သျှမ်းပြည်မြောက်ပိုင်း မူဆယ်မြို့ ၄၂၁ ခြေလျင်တပ်ရင်းမှ တပ်ရင်းမှူး တစ်ဦးသေနတ်ဖြင့် ပစ်သတ်ခံရကြောင်း စုံစမ်းသိရှိရသည်။
ယမန်နေ့ (အောက်တိုဘာ ၁၈) ရက် နေလည်ပိုင်းတွင် မူဆယ်မြို့ ၁၀၅ မိုင်ရှိ ကားဝပ်ရှော့ဆိုင်တစ်ခုသို့ ကားလာပြင်သည့် တပ်ရင်းမှူး ဒု – ဗိုလ်မှူးကြီး ပြည့်ဖြိုးအောင် ကို အမည်မသိလက်နက်ကိုင် လူနှစ်ဦးက သေနတ်ဖြင့် ၈ ချက်ထက်မနည်း လာရောက်ပစ်သတ်ခဲ့ကြောင်း မူဆယ်မြို့ ဒေသခံတစ်ဦးက သျှမ်းသံတော်ဆင့် ကို ပြောသည်။
“သူက မူဆယ်မြို့ကနေ ထွက်လာပြီး ၁၀၅ မိုင် ကားဝပ်ရှော့ဆိုင်မှာ ကားလာပြင်တာ။ နေ့လည်ပိုင်း ၁ နာရီခွဲ လောက်က ပစ်ခတ်ခံရတယ်။ အရပ်ရှည်ရှည်နဲ့ ပိန်ပိန်ပါးပါး လူနှစ်ယောက်က လာပစ်သွားတယ်။ ပစ်တာတော့ ၈ ချက် ထက်မနည်းဘူး “ ဟု ၎င်းဒေသခံ တစ်ဦးက ပြောသည်။
အဆိုပါ ပစ်ခတ်မှု ဖြစ်ပွားပြီးနောက် စစ်ကောင်စီဘက်က လူအင်အားအများအပြား ရောက်ရှိလာပြီး ညနေပိုင်း ၄ နာရီခွဲအချိန်ထိ စစ်ဆေးရေးမှု တင်းကြပ်ထားကြောင်း သိရသည်။
လက်ရှိတွင် စစ်ကောင်စီတပ်ဖွဲ့များက မူဆယ်မြို့ နှင့် ၁၀၅ မိုင်မှာ စစ်ဆေးရေးများ တင်းကြပ် ပြုလုပ်နေပြီး မူဆယ်မြို့ရှိ စစ်ကောင်စီ တပ်ရင်းမှူးများကို အခြားဒေသသို့ ပြောင်းရွှေ့ပြုလုပ်နေကြောင်း ဒေသခံတစ်ဦး ကပြောသည်။
“ဒီနေ့ထိ ၁၀၅ မိုင် နဲ့ မူဆယ်မြို့မှာ စစ်ဆေးရေး တင်းကြပ်နေတယ်။ မူဆယ်မြို့မှာတော့ ပိုပြီးတင်းကြပ် ထားတယ်။ မူဆယ်မြို့ တပ်ရင်းမှူးတွေကို နမ့်ဖက်ကာဘက် ပြောင်းရွှေ့နေတယ်။ နမ့်ဖက်ကာဘက် တပ်ရင်းမှူးကို မူဆယ်ဘက်မှာ ပြောင်းရွှေ့လာတယ် “ ဟု ၎င်းဒေသခံတစ်ဦးက ပြောသည်။
စစ်အာဏာသိမ်းပြီး ၁ နှစ်ကျော် ကာလမှာ သျှမ်းပြည်နယ် ဒေသအသီးသီးရှိ စစ်ကောင်စီ၏ လက်အောက်ခံ အရာရှိများ မကြာခဏ ပစ်သတ်ခံနေရကြောင်း သိရသည်။
ထို့အပြင် မူဆယ်မြို့နယ်တွင် စစ်ကောင်စီ လက်အောက်ခံ ပြည်သူ့စစ်အများအပြားရှိသည့် နယ်မြေဖြစ်ပြီး တအာင်း (ပလောင်) အမျိုးသား လွတ်မြောက်ရေး တပ်မတော် (TNLA)၊ ကချင်လွတ်မြောက်ရေး တပ်မတော် (KIA) နှင့် ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) တို့ လှုပ်ရှားသော နယ်မြေတစ်ခုလည်းဖြစ်ကြောင်း သိရသည်။
Leave a Comments