သျှမ်းပြည်မြောက်ပိုင်း နမ္မတူမြို့နယ် မိုင်းယုတ်အုပ်စု ကုန်းဆာယာကျေးရွာတွင် လင်မယားချင်းရန်ဖြစ်ပြီး အမျိုးသားဖြစ်သူက အမျိုးသမီးကို ပုဆိန်ဖြင့် ရိုက်ပေါက်ခဲ့ကြောင်း သတင်းသိရသည်။
ပြီးခဲ့သည့် အောက်တိုဘာ ၂၂ ရက်နေ့ မနက် ၈ နာရီဝန်းကျင်တွင် ကုန်းဆာယာကျေးရွာမှ အရက်မူး နေသည့် အမျိုးသားတစ်ဦးသည် ၎င်း၏ ဇနီးဖြစ်သူ နှင့် ရန်ဖြစ် စကားများပြီး ပုဆိန်ဖြင့် ဦးခေါင်းကို ရိုက်ပေါက် လိုက်ကြောင်း ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“သူက အရက်မူးလာပြီး သူ့ရဲ့ အမျိုးသမီးဖြစ်သူနဲ့ စကားများ ရန်ဖြစ်ပြီးတော့ အမျိုးသားဖြစ်သူက သူ့မိန်းမ ကို ပုဆိန် နဲ့ ပေါက်လိုက်တာ၊ အမျိုးသမီးက ရှောင်ထွက်တာ မြန်လို့ တော်သေးတယ်။ ဒဏ်ရာ သိပ်မပြင်းဘူး၊ သွေးထွက်တာတော့ရှိတယ်” ဟု အထက်ပါ အမျိုးသမီးက ပြောသည်။
အဆိုပါ အမျိုးသမီးမှ အကူအညီတောင်းမှုကြောင့် ပတ်ဝန်းကျင် အိမ်နီးချင်းများ ရောက်ရှိလာကာ အမျိုးသားကို ဖမ်းဆီးထားပြီး TNLA တပ်ဖွဲ့ကို အပ်ထားလိုက်ကြောင်း သိရှိရသည်။
အမျိုးသမီး ဦးခေါင်း၏ ဒဏ်ရာသည် မစိုးရိမ် ရသော်လည်း သွေးထွက်များသည့်အတွက် ကျေးလက်ဆေးပေးခန်းရှိ သူနာပြုများထံမှ ဆေးကုသမှု ခံယူခဲ့ကြောင်း ဒေသခံများ ထံမှ သိရသည်။
“အမျိုးသမီး ဖြစ်သူကလည်း ဖြစ်စဥ်တွေနဲ့ ရွာလူကြီးကို တိုင်တယ်လေ၊ ရွာလူကြီးကနေ အမျိုးသားကို ဖမ်းပြီး TNLA ကို အပ်လိုက်တာ၊ အခု TNLA တပ်ဖွဲ့က ထိန်းချုပ်ထားတယ်၊ အမျိုးသမီး ဒဏ်ရာကိုတော့ ဆေးထည့် ပေး ထားတယ်” ဟု အထက်ပါ ပုဂ္ဂိုလ်က ပြောသည်။
ယင်းဖြစ်စဥ် နှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) အနေဖြင့် ကျူးလွန်သူ အမျိုးသားကို မည်ကဲ့သို့ အပြစ်ပေး အရေးယူမည်ကို ဆက်သွယ်မေးမြန်းပေမယ့် အဆက်အသွယ် မရခဲ့ပေ။
ပြီးခဲ့သည့် အောက်တိုဘာ ၉ ရက်တွင်လည်း ကွတ်ခိုင်မြို့နယ် ဟိုနောင်ကျေးရွာ မှ အမျိုးသားတစ်ဦး အရက်မူးပြီး မိခင်ကို ပြန်ရိုက်နှက်သောကြောင့် ဦးခေါင်းပေါက်ကွဲဒဏ်ရာရရှိသည့် ဖြစ်စဉ်ရှိခဲ့ဖူးကြောင်း သတင်း သိရသည်။
