သျှမ်းပြည်တောင်ပိုင်း မိုးဗြဲမြို့ လွယ်ယင်းမင်္ဂလာကျေးရွာတွင် စစ်ကောင်စီ နှင့် မိုးဗြဲ PDF တို့ တိုက်ပွဲအတွင်း ကျဆုံးသွားသည့် လင်းယုန်တပ်ခွဲ PDF (၂) ဦး နှင့် သိန်းငှက်တပ်ခွဲ (၁) ဦး ရုပ်အလောင်းကို ရေတွင်းထဲ ပြန်တွေ့ရှိခဲ့ကြောင်း သိရသည်။
အဆိုပါ စက်တင်ဘာ ၂၃ ရက်တွင် တိုက်ပွဲဖြစ်ပွားခဲ့ပြီး ကျဆုံးသွားသည့် PDF တပ်ဖွဲ့ဝင် ၃ ဦး ရုပ်အလောင်းကို ယမန်နေ့ စက်တင်ဘာ ၂၉ ရက်တွင် တွေ့ရှိခဲ့ကြောင်း သိရသည်။
သေဆုံးသွားသည့် ရုပ်အလောင်း ၂ ခုသည် တိုက်ပွဲအတွင်း ပွဲချင်းပြီး သေဆုံးသွားပြီး ကျန်တစ်ဦးသည် ဒဏ်ရာရရှိပြီး စစ်ကောင်စီက နှိပ်စက်မှုကြောင့် သေဆုံးသွားကြောင်း မိုးဗြဲ PDF လင်းယုန် တပ်ခွဲက ထုတ်ပြန်ထားသည်။
ထိုအပြင် သေဆုံးသွားသည့် ရုပ်အလောင်းများကို စစ်ကောင်စီတပ်ဖွဲ့က ရေတွင်းထဲပစ်ချလိုက်ပြီး ငှက်ပျောဖက်ဖြင့်ဖုံးအုပ်ထားကြောင်း သိရသည်။
အလားတူ စက်တင်ဘာ ၁၉ ရက်နေ့တွင်လည်း စစ်ကောင်စီက ပြည်သူကို ဒိုင်းကာအဖြစ် တိုက်ခိုက်ခဲ့သောကြောင့် မိုးဗြဲ PDF တပ်ဖွဲ့ဝင်နှစ်ဦး သေဆုံးသွားကြောင်း သိရသည်။
