သျှမ်းပြည်တောင်ပိုင်း ဆီဆိုင်မြို့နယ်ရှိ စစ်တပ်မှ ဒေသခံ တောင်သူများထံ လယ်ယာမြေသိမ်းထားပြီး တောင်သူများကို အမှုဖွင့်ခြင်း၊ ဒဏ်ငွေ ပေးဆောင်ရခြင်းများကို ရင်ဆိုင်နေရကြောင်း စုံစမ်းသိရှိရသည်။
ပြီးခဲ့သည့် အောက်တိုဘာ (၂၇) ရက်နေ့က ဆီဆိုင်မြို့နယ်ရှိ တရားရုံးမှ တောင်သူ ၃၇ ဦးကို စစ်တပ် မှ ပုဒ်မ (၄၄၇) ၊ နယ်မြေပိုင် ကျုးကျော်မှုဖြင့် တရားဆွဲဆိုခဲ့ပြီး တောင်သူ တစ်ဦးကို ကျပ်ငွေ ၁ သောင်းကျပ်ဖြင့် ဒဏ်ငွေရိုက်ခဲ့ကြောင်း လယ်မြေသိမ်းဆည်းခံထားရသော တောင်သူတစ်ဦးက သျှမ်းသံတော်ဆင့်ကို ပြောသည်။
“မနေ့က ကျနော်တို့ တောင်သူတွေကို ပုဒ်မ ၄၄၇ နဲ့ တရားဆွဲလိုက်တယ်။ ပြီးတော့ ကျနော်တို့ မြေပိုင်ရှင် တောင်သူ ၇၃ ယောက်ကိုလည်း၊ စစ်တပ်က တစ်ယောက်ကို ၁ သောင်းဆီ ဒဏ်ငွေ ရိုက်ခဲ့တယ်။ ဒီ လယ်ယာမြေ တွေက စစ်တပ်နယ်မြေ မဟုတ်ပါဘူး။ ကျနော်တို့ တောင်သူတွေရဲ့ လယ်ယာမြေတွေပါ။ သူတို့က အတင်းအဓမ္မ သိမ်းယူထားခဲ့တာ “ ဟု ၎င်း တောင်သူ အမျိုးသား တစ်ဦးက ပြောသည်။
လက်ရှိတွင် ခမရ (၄၂၃/၄၂၄) တပ်ရင်းမှ တောင်သူများ၏ လယ်မြေယာ ဧကပေါင်း (၂,၂၀၀) ကို အဓမ္မ သိမ်းဆည်း ထားကြောင်းလည်း ၎င်းက ဆက်ပြောသည်။
စစ်တပ်မှ သိမ်းဆည်းထားသော လယ်ယာမြေ ဧကပေါင်း (၂,၂၀၀) မှာ ခမရ (၄၂၃/၄၂၄) တပ်ရင်းအနီးတွင် ရှိပြီး လမ်းမကြီး၏ အရှေ့ဘက် လယ်ယာမြေ (၃၀၀) ဧက နှင့် လမ်းမကြီး၏ အနောက်ဘက်ရှိ လယ်မြေယာ (၁,၉၀၀) ဧက တို့ဖြစ်ကြောင်း သိရသည်။
“ လမ်းမကြီးရဲ့ အရှေ့ဘက်ကရှိတဲ့ လယ်ယာတွေကတော့ ကျနော်တို့ သွားလုပ်စားလို့ မရပါတော့ဘူး။ အဲ့မြေထဲမှာ မြေမြှုပ်မိုင်းတွေ မြုပ်ထားတယ်လို့ စစ်တပ်က တရားဝင် စာထုတ်ထားတယ်။ ကျနော်တို့ လယ်ယာမြေမှာ လုပ်စားလို့မရတော့ အခု နေ့စားလိုက်နေရတယ်။ အခု နိုင်ငံရေး အခြေနေနဲ့ ကျနော်တို့ အရမ်းခက်ခဲနေတယ် “ ဟု နယ်မြေသိမ်းခံထားရသော အမျိုးသား တစ်ဦးက ပြောသည်။
၁၉၉၂ ခုနှစ် စစ်တပ်ရောက်ရှိလာပြီး နောက်ပိုင်း ခမရ (၄၂၃/၄၂၄) တပ်ရင်းများမှ ပြည်ထောင်စု လမ်းမကြီး၏ အရှေ့ဘက်သို့ နေရာခြေကုတ်ယူခဲ့ပြီး တဖန် စစ်တပ်မှ လမ်းအနောက်ဘက်သို့ ထပ်မံနေရာခြေကုတ် ပြန်ယူပြီး တပ်ရင်းတည်ဆောက်ခဲ့ရာ လမ်းကြီးအရှေ့ဘက်ရှိ လယ်ယာမြေ ဧကပေါင်း (၅၀၀) နှင့် လမ်းနောက်ဘက်ရှိ ဧကပေါင်း (၁,၉၀၀) ကိုအဓမ္မ သိမ်းဆည်းသွားကြောင်း သိရသည်။
Leave a Comments