သျှမ်းပြည်မြောက်ပိုင်း နမ္မတူမြို့နယ် ကုန်းကယားကျေးရွာ နှင့် ဆင်လီကျေးရွာတို့မှ စစ်ဘေးရှောင်ပြည်သူများ နေရပ်ပြန်သွားကြောင်း သတင်းသိရသည်။
ယနေ့ (အောက်တိုဘာလ ၅) ရက် နံနက်ပိုင်းတွင် နမ္မတူမြို့ပေါ်ရှိ ပုဗ္ပါရုံကျောင်းတိုက်သို့ ရောက်ရှိလာသည့် ကုန်းကယားရွာ နှင့် ဆင်လီရွာမှ ပြည်သူများ ပြန်သွားကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“အားလုံးက ဒီနေ့မနက်မှာပဲ ပြန်သွားကြပါတယ်၊ ကားတွေကို ငှားပြန်တဲ့သူရှိတယ်၊ ထော်လာဂျီနဲ့ ပြန်တဲ့သူတွေ ရှိတယ်။ ရွာတွေဘက်မှာ တိုက်ပွဲငြိမ်သွားလို့ ပြန်သွားကြတာတဲ့” ဟု အထက်ပါ ပုဂ္ဂိုလ်က ပြောသည်။
အဆိုပါ စစ်ဘေးရှောင် ပြည်သူတို့သည် စုစုပေါင်း (၃၀၀) နီးပါးခန့်ရှိနေပြီး ပြီးခဲ့သည့် စက်တင်ဘာလ ၂၈ ရက်တွင် ဖြစ်ပွားခဲ့သည့် စစ်ကောင်စီတပ် နှင့် ကချင်လွတ်မြောက်ရေး တပ်မတော် ပူးပေါင်းတပ်ဖွဲ့ KIA၊ PDF တို့ တိုက်ပွဲကြောင့် တစ်ပတ် ၇ ရက်ကြာအောင် စစ်ရှောင်ရောက်ရှိနေကြသူများဖြစ်သည်။
နမ္မတူမြို့နယ်မှ ကုန်းကယားကျေးရွာနှင့် ဆင်လီကျေးရွာတို့ဘက်တွင် တိုက်ပွဲများ ငြိမ်သက်သွားသော်လည်း နမ္မတူမြို့နှင့် ထိစပ်နေသည့် မန်တုံမြို့နယ်အတွင်းတွင် စစ်ကောင်စီတပ်နှင့် KIA၊ PDF တပ်တို့ တိုက်ပွဲပြင်းထန်နေသေးကြောင်းလည်း ဒေသခံများက ပြောသည်။
“ကျနော်တို့ နမ္မတူမြို့နယ်မှာ တိုက်ပွဲက ငြိမ်သွားလို့ စစ်ရှောင်တွေက နေရပ်ပြန်သွားကြပေမဲ့ ဒီကနေ ၁၄ မိုင်လောက်ပဲဝေးတဲ့ မန်တုံမြို့နယ်ဘက်မှာ တိုက်ပွဲက ဆက်ဖြစ်နေတယ်၊ မနေ့တိုက်ပွဲမှာ စစ်ကောင်စီတွေ လက်နက်ကြီးနဲ့ ပစ်လို့ (မန်တုံမြို့နယ်မှ) အိမ်တစ်လုံး ပျက်စီးရတယ်၊ ဒီနေ့လည်း ၅ နာရီကတည်းက ပစ်ခတ် သံတွေ ကြားနေရတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ဆက်ပြောသည်။
အာဏာသိမ်း စစ်ကောင်စီတပ်ဖွဲ့နှင့် KIA၊ PDF တို့သည် မန်တုံမြို့နယ် မြို့မရပ်ကွက်အနီး၌ တိုက်ပွဲများ ဆက်လက်ဖြစ်ပွားနေကြပြီး မန်တုံဘက်မှ ဒေသခံပြည်သူတချို့ နမ္မတူဘက် စစ်ရှောင်ထွက်ပြေးလာရကြောင်းလည်း သိရသည်။
ထို့အပြင် ပြီးခဲ့သည့် ၂၀၁၆ ခုနှစ်ကတည်းက နမ္မတူမြို့နယ်ဘက် စစ်ရှောင်ရောက်လာသည့် လက်ရှိတိုက်ပွဲပြင်းထန်နေသည့် မန်တုံမြို့နယ်မှ ပန်ကော်ရွာ၊ လွယ်စပိတ်ရွာ၊ လွယ်ကန်ရွာနှင့် လွယ်အန်ရွာမှ စစ်ရှောင်ဟောင်းများကို ယခုလ (အောက်တိုဘာလ) ၁၅ ရက် မတိုင်ခင် နေရပ်ပြန်ကြရန် စစ်ကောင်စီ လက်အောက်ခံ ထွေအုပ်မှ အမိန့်ညွှန်ကြားစာ ထုတ်ပြန်လာကြောင်းလည်း သိရသည်။
