စစ်ကိုင်းတိုင်း ဗန်းမောက်မြို့ ကျေးရွာများထဲတွင် ပြည်သူ့ကာကွယ်ရေး တပ်ဖွဲ့ PDF က စခန်းချ နေထိုင်ခြင်းကြောင့် ဒေသခံများက တိုက်ပွဲဖြစ်ပွားမှာကို စိုးရိမ်နေကြောင်း စုံစမ်းသိရှိရသည်။

ဗန်းမောက်မြို့နယ် အနောက်ပိုင်း မံအင်မန်ကျည်းကုန်းရွာ၊ မံထွန်ရွာနှင့် ကြောင်လည်စံပြကျေးရွာ ထဲတွင် ပြည်သူ့ကာကွယ်ရေး တပ်ဖွဲ့ PDF များက စခန်းချနေထိုင်ခြင်းကြောင့် တိုက်ပွဲဖြစ်ပွားမှာကို ဒေသခံများက စိုးရိမ်နေကြောင်း အသက် (၂၀) နှစ်ကျော် သျှမ်းနီ လူငယ်တစ်ဦးက သျှမ်းသံတော်ဆင့်ကိုပြောသည်။

ပြီးခဲ့သည့် ဇူလိုင်လအတွင်း စစ်ကောင်စီတပ်ဖွဲ့ နှင့် ကချင်လွတ်လပ်ရေး တပ်မတော် (KIA ) နှင့် PDF ပူးပေါင်းတပ်ဖွဲ့ တို့ စတင်တိုက်ပွဲ ဖြစ်ပွားပြီးနောက်ပိုင်း ပြည်သူ့ကာကွယ်ရေး PDF ကကျေးရွာထဲတွင် စခန်းချ နေထိုင်ခဲ့ကြောင်း ဆိုသည်။

“ အခုလက်ရှိ ပြည်သူ့ကာကွယ်ရေး PDF တွေအနေနဲ့ ရွာထဲမှာ အခြေချတယ်။ ပြည်သူ့ကာကွယ်ရေးတပ်ဖွဲ့အနေနဲ့ ရွာထဲနေပြီး ခံပေးနေတဲ့ အချိန်မှာ စစ်ကောင်စီက ထိုးစစ်ဆင်လာပြီဆိုရင် နှစ်ဖက်တိုက်ပွဲဖြစ်ကြတယ်။ တိုက်ပွဲဖြစ်ရင် ရွာနာတယ်၊ ပြည်သူလူထုနာတယ်။ ကျနော်တို့ ဖြစ်ချင်တာတော့ ဘယ်လက်နက်ကိုင်တပ်ဖွဲ့မဆို ရွာထဲမှာစခန်းချပြီး နေထိုင် ပိုင်ခွင့်မရှိဘူးလေ” ဟု ၎င်းဒေသခံ လူငယ်တစ်ဦးက ပြောသည်။

ပြည်သူပိုင် အဆောက်အဦး၊ ဆေးရုံ၊ ဆေးခန်းထဲသို့ ပြည်သူ့ကာကွယ်ရေး တပ်ဖွဲ့ PDF က စခန်းချ နေထိုင်ခြင်းကြောင့် အောက်တိုဘာ ၂၀ ရက်နှင့် ၂၁ ရက်တွင် စစ်ကောင်စီတပ်မှ နှစ်ရက်ဆက်တိုက် လေကြောင်းဗုံးကြဲ တိုက်ခိုက်ခဲ့ပြီး ပြည်သူတစ်ဦးနှင့် အဆောက်အအုံးများကို ထိခိုက်စေကြောင်း ၎င်းကဆက်ပြောသည်။

ထို့အပြင် လက်နက်ကိုင်တပ်ဖွဲ့များအနေဖြင့် ကျေးရွာအတွင်းတွင် အရပ်ဝတ်ဖြင့် သွားလာလှုပ်ရှားခြင်းလည်း တတ်နိုင်သလောက် ရှောင်ရှားပေးစေလိုကြောင်း ဒေသခံ စိုင်းလှကျော် က ပြောသည်။
“ လက်နက်ကိုင်တပ်သားတွေက ပြည်သူအရပ်ဝတ်နဲ့ နေတာမျိုးတွေ ကျနော်တို့တော့ မဖြစ်စေချင်ဘူး။ ကိုယ့်အဝတ်စားနဲ့ကိုယ်ဝတ်ပြီး ချ အဲ့ဆိုကျနော်တို့က သည်းသည်းကွဲကွဲဖြစ်တယ်ဗျာ။ ဒါရန်သူလား၊ မိတ်ဆွေလားဆိုတာ တချို့က အရပ်ဝတ်နဲ့ လွှတ်တဲ့အခါကြတော့ ဘယ်အဖွဲ့မှန်းလည်းမသိ။ လက်နက်ကိုင်ဆောင်ထားခြင်း မရှိတဲ့အရပ်သား သာမန်ပြည်သူတွေက ကြားထဲမှာ ထိခိုက်တာတွေရှိပါတယ်“ ဟု ၎င်း ဒေသခံ က ပြောသည်။

ပြီးခဲ့သည့် အောက်တိုဘာ ၂၀ ရက်မှစတင်ပြီး PDF စိုးမိုးနယ်မြေမှုကြောင့် ဗန်းမောက်မြို့နယ် မံယူးကြီး ကျေးရွာရှိ ဆေးရုံ၊ဆေးခန်းများကို စစ်ကောင်စီတပ်မှ တိုက်လေယာဉ်ဖြင့် ဗုံးကြဲတိုက်ခိုက်ခဲ့ရာ ပြည်သူတစ်ဦး သေဆုံးခဲ့ပြီး ဆေးရုံ၊ ဆေးခန်းများလည်း ပျက်စီးခဲ့ကြောင်းသိရသည်။