Saturday, December 3, 2022

ကျောက်မဲမြို့နယ် လောင်းကစားဝိုင်းကြောင့် ပြည်သူများ အိပ်ရေးပျက်

Must read

သျှမ်းပြည်မြောက်ပိုင်း ကျောက်မဲမြို့နယ်အတွင်းတွင် ဖွင့်လှစ်နေသည့် လောင်းကစားဝိုင်းများ အသံဆူညံမှုကြောင့် ဒေသခံ ပြည်သူများ အိပ်ရေးပျက်နေရကြောင်း သတင်းသိရသည်။

ပြီးခဲ့သည့် အောက်တိုဘာလဆန်းပိုင်းမှ စတင်ပြီး ကျောက်မဲမြို့နယ် ကုန်းပေါင်းကျေးရွာအနီးရှိ မန္တလေး_ ကျောက်မဲ _ လားရှိုး ကားလမ်းမကြီးတွင် လောင်းကစားဝိုင်းအတွင်း စတိတ်ရှိုးများပါ ဖွင့်လှစ်သည့်အတွက် ပြည်သူများက အိပ်ရေးပျက်နေကြောင်း သတင်းသိရသည်။

“ကျောက်မဲမြို့မှာ မာရှယ်လောရှိတော့ ၇ နာရီလောက်ဆို မြို့ထဲမှာ အသံတွေတိတ်ပြီး အပြင်ထွက်တဲ့ သူလည်း မရှိတော့ဘူး၊ ဒါပေမယ့် သူတို့ လောင်းကစားဝိုင်းတွေ ဖွင့်နေတဲ့ နေရာကျတော့ လူစည်ကားပြီး အသံတွေ ဆူညံနေတယ်၊ စတိတ်ရှိုးတွေပါရှိလို့ အသံတွေကြောင့် ကျမတို့ အိပ်လို့မရဘူး” ဟု ကျောက်မဲမြို့ခံ အမျိုးသမီးတစ်ဦး က သျှမ်းသံတော်ဆင့်ကို ပြောသည်။

သျှမ်းပြည်တွင်း လောင်းကစားဝိုင်း

အဆိုပါ လောင်းကစားဝိုင်း ဖွင့်လှစ်သည့် နေရာသည် ကုန်းမြင့်ပေါ်တွင် တည်ရှိသည့်အတွက် လေတိုက်သည့် ဘက် အသံပျံ့လွင့်ပြီး ပြည်သူများ ညဘက်အိပ်ကောင်းခြင်း မအိပ်ရ ၊ အနှောင့်အယှက်များ ရှိနေကြောင်း ဒေသခံများက ပြောသည်။

ယခု ရက်သတ္တပတ်အတွင်း ကျောက်မဲမြို့ ရပ်ကွက် ၈ နှင့် တခြားရပ်ကွက်များအတွင်း လှည့်လည်ဖွင့်လှစ်နေပြီး လောင်းကစားဝိုင်းရှိသည့် နေရာတိုင်း စတိတ်ရှိုးပါ ထည့်သည့်အတွက် အသံဆူညံကာ အနှောင့်အယှက်ဖြစ်ရကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကားတွေ ဆိုင်ကယ်တွေ ပျောက်တာ နေ့တိုင်းနီးပါးလောက်ရှိနေတယ်၊ လောင်းကစားဝိုင်းတွေမှာ အရှုံးပေါ်တဲ့ သူရယ်၊ လောင်းကစားဝိုင်း နဲ့ လာတဲ့ မူးယစ်ဆေးတွေကြောင့်ရယ် ဒီလောက်ထိ သူခိုးတွေ သောင်းကျန်း နေတာလို့ မြင်တယ်” ဟု ၎င်းအမျိုးသား က ပြောသည်။

ပြီးခဲ့သည့် ဇူလိုင် ၂၀ ရက်မှ စတင်ကာ ကျောက်မဲမြို့နယ် ခုံအုံ (ခိုခမ်း) ကျေးရွာ ဘုန်းကြီးကျောင်းအနီးရှိ အသံမစဲ ပဌာန်း ပြုလုပ်နေမှုကို အခွင့်ကောင်းယူပြီး လူတစ်စုက လောင်းကစားဝိုင်းလာရောက် ဖွင့်လှစ်နေရာမှ လောင်းကစားဝိုင်းများသည် ကျောက်မဲမြို့အတွင်း တစ်နေရာပြီး တစ်နေရာပြောင်းရွှေ့ဖွင့်လှစ် နေကြောင်း သိရသည်။

ယခင် NLD အစိုးရလက်ထက်က ပွဲလမ်းသဘင်များတွင် လောင်းကစားဝိုင်းများ ဖွင့်ခွင့်မရှိဘဲ ယခု စစ်ကောင်စီ လက်ထက်တွင် ပွဲတိုင်းနီးပါး လောင်းကစားဝိုင်းများပါရှိပြီး သျှမ်းပြည်တစ်ဝှမ်းရှိ မြို့နယ်တိုင်း လောင်းကစားဝိုင်းများ ယခင်ထက် ပိုမို များပြားစွာ ရှိလာကြောင်း သိရသည်။

Leave a Comments

- Advertisement -spot_img

Latest article