သျှမ်းပြည်တောင်ပိုင်း ညောင်ရွှေမြို့နယ် မိုင်းသောက်တိုက်နယ်တွင် မိုးသည်းထန်စွာ ရွာသွန်းသည့် အခါများ၌ တောင်ကျရေများကြောင့် လမ်းတံတားများ နှစ်မြုပ်ပြီး ပြည်သူများ သွားလာရေး ခက်ခဲနေကြောင်း သတင်းသိရသည်။
ညောင်ရွှေမြို့နယ် မိုင်းသောက်ကျေးရွာအုပ်စုတွင် အောက်တိုဘာ ၉ ရက်နေ့ မနက်ပိုင်းအချိန်က မိုးသည်းထန်စွာ ရွာသွန်းပြီး တောင်ကျရေများ စီးဆင်းလာမှုကြောင့် လမ်းများနှစ်မြုပ်ကာ သွားလာရေး ခက်ခဲ နေကြောင်း ဒေသခံများက ပြောသည်။
“မိုးကြီးလို့ ရေကြီးလာရင်ပဲဖြစ်ဖြစ်၊ တောင်ကျချောင်းရေတွေပဲ စီးကျလာလို့ ဖြစ်ဖြစ် လမ်းတွေက ရေမြုပ်သွားတယ်၊ အဲ့ဒါကြောင့် သွားလို့လာလို့ မရဘူး၊ ၉ ရက်နေ့က ဝါကျွတ်နေ့လည်း ဖြစ်တော့ တော်တော် အဆင်မပြေ ခဲ့ကြဘူး” ဟု မိုင်းသောက်တိုက်နယ် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ရေမြုပ်သွားသည့် လမ်းများသည် တောင်ကျရေများ စီးကျလာသည့်အခါတွင် ရေစီးချောင်းမရှိခြင်း နှင့် ရေကြီးသည့်အခါ ဖြတ်သွားလာနိုင်သည့် တံတားများ မရှိခြင်းတို့ ဖြစ်ရကြောင်း ဒေသခံများက ပြောသည်။
ထို့အပြင် ရေကြီး ရေလျှံမှုဖြစ်သည့် မိုင်းသောက်ကျေးရွာရှိ လမ်းကြောင်းသည် ညောင်ရွှေမြို့ နှင့် ချိတ်ဆက်ထားသည့် အပြင် အောင်ပန်း ၊ ကလော ၊ နေပြည်တော် သို့ ဆက်သွယ်ထားသည့် လမ်းကြောင်းဖြစ်ကြောင်းလည်း ဒေသခံအမျိုးသား တစ်ဦးက ဆက်ပြောသည်။
“ဒီလမ်းဟာ မိုင်းသောက်က ပြည်သူအတွက်ရော တခြားမြို့နဲ့ သွားရေးလာရေးရော အသုံးပြုရတဲ့လမ်းပါ၊ ဒါပေမဲ့ ချောင်းလည်းမရှိ၊ တံတားလည်းမရှိတော့ ရေကြီးလာရင် လမ်းကို မမြင်ရတော့ဘူး၊ မြုပ်သွားပြီ၊ ဒါကြောင့် ဖြစ်နိုင်ရင် ပုံစံကျကျ နဲ့ လမ်းတွေ တံတားတွေ ချောင်းတွေကို ဖော်ဆောင်လုပ်ပေးစေချင်ပါတယ်” ဟု အထက်ပါ ပုဂ္ဂိုလ်က ပြောသည်။
ယခုလို ရေကြီးရေလျှံမှုများသည် နှစ်စဥ်နှစ်တိုင်း မိုးရာသီ ကာလအတွင်း ကြုံတွေ့နေရပြီး သက်ဆိုင်ရာများထံ တင်ပြတောင်းဆိုထားသော်လည်း ဆောင်ရွက်ပေးခြင်း မရှိသေးကြောင်း ဒေသခံများက ပြောသည်။
