ကချင်ပြည်နယ် မိုးမောက်မြို့တွင် စစ်ကောင်စီတပ်ဖွဲ့ နှင့် ကချင်လွတ်လပ်ရေး တပ်မတော် KIA နှင့် ပူးပေါင်းတပ်ဖွဲ့ PDF တို့ တိုက်ပွဲပြင်းထန်မှုကြောင့် အမျိုးသမီး ၂ ဦး သေဆုံးခဲ့ရပြီး အမျိုးသမီး ၄ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရှိရသည်။

အောက်တိုဘာ ၂၆ ရက်မှ စတင်ပြီး စစ်ကောင်စီတပ်ဖွဲ့ နှင့် ကချင်လွတ်လပ်ရေး တပ်မတော် KIA နှင့် ပူးပေါင်း တပ်ဖွဲ့ PDF တို့ တိုက်ပွဲပြင်းထန်ပြီး စစ်ကောင်စီတပ်ဖွဲ့မှ လက်နက်ကြီးဖြင့် ရမ်းသမ်းပစ်ခတ်ရာ အမျိုးသမီး ၂ ဦး သေဆုံးခဲ့ပြီး အမျိုးသမီး ၄ ဦးမှာ ထိခိုက်ဒဏ်ရာရရှိခဲ့ကြောင်း မိုးမောက် ဒေသခံတစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီ ပစ်ခတ်လိုက်တဲ့ လက်နက်ကြီးတစ်လုံးက ယာခင်းထဲမှာ ရှိတဲ့အမျိုးသမီး ၂ ယောက်ရဲ့အနီးမှာ ကျရောက် ပေါက်ကွဲသွားတယ်။ ဆုံးသွားတဲ့ အမျိုးသမီးက ပိုင်းဝမ်းက ဒေသခံဘဲ။ လွန်ခဲ့တဲ့ ၂ ရက် လောက်ကလည်း မြို့ပေါ်မှာရှိတဲ့ ချတ် (ဘုရားရှိခိုးကျောင်း) ကျောင်းမှာ စစ်ကောင်စီရဲ့ လက်နက်ကြီး ထပ်ကျလို့ ၇ တန်းကျောင်းသူ၊ အသက် ၅၀ နှစ်ခန့် အမျိုးသမီး နဲ့ နောက်ထပ် အမျိုးသမီး၂ ယောက်က ထိခိုက်ဒဏ်ရာရသွားတယ်” ဟု ၎င်း ဒေသခံတစ်ဦးက ပြောသည်။

အဆိုပါ လက်နက်ကြီး ကျရောက်ပေါက်ကွဲမှုကြောင့် ထိခိုက်ဒဏ်ရာရရှိခဲ့သော အမျိုးသမီး ၄ ဦးအနက် အသက် ၅၀ နှစ်အရွယ်ရှိ အမျိုးသမီးတစ်ဦးကို မိုးမောက်ပြည်သူ့ဆေးရုံတွင် ပို့ဆောင်ထားပြီး ကျန်သည့် အမျိုးသမီး ၃ ဦးကို မိုးမောက်ဆေးရုံမှာ ဆေးဝါးကုသမှု ခံနေရကြောင်း သိရသည်။

ထို့အပြင် စစ်ကောင်စီတပ်ဖွဲ့ နှင့် ကချင်လွတ်လပ်ရေးတပ်မတော် KIA နှင့် ပူးပေါင်းတပ်ဖွဲ့ PDF တို့ တိုက်ပွဲဖြစ်ပွားမှုကြောင့် ပိုင်းဝမ်းရွာ၊ နောင်တောင်းရွာ၊ လုံကြာရွာ နှင့် ဝမ်ကျေးရွာ အတွင်းရှိ ဒေသခံ ပြည်သူ (၆၀၀) ကျော်သည် မြို့ပေါ်ရှိ တိမ်မဟာကျောင်း နှင့် ကျေးရွာ အနီးနားရှိ ဘုန်းကြီးကျောင်းသို့ ထွက်ပြေး တိမ်းရှောင်လာခဲ့ရကြောင်း သိရသည်။

“ကျေးရွာထဲမှာက ပြည်သူ့ကာကွယ်ရေးတပ်ဖွဲ့ PDF စခန်း ချထားတာတော့မရှိပါဘူး။ သူတို့ စခန်းချထားတာက တောင်ပေါ် ဒေသမှာပါ။ စစ်ကောင်စီတပ်က လက်နက်ကြီးတွေနဲ့ တစ်ဖက်သတ် ရမ်းသမ်းပစ်ခတ်တာ။
ကျေးရွာ ဒေသခံ (၆၀၀) ကျော်က မိုးမောက်မြို့ပေါ် တိမ်မဟာကျောင်း နဲ့ တိုက်ပွဲမရှိတဲ့ ကျေးရွာဘက်ကဘုန်းကြီးကျောင်းတွေမှာ ခိုလှုံလာရတယ်။ ပြီးတော့ (၃) မိုင် စစ်ရှောင်စခန်း နဲ့ ဆွေမျိုးတွေဆီ ခိုလှုံရတာလည်း ရှိတယ် “ ဟု ၎င်း အထက်ပါ ပုဂ္ဂိုလ်တစ်ဦးက ဆက်ပြောသည်။

အောက်တိုဘာ ၂၀ ရက်မှ စတင်ပြီး စစ်ကောင်စီတပ်ဖွဲ့ နှင့် ကချင်လွတ်လပ်ရေး တပ်မတော် KIA နှင့် ပူးပေါင်းတပ်ဖွဲ့ PDF တို့ အပြန်အလှန် တိုက်ပွဲဖြစ်ပွားခဲ့ပြီး ယနေ့အချိန်ထိ တိုက်ပွဲဆက်လက် ဖြစ်ပွားနေကြောင်း သိရသည်။

ယမန်နေ့ အောက်တိုဘာ ၃၀ ရက် ညပိုင်းအချိန်တွင်လည်း စစ်ကောင်စီတပ်ဖွဲ့နှင့် ကချင်လွတ်လပ်ရေး တပ်မတော် KIA နဲ့ ပူးပေါင်းတပ်ဖွဲ့ PDF တို့ တိုက်ပွဲ ဆက်လက်ဖြစ်ပွားပြီး စစ်ကောင်စီဘက်မှ လက်နက်ကြီးဖြင့် အဆက်မပြတ် ပစ်ခတ်နေသည့် အသံများကို ထပ်မံကြားနေရကြောင်း သိရသည်။