သျှမ်းပြည်အတွင်းရှိ အကျဥ်းထောင်များသို့ ထောင်ဝင်စာတွေ့ခွင့်ကို စစ်ကောင်စီတပ်ဖွဲ့မှ ရက်အကန့်အသတ်မရှိ ပိတ်သိမ်းလိုက်ကြောင်း စုံစမ်းသိရှိရသည်။
ယနေ့ အောက်တိုဘာ (၂၀) ရက်မှ စတင်ပြီး စစ်ကောင်စီက သျှမ်းပြည်တွင်း သာမက မြန်မာနိုင်ငံတွင်းရှိ အကျဥ်းထောင်များအားလုံးကို ထောင်ဝင်စာ တွေ့ခွင့် ပိတ်ပင်ထားကြောင်း စုံစမ်းသိရှိရသည်။
“လူတွေ့ ခွင့်က အာဏာသိမ်းပြီးကတည်းက စစ်ကောင်စီတွေက ပိတ်ထားတယ်၊ ရှေ့နေ လောက် နဲ့ ပဲ တွေ့ခွင့်ရကြတာ၊ အခုတော့ ထောင်ဝင်စာတွေ့ခွင့် ပါ ပိတ်လိုက်တော့ လူတွေ့နိုင်ဖို့လည်း ဝေးတာပေ့ါ ၊ အကျဥ်းထောင်မှ မဟုတ်ဘူး၊ အချုပ်ခန်းတွေမှာလည်း ထောင်ဝင်စာပို့လို့ မရတော့ဘူး၊ အကျဥ်း ဦးစီးဌာနဘက်ကလည်း ပြောထားတယ်” ဟု တောင်ကြီးမြို့မှ ရှေ့နေတစ်ဦးက ပြောသည်။
ယမန်နေ့ အောက်တိုဘာလ ၁၉ ရက် ရန်ကုန်မြို့ အင်းစိန် အကျဉ်းထောင် ဗုံးပေါက်ကွဲမှု ဖြစ်ပွားပြီးနောက် နိုင်ငံရေး အကျဉ်းကျ ခံနေရသူများ ရှိနေသည့် အကျဥ်းထောင်များတွင် ထောင်ဝင်စာ ပါဆယ်ပေး ပို့မှုကို ရပ်ဆိုင်းလိုက်ခြင်းဖြစ်ကြောင်း ၎င်းက ဆက်ပြောသည်။
ယင်းကဲ့သို့ ထောင်ဝင်စာ ပိတ်ပင်တားဆီးခြင်းသည် အကျဥ်းကျ ခံနေရသူများ၏ အခြေအနေကို မသိရှိနိုင်သည့်အပြင် ၎င်းတို့အတွက် စိုးရိမ်ရကြောင်းလည်း သိရသည်။
“ထောင်ကကျွေးတဲ့ အစာအာဟာရတွေက လောက်ရဲ့ လားပေါ့၊ ပြီးတော့ အထဲရောက်နေတဲ့ ကိုယ့်လူတွေဆီကို စာလေး နဲ့ အဆက်အသွယ်ရခဲ့ရင် တမျိုးကောင်းသေးတယ်လေ၊ အခုတော့ ထောင်ဝင်စာလည်း ပို့လို့မရတော့၊ အထဲရောက်နေတဲ့ သူတို့ အခြေအနေကို စိတ်ပူတာတော့ ရှိပါတယ်” ဟု လားရှိုးမြို့နယ်မှ အမည်မဖော်လိုသူ အကျဥ်းသား တစ်ဦး၏ မိတ်ဆွေက သျှမ်းသံတော်ဆင့်ကို ပြောသည်။
စစ်တပ်မှ နိုင်ငံတော် အာဏာသိမ်းယူပြီး နောက်ပိုင်း သျှမ်းပြည်အတွင်းမှ အရပ်ဘက် အဖွဲ့အစည်း ခေါင်းဆောင်များ၊ အရပ်သားများ၊ နိုင်ငံရေး တက်ကြွ လှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများ နိုင်ငံရေး အကျဥ်းသား စုစုပေါင်း ခန့်မှန်းဦးရေ (၅၀၀) ကျော် ရှိနေကြောင်း အောက်တိုဘာ (၁၉) ရက်က AAPP ထုတ်ပြန်ချက် အရ သိရသည်။
