သျှမ်းပြည်တောင်ပိုင်း နမ့်စန်မြို့နယ် မြို့နယ်ဦးစီးမှူးရုံးတွင် ယခုလတွင်း မှတ်ပုံတင်သွားလုပ်ကြသူများကို ဦးစီးမှူးက တစ်ယောက်ကို ကျပ် (၂) သိန်းဆီတောင်းယူနေကြောင်း စုံစမ်းသိရှိရသည်။
ပြီးခဲ့တဲ့ရက်ပိုင်းတွင် အသက် (၁၈) နှစ်အောက် ကလေးမှတ်ပုံတင်ကို မြို့နယ်ဦးစီးမှူးရုံးသို့ သွားလုပ်ရင်း ဦးစီးမှူးက မြန်မာကျပ်ငွေ (၂) သိန်းယူခဲ့ကြောင်း ပိုက်ဆံမပေးဆောင်လျှင် မှတ်ပုံတင်မလုပ် ပေးကြောင်း နမ့်စန်ဒေသခံတစ်ဦးက သျှမ်းသံတော်ဆင့် ကိုပြောသည်။
“ ရုံးထဲကိုရောက်လာပြီဆိုရင် ပိုက်ဆံအရင်တောင်းတယ်။ ပိုက်ဆံမပါရင် မပြုလုပ်ပေးဘူး၊ ဘယ်လိုမှ ဖြေရှင်းလို့မရဘူး။ ဦးစီးမှူးကို (၂) သိန်းပေးလိုက်တော့ မှတ်ပုံတင်လည်း ရလာတယ် “ ဟု ၎င်းဒေသခံ တစ်ဦးက ပြောသည်။
ယခင်က မြို့နယ်ဦးစီးမှူးရုံးသို့ မှတ်ပုံတင်သွားလုပ်ရာတွင် ပိုက်ဆံတောင်းယူခြင်းရှိသော်လည်း အများအပြား တောင်ယူခြင်းမရှိခဲ့ကြောင်း စစ်အာဏာသိမ်းပြီးနောက်ပိုင်းမှာ ပိုက်ဆံပိုတောင်းယူလာနေကြောင်း သိရသည်။
ထို့ပြင် မြို့နယ် ဦးစီးမှူးကို မှတ်ပုံတင်လုပ်ခ မြန်မာကျပ်ငွေ (၂)သိန်းမပေးသည့်အတွက် (၅)လကြာသော်လည်း ဦးစီးမှူးမှ အကြောင်းပြချက်အမျိုးမျိုးဖြင့် မှတ်ပုံတင် မထုတ်ပေးသေးကြောင်း ကိုယ်တိုင်ကြုံတွေ့ရသည့် နမ့်စန်ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ မှတ်ပုံတင်လုပ်နေတာလည်း (၅) လရှိနေပြီ။ ဦးစီးမှူးက အကြောင်းပြချက် အမျိုးမျိုးပဲ၊ အထက်ကို တင်ထားတယ် မကျလာသေးလို့၊ မရသေးဘူးလို့ပဲ အကြိမ်ကြိမ် ပြောလာနေတယ်။ ဒီချိန်ကပိုက်ဆံ ရှာလို့ခက်တဲ့အချိန်မှာ စားဝတ်နေရေးအတွက်လည်း ဖြေရှင်းရသေး၊ သူတို့ကိုသိန်းနဲ့ချီပြီးပိုက်ဆံ မပေးနိုင်ဘူး “ ဟု နမ့်စန်ဒေသခံတစ်ဦးက ပြောသည်။
ထို့အတူ စစ်အာဏာသိမ်းပြီး (၂) နီးပါးကာလတွင် သက်ဆိုင်ရာ အာဏာပိုင်များကလည်း စားဝတ်နေရေး ကျပ်တည်းလာသည့်အတွက် ပြည်သူထံ၌ ပိုက်ဆံလိမ်လည် တောင်းယူခြင်းကို အရေးဆောင်ရွက်ပေးစေ လိုကြောင်း ဒေသခံများက တောင်းဆိုလိုက်သည်။
