သျှမ်းပြည်မြောက်ပိုင်း မူဆယ်မြို့နယ်တွင် မူဆယ်မြို့မှ ပန်ဆန်းသွားသည့် လမ်းရှိ တုံခန်ကျေးရွာအနီးတွင် ဆိုင်ကယ်မောင်းနှင်လာသည့် အမျိုးသား တစ်ဦး လည်ပင်းကို ဓါးထိုးခံရပြီးနောက် ဆိုင်ကယ်လုယက်ခံရကြောင်း သတင်းသိရသည်။
ပြီးခဲ့သည့် အောက်တိုဘာလ ၁၃ ရက်နေ့ မွန်းလွဲပိုင်း ၂ နာရီဝန်းကျင်တွင် တုံခန်ကျေးရွာအနီး၌ အမည်မသိ ဆိုင်ကယ်တစ်စီး အမျိုးသား နှစ်ဦးမှ အထက်ပါ အမျိုးသား စီးနှင်းလာသည့် ဆိုင်ကယ်ကို လုယက်ယူပြီး လည်ပင်းလည်း ဓားဖြင့် ထိုးခဲ့ကြောင်း သတင်းသိရသည်။
“သူက လမ်းဘေးလှဲနေတဲ့အချိန် ဖြတ်သွားတဲ့သူတွေက ကူညီပြီး သူ့ကို ဆေးရုံပို့ခဲ့တာပါ၊ ဆိုင်ကယ်လုယက်ခံ ရတယ်၊ ဓားထိုးခံရတယ်ဆိုတာကို ကူညီတဲ့သူတွေကို ပြောပြလို့ သိရတာ၊ အခုသူက ဘယ်သူဆိုတာတော့ မသိရဘူး၊ မူဆယ်ဆေးရုံက လက်မခံလို့ မန္တလေးကို သဒ္ဓါဖြူစင် ပရဟိတအသင်းက ပို့ပေးလိုက်ရတယ်” ဟု အမည်မဖော်လိုသူ မူဆယ်မြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကိစ္စဖြစ်စဥ်များနှင့် ပတ်သက်ပြီး သဒ္ဓါဖြူစင် ပရဟိတအသင်းကို ဆက်သွယ်မေးမြန်းရာ လည်ပင်းမှ သွေးထွက်ဒဏ်ရာ များနေမှုကြောင့် မူဆယ်ဆေးရုံမှ မန္တလေးဆေးရုံသို့ ပို့ဆောင်ပေးလိုက်ရကြောင်း သျှမ်းသံတော်ဆင့်ကို ပြောသည်။
“ဖြစ်စဥ်အသေးစိတ်တော့ ကျနော်တို့ မသိရဘူး၊ ဆေးရုံက ဒီလူနာကို မန္တလေးကို ပို့ပေးပါ ဆိုလို့ ကျနော်တို့ မန္တလေးဆေးရုံကို ပို့ပေးလိုက်ရပါတယ်၊ လည်ပင်းက ဒဏ်ရာက တချက်တည်းပါ၊ ဒါပေမယ့် သွေးထွက်များ လို့ မန္တလေးဆေးရုံကို ပို့လိုက်ရတယ်ပြောတယ်” ဟု သဒ္ဓါဖြူစင် ပရဟိတအသင်းမှ တာဝန်ရှိသူတစ်ဦးက ပြောသည်။
မူဆယ်မြို့နယ်သည် မြန်မာ – တရုတ်နယ်စပ်မြို့ ဖြစ်သည့်အလျှောက် လူမျိုးပေါင်းစုံ ဝင်ထွက်သွားလာ လှုပ်ရှားနေလျက်ရှိပြီး လက်နက်ကိုင် အဖွဲ့အစည်းများလည်း ပေါများသည့် မြို့ဖြစ်သည်။
စစ်ကောင်စီမှ နိုင်ငံတော် အာဏာသိမ်း ယူပြီးနောက်ပိုင်းတွင် ဒေသအတွင်း တရားဥပဒေစိုးမိုးမှု ကင်းမဲ့လာပြီး လောင်းကစားဝိုင်းများနှင့်အတူ ဓားပြတိုက်မှုများလည်း နေ့စဥ်နီးပါးဖြစ်ပွားနေကြောင်း ဒေသခံများက ပြောဆိုလိုက်သည်။
