သျှမ်းပြည်တောင်ပိုင်း ပင်လောင်းမြို့နယ် လွယ်ကျိုင်းကျေးရွာရောက် စစ်ဘေးရှောင်များသည် ဆေးကုသမှု အတွက် အခက်အခဲ ကြုံတွေ့နေရကြောင်း သတင်း သိရသည်။
ပြီးခဲ့သည့် အောက်တိုဘာ လကုန်ပိုင်းမှ စတင်ကာ လွယ်ကျိုင်းကျေးရွာသို့ ရောက်ရှိနေသည့် စစ်ရှောင် ၄၀၀ ကျော် သည် ဖယ်ခုံ၊ မိုးဗြဲ နှင့် ကရင်နီပြည်ဘက်မှ ထွက်ပြေးလာသည့် သူများဖြစ်ကြောင်း သိရသည်။
လက်ရှိမှာ ရာသီဥတု အပြောင်းအလဲကြောင့် ဖျားနာကြပြီး ဆေးကုသမှုနှင့် အစာအာဟာရ အတွက် ခက်ခဲနေကြောင်း လွယ်ကျိုင်းရောက် အသက် ၅၀ ကျော်အရွယ်ရှိ စစ်ရှောင်အမျိုးသား တစ်ဦးက သျှမ်းသံတော်ဆင့်ကို ပြောသည်။
“စစ်ရှောင် ဦးရေ ၄၀၀ ကျော်မှာ ၇၀ ရာခိုင်နှုန်းလောက်က ကလေးရော လူကြီးရော ဖျားနာနေကြပါတယ်၊ အိမ်သားတစ်ယောက်က စဖျားပြီဆိုရင်လည်း ကျန်တဲ့မိသားစုဝင်တွေလည်း ဆက်ဖျားကြတာ၊ ဆေးဝါးတွေ ဝယ်ဖို့လည်း ငွေကြေးမရှိမဲ့ ရှိမဲ့တွေစုပြီး ဆေးဝယ်ရတာလည်း တော်တော်ကို ခက်ခဲတယ်” ဟု လွယ်ကျိုင်းရောက် စစ်ရှောင်က ပြောသည်။
ထို့အပြင် လက်ရှိ ဆောင်းရာသီ ဝင်လာပြီဖြစ်သဖြင့် ကလေးငယ်များ နှင့် သက်ကြီးရွယ်အိုများအတွက် အနွေးထည် နှင့် စောင်များက မလုံလောက်ကြောင်း သိရသည်။
လွယ်ကျိုင်းရောက် စစ်ဘေးရှောင်များသည် ကျေးရွာအတွင်း နှင့် အနီးပတ်ဝန်းကျင်ရှိ မြေမြှုပ်မိုင်း အန္တရာယ်၊ စစ်ကောင်စီတို့ တပ်စခန်းချထားသည့် အန္တရာယ်တို့ကြောင့် နေရပ် မပြန်နိုင်သေးကြောင်းလည်း အထက်ပါ စစ်ရှောင်အမျိုးသားက ဆက်ပြောသည်။
“တချို့ရွာတွေထဲကို စကစ က ပြည်သူအိမ်ထဲ နေရာယူပြီး တပ်စခန်းချထားတာတွေ၊ မြေမြှုပ်မိုင်း ချိန်ထားတာတွေ ရှိနေတာ ကြားရလို့ မပြန်ရဲသေးဘူး၊ ပြန်တော့ ပြန်ချင်တာပေါ့၊ စစ်ရှောင် နေရလည်း စားဝတ်နေရေးတွေ လုပ်ကိုင်စားသောက်ဖို့တွေက အဆင်ပြေဘူး” ဟု လွယ်ကျိုင်းရောက် စစ်ရှောင် အမျိုးသမီးတစ်ဦး က ပြောသည်။
စစ်ဘေးရှောင်များသည် ရပ်ရွာအတွင်း နေ့စားလိုက်ခြင်း နှင့် အပိုဝင်ငွေ ရှာဖွေစားသောက်သော်လည်း အလုပ်ခွင် မှ လူဦးရေ ကန့်သတ်ထားခြင်း၊ အလုပ်က နေ့တိုင်းမရှိခြင်းတို့ကြောင့် ခက်ခဲရကြောင်းလည်း စစ်ရှောင် များက ပြောသည်။
လက်ရှိတွင် အလှူရှင်များ လှူဒါန်းထားသည့် ရိက္ခာများနှင့် ရှာဖွေစုဆောင်းထားသည့် ရိက္ခာများကိုသာ ချွေတာ သုံးစွဲနေရသည့်အတွက် အချိန်တို အတွင်းရိက္ခာပြတ်သွားနိုင်ကြောင်းလည်း သိရသည်။
ယင်းကဲ့သို့ ဖြစ်နေသည့် အခက်အခဲများကြောင့် စစ်ရှောင်များအတွက် အလုပ်အကိုင် အခွင့်အလမ်းများ ဖန်တီးရန် တောင်းဆိုလိုကြောင်းလည်း စစ်ရှောင်များက ပြောသည်။
ထို့ပြင် စစ်ကောင်စီ တပ်ဖွဲ့သည်လည်း သျှမ်းပြည်အတွင်းရှိ စစ်ရှောင်များကို နေရပ်ပြန်ရန် ဖိအားပေးမှုများလည်း ရှိနေကြောင်း သိရသည်။
