သျှမ်းပြည်မြောက်ပိုင်း နမ္မတူမြို့နယ် ဘော်တွင်းသတ္တုတွင်းဘက်တွင် လက်နက်ကြီး လက်နက်ငယ် ပစ်ခတ်သံများ ဆက်လက်ထွက်ပေါ်နေသည့်အတွက် ပြည်သူများ စိုးရိမ်ထိတ်လန့်နေကြောင်း သတင်းသိရသည်။
ယနေ့ စက်တင်ဘာလ ၂၈ ရက်နေ့ နံနက် ၇ နာရီဝန်းကျင်မှ စတင်ကာ ဘော်တွင်းသတ္တုဘက်ရှိ စစ်ကောင်စီ ခမရ တပ်အမှတ် ၃၂၄ မှ လက်နက်ကြီး 10 လုံးထက်မနည်း ပစ်ခတ်ခဲ့ခြင်း ဖြစ်ကြောင်း သတင်းသိရသည်။
“ဒီမနက် ၇ နာရီလောက်ကတည်းက ၃၂၄ တပ်ကုန်းကနေ လက်နက်ကြီးတွေနဲ့ ပစ်နေပါတယ်၊ နေ့လည် ၁၂ နာရီ အထိကို ငါးမိနစ်ခြား ၁၀ မနစ်ခြား အဲ့လိုတွေပစ်နေတာ၊ ၁၀ လုံးကျော်ရှိတယ်၊ ပန်ဟိုင်းဘက်ပစ်သွားတာ၊ ခုနက ၁ နာရီခွဲလောက်မှာကျတော့ နှစ်ဖက်ပစ်ခတ်တဲ့ သေနတ်သံတွေ ထွက်လာတယ်” ဟု ဘော်တွင်းမှ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ပစ်ခတ်မှုများသည် အာဏာသိမ်း စစ်ကောင်စီနှင့် KIA ပူးပေါင်းတပ်ဖွဲ့ PDF တို့နှင့် တိုက်ပွဲဖြစ်ပွားခဲ့ခြင်း ဖြစ်သည်ဟုလည်း ဒေသခံများက သျှမ်းသံတော်ဆင့်ကို ပြောသည်။
လက်ရှိတွင် စစ်ကောင်စီတပ်ဖွဲ့နှင့် KIA / PDF ပူးပေါင်းတပ်ဖွဲ့ကြား ပစ်ခတ်တိုက်ခတ်မှု ငြိမ်သက်သွားသော်လည်း တိုက်ပွဲဆက်လက်ပြင်းထန်လာမှာကို စိုးရိမ်သည့်အတွက် နမ္မတူမြို့တွင်းရှိ အမှတ် (၂) အလယ်တန်းကျောင်း နှင့် အမှတ် (၁) အထက်တန်းကျောင်းတို့က ကျောင်းသားမိဘများကို ဆက်သွယ်ပြီး ကျောင်းသား/သူ များကို ပြန်လွတ်ပေးကြောင်း အထက်ပါ ပုဂ္ဂိုလ်က ဆက်ပြောသည်။
“ပစ်ခတ်သံတွေ ကြားနေရတဲ့ အမှတ် ၃၂၄ တပ်က ကျောင်းနဲ့ ၃ ဖာလုံလောက်ပဲ ဝေးတယ်၊ ဒါကြောင့် ဆရာ/ ဆရာမတွေက မိဘတွေကို ဆက်သွယ်ပြီး ကျောင်းသား/သူတွေကို ပြန်လွတ်ပေးလိုက်တယ်၊ ဒေသခံအနေနဲ့ လည်း တိုက်ပွဲတွေ ပြင်းထန်လာမှာကို စိုးရိမ်ရတယ်” ဟု ၎င်းက ပြောသည်။
ယမန်နေ့ စက်တင်ဘာလ ၂၇ ရက်နေ့ မွန်းလွဲ ၂ နာရီတွင်လည်း ဘော်တွင်းဘက်မှ လက်နက်ကြီး ပစ်ခတ်သံများ ထွက်လာသည့်အတွက် နှစ်ရက်ဆက်တိုက် လက်နက်ကြီးသံ ကြားရခြင်းဖြစ်ကြောင်း သတင်းသိရသည်။
အဆိုပါ ဘော်တွင်းဘက်တွင် စစ်ကောင်စီတပ် ခမရ ၃၂၄ တည်ရှိနေပြီး အဆိုပါ ပတ်ဝန်းကျင်တွင် ကချင်အမျိုးသား လွတ်မြောက်ရေးတပ်မတော် KIA နှင့် ပူးပေါင်း PDF တပ်ဖွဲ့တို့မှ လှုပ်ရှားနေကြောင်း သတင်းသိရသည်။
Leave a Comments