေ ဘာကြောင့်ရန်ဖြစ်ရသလဲတော့ မသိဘူး၊ ကျောင်းမှာပဲ ရန်ဖြစ်ကြတာ၊ ဆေးရုံကို ကျောင်းက ဆရာ/မတွေပဲ ပို့ပေးတာ၊ ကျမတူလေး နမ့်စန်ဆေးရုံကနေ တောင်ကြီး စဝ်စံထွန်းဆေးရုံကို စိုးရိမ်ရတဲ့ အခြေ အနေရှိတယ်လို့ ဆရာဝန်ကြီးက ပြောပြီး နေပြည်တော် ဆေးရုံကြီးကို ထပ်ပို့ခိုင်းတယ်၊ နေပြည်တော်မှာ သေဆုံး သွားတာပါ” ဟု မောင်အော်မော်ဟိန်း နှင့် ဆွေမျိုးနီးစပ်သူ က ဆိုသည်။
သေဆုံးသွားသည့် မောင်အောင်မော်ဟိန်း၏ မိဘများသည် နေ့စားအလုပ်သမားများသာဖြစ်ပြီး၊ ၎င်းနှင့်ရန်ဖြစ်သည့် ကျောင်းသားသည် နမ့်စန်လေတပ်၏ အသိုင်းအဝိုင်းမှ ဖြစ်ကြောင်းသိရသည်။
“တူလေးက သတိမရတာ ၃၆ နာရီကျော်ပြီမို့ ဦးခေါင်းကို ခွဲစိတ်ကုသဖို့ နေပြည်တော်ကို သွားရမယ်ဆိုပြီး နေပြည်တော်ကို ရောက်လာတာ၊ ဒီရောက်တော့ Xray အဖြေတောင်မရသေးဘူး ၊ ဒီမနက် ၂ နာရီလောက်မှာ သေဆုံးသွားပြီ” ဟု အထက်ပါ အမျိးသမီးက သျှမ်းသံတော်ဆင့်ကို ဆက်ပြောသည်။
အသက်သေဆုံးမှု ဖြစ်ပွားသည်အထိ ရိုက်နှက်ရန်ဖြစ်သည့် ကိစ္စကို စစ်တပ်အသိုင်းအဝိုင်းမှ ကျောင်းအုပ်ကြီးနှင့်ပူးပေါင်းကာ သတင်းမထွက်စေရန် လုပ်ဆောင်နေသည့်အပြင် တာဝန်ယူမှု တာဝန်ခံမှုလည်း မရှိကြောင်း မောင်အောင်မော်ဟိန်း နှင့် ဆွေမျိုးနီးစပ်သူကပြောသည်။
“ဆေးရုံစတက်ပြီး အခု သေဆုံးသွားတဲ့ အချိန်အထိ ဘာမေးထူးခေါ်ပြောမှ မရှိခဲ့ဘူး၊ သူ့ (မောင်အောင်မော်ဟိန်းရဲ့ အမေ) ကငွေတွေလိုက်ချေးပြီး ရတဲ့ ပိုက်ဆံ ၁၅ သိန်းနဲ့ နေပြည်တော်ကိုရောက်သွားတာ၊ ကျောင်းအုပ်ကြီးကဆို ကျမတို့က ဖြစ်စဥ်မသိဘူးလို့ ပြောတယ်၊ အဲ့ဒီ လုပ်တဲ့ ကျောင်းသားမိသားစုလည်း ဘာတာဝန်ယူမှုမှမရှိဘူး” ဟု ၎င်းက ပြောသည်။
နစ်နာသူ မိသားစုဝင်များက အသက်သေဆုံးသည်အထိ ရိုက်နှက်သည့် ကျောင်းသားကို ကျောင်းမှ အရေးယူပေးစေလိုကြောင်း နှင့် ကျူးလွန်သူ ကျောင်းသးမိသားစုများကိုလည်း တာဝန်ယူမှုရှိစေလိုကြောင်း မိသားစုဝင်များက ပြောဆိုနေကြသည်။
နမ့်စန်မြို့သည် စစ်တပ်အခြေစိုက် မြို့ဖြစ်သည့်အတွက် စစ်တပ်အသိုင်းအဝိုင်းမှ အာဏာ များကို ပြည်သူများက ကြောက်လန့်နေရကြောင်းလည်းသိရသည်။
Leave a Comments