သျှမ်းပြည်အရှေ့ပိုင်း တာချီလိတ်မြို့ ဆန်ဆိုင်း (ခ) ရပ်ကွက်အတွင်း နေအိမ်တစ်လုံးမှာ သေဆုံးနေသည့် အမျိုးသမီး အလောင်း တစ်လောင်းတွေ့ရှိကြောင်း သတင်းသိရသည်။

ပြီးခဲ့သည့် အောက်တိုဘာ ၂၈ ရက်နေ့ ညနေ ၅ နာရီဝန်းကျင်တွင် ဆန်ဆိုင်း (ခ) ရပ်ကွက်ရှိ နေအိမ်တစ်ခု အတွင်းမှ အပုပ်နံ့များ ထွက်နေကြောင်း အိမ်နီးချင်းများမှ ရဲစခန်းသို့ ဖုန်းဆက်အကြောင်းကြားရာ ရဲတပ်ဖွဲ့တို့မှ သွားရောက်စစ်ဆေးပြီး သေဆုံးနေသည့် အမျိုးသမီးအလောင်း တစ်လောင်း တွေ့ရှိခဲ့ကြောင်း ဒေသခံများက ပြောသည်။

“ဘယ်နေ့ကတည်းက သေနေလည်းတောင် မသိပါဘူး၊ အလောင်းက ပုပ်ပွပြီး အနံ့လည်းထွက်၊ လောက်ကောင် တွေလည်း တက်နေပြီ၊ ရဲစခန်းက လာစစ်ပြီး လူမှုကူညီရေး အသင်းကို အလောင်းလာသယ်ပေးဖို့ပြောလိုက်တာ၊ သူ့မှာ အိမ်ထဲ တစ်ယောက်တည်းနေတာလို့ သိရတယ်” ဟုဆန်ဆိုင်း (ခ) ရပ်ကွက်မှ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

အလောင်းကို ဦးလှမိုး လူမှုကူညီရေး ပရဟိတအသင်းမှ လာရောက်သယ်ဆောင်သွားပြီး သေဆုံးသူ အမျိုးသမီး သည် အသက် (၅၅) နှစ်အရွယ် ပါနန်းအွေ့ ဖြစ်ကြောင်း သိရသည်။

ယင်းကိစ္စဖြစ်စဥ်နှင့် ပတ်သက်ပြီး ပရဟိတ အသင်းကို ဆက်သွယ်မေးမြန်းရာ အလောင်းပုပ်ပွနေသည့် ဒဏ်ရာ ဒဏ်ချက်များလည်း မတွေ့ရကြောင်း သျှမ်းသံတော်ဆင့်ကို ပြောသည်။

“ကျနော်တို့ကို ရဲစခန်းက ဖုန်းဆက်အကူညီတောင်းလာလို့ ရောက်သွားတဲ့အချိန်မှာ အလောင်းက လောက်ကောင် တွေ အနံတွေနဲ့ မို့လို့ ဒဏ်ရာဒဏ်ချက်တွေ မတွေ့ရဘူး၊ သိမ်းစရာရှိတာ သိမ်းဆည်းပြီး အလောင်းကို တာချီလိတ် ခရိုင် ပြည်သူ့ဆေးရုံကို ပို့ပေးလိုက်တယ်” ဟု ဦးလှမိုး လူမှုကူညီရေး ပရဟိတ အသင်းမှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

တာချီလိတ်မြို့တွင်းတွင် လူသူမသိ သေဆုံးသည့် ဖြစ်စဥ်များ၊ ရက်လွန်မှ သေဆုံးကြောင်း သိရသည့် ဖြစ်စဥ်များ မကြာခဏရှိသည့်အတွက် သက်ကြီးရွယ်အိုများနှင့် ရောဂါအခံ ရှိသူများ တစ်ဦးတည်း မနေသင့်ကြောင်း ပရဟိတအသင်းမှ တာဝန်ရှိသူက ပြောဆို သုံးသပ်ထားသည်။

ထို့အပြင် သျှမ်းပြည်မြောက်ပိုင်း လားရှိုးမြို့နယ် နှင့် မူဆယ်မြို့နယ် တို့တွင်လည်း ယခု အောက်တိုဘာလအတွင်း ပိုင်ရှင်မဲ့ အလောင်း နှင့် အသတ်ခံရပြီး သေဆုံးနေတဲ့ အလောင်းတွေ များလာကြောင်း ဒေသအတွင်း ပရဟိတသမား များထံမှ သိရသည်။