သျှမ်းပြည် အရှေ့ပိုင်းတာချီလိတ်မြို့ တာလေ့ာစျေးတွင် ယနေ့ (အောက်တိုဘာ ၂)ရက် နံနက်ပိုင်းတွင် ရေထပ်မံကြီးကြောင်း သတင်းရရှိသည်။
တာချီလိတ်မြို့ မယ်ဆိုင်ချောင်း ရေလျှံမှုကြောင့် ယနေ့ (အောက်တိုဘာ ၂) ရက် တွင် အမှတ်(၁) ချစ်ကြည်ရေးတံတားအနီး အနိမ့်ပိုင်းရှိ နေအိိမ်များ၊ဆိုင်များရေဝင်ကြောင်း တာချီလိတ်ဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
” ဒီနေ့ ရေပြန်ကြီးတယ်။ ဒီနှစ်တော့ ၅ ကြိမ်လောက်ရှိပြီ ရေကြီးတာ။ ဒီနှစ် က အဆိုးဆုံးနှစ်ပဲ” ဟု ၎င်းအမျိုးသမီးက ဆိုသည်။
တာချီလိတ်မြို့ အနိမ့်ပိုင်းဖြစ်သည့် ဗိုလ်ချုပ်လမ်းမပေါ်၊ တာလော့ရပ်ကွက်နှင့် မကာဟိုခမ်းရပ်ကွက် ဝန်းကျင်တွင် မယ်ဆိုင်ချောင်းရေ မြင့်တက်လာတိုင်း ရေကြီးရေလျှံမှုဖြစ်ပွားကာ ဆိုင်များ၊ နေအိမ်များ ရေဝင်နေကြောင်း တာချီလိတ် တာလော့ရပ်ကွက်တွင်နေထိုင်သည့် အမျိုးသားတစ်ဦးက ပြောသည်။
” ဒီနှစ်ရေကြီးမှုကကျနော်တို့ အတွက် အခက်အခဲဆုံးပဲ။ ဆိုင်ရဲ့ ဆုံးရှုံးမှုကလည်း မနည်းဘူး။ နောက်နှစ် ဒီထက်ပိုဆိုးလာနိုင်တယ်” ဟု ၎င်းအမျိုးသား ပြောသည်။
သျှမ်းပြည် အရှေ့ပိုင်း တာချီလိတ်မြို့နယ်၊ ကျိုင်းတုံမြို့နယ် နှင့် မိုင်းဆတ်မြို့နယ်တို့တွင် ယခုနှစ် ရေကြီးမှုသည် ယခင်ကထက်ပိုများလာကြောင်း သိရသည်။
ထို့ပြင် သျှမ်းပြည်အရှေ့ပိုင်းအတွင်း ဓာတ်သတ္တု တူးဖော်မှုသည်လည်း ပိုမိုများလာပြီး သဘာဝ ပတ်ဝန်းကျင် ပျက်စီးမှုလည်း ပိုဆိုးလာသည့်အတွက် ရေကြီးမှုသည်တနှစ်ထက် တနှစ် ပိုဆိုးလာနိုင်ကြောင်း သိရသည်။
