သျှမ်းပြည်တောင်ပိုင်း လင်းခေးမြို့နယ်အတွင်း ဒေသခံ ပြည်သူများ ရာသီတုပ်ကွေး ဖြစ်ပွားမှု များပြားနေကြောင်း သတင်းသိရသည်။
အောက်တိုဘာလဆန်းပိုင်းမှ စတင်ကာ လင်းခေးမြို့နယ်အတွင်းရှိ ဒေသခံပြည်သူများက ရာသီတုပ်ကွေးဖြစ်ပြီး နှာစေး၊ ချောင်းဆိုး၊ အဖျားတက်သူ များပြားသဖြင့် ဆေးရုံ နှင့် ဆေးပေးခန်းများ၌ လူနာများ နေ့တိုင်းပြည့်နေကြောင်း ဒေသခံအမျိုးသား တစ်ဦးက သျှမ်းသံဝောာ်ဆင့်ကို ပြောသည်။
“တစ်အိမ်လုံး ဖျားနေကြတာလည်းရှိတယ်၊ တခါဖြစ်ရင် လူတစ်ယောက်က အနည်းဆုံး ၃/၄ ရက်လောက် ဖျားတာ၊ ရာသီဥတု အပြောင်းအလဲကြောင့် အေးလိုက် ပူလိုက် မိုးရွာလိုက်ဆိုတော့ ဖျားနာကြတာလေ၊ ဆေးရုံ ဆေးခန်းကို ရောက်လာတဲ့ လူနာတွေ နေ့တိုင်း ဆေးခန်းအပြည့်ပဲ၊ ဆေးထိုး ဆေးသောက် နဲ့ ၃ ရက်လောက်ဆို အဖျားကျပြီ” ဟု အထက်ပါ အမျိုးသားက ပြောသည်။
လက်ရှိ အချိန်တွင် လင်းခေးမြို့ရှိ ဘုန်းတော်ကြီးကျောင်း စာသင်တိုက်တစ်တိုက်ရှိ သံဃာတော်များ တစ်ကျောင်းလုံးနီးပါး ဖျားနာနေကြကြောင်း ဦးဇင်းတစ်ပါးက သျှမ်းသံတော်ဆင့်ကို မိန့်သည်။
“သူ့ ရာသီကျလာလို့ ဖြစ်ကြတယ်လို့ပဲ မှတ်ယူလိုက်ရတယ်၊ ရပ်ရွာထဲက ဒကာ ဒကာမတွေမှ မဟုတ်ဘူး၊ ဦးဇင်း တို့ ကျောင်းမှာလည်း တစ်ကျောင်းလုံးနီးပါး ဖျားနာ ကြပြီးတော့၊ ဆေးထိုးဆေးသောက်လိုက်ရင် ပြန်သက်သာလာရော၊ ကိုဗစ် နဲ့ ဆိုင်လား မဆိုင်ဘူးလားတော့ မသိဘူး။ အတတ်နိုင်ဆုံးတော့ ကိုယ့်ကိုယ်ကို ကာကွယ်ကြပေါ့” ဟု ဦးဇင်းက မိန့်သည်။
ရာသီတုပ်ကွေးမိ ဖျားနာသူများ၏ ရောဂါ အခြေအနေသည် တစ်ကိုယ်လုံး အကိုက်အခဲ ဖြစ်နေပြီး နှာစေး၊ ချောင်းဆိုး၊ ကိုယ်ပူ စသည်ဖြင့် တွေ့ရကြောင်း သိရသည်။
ထို့အပြင် ရာသီ တုပ်ကွေးသည် တစ်ဦး နှင့် တစ်ဦး ကူးစက်နိုင်ပြီး အိမ်သား တစ်ဦး စတင် ဖျားပါက တခြား မိသားစုဝင်များလည်း အဖျားကူးနိုင်သည့်အတွက် သတိထားသင့်ကြောင်း သိရသည်။
