သျှမ်းပြည်အတွင်း မြို့နယ်တစ်ချို့တွင် ပြည်သူ့ကာကွယ်ရေးတပ်ဖွဲ့ PDF ဟု နာမည်တပ်ပြီး အလှူခံနေကြောင်း စုံစမ်းသိရသည်။

သျှမ်းပြည်အတွင်း PDF ဟု ဟန်ဆောင်ပြီး ပြည်သူများထံ အလှူငွေကောက်ခံ နေကြသလို တပ်သားများ နေမကောင်း ဖြစ်နေသည့်အတွက် အလှူခံ တောင်းလာခြင်း နှင့် စစ်ကောင်စီကို တိုက်ရန် လက်နက်လိုအပ်သည်ဟုဆိုပြီး ပြည်သူများထံ အလှူငွေများ ကောက်ခံနေကြောင်း သိရသည်။

ပြီးခဲ့သည့် စက်တင်ဘာ ၂၃ ရက်နေ့တွင်လည်း သျှမ်းပြည်တောင်ပိုင်း၊ လဲချားမြို့နယ်ထဲတွင် PDF တပ်ဖွဲ့ဝင် ၂ ဦး ရှေ့တန်းတွင် နေမကောင်းသဖြင့် ဆေးဝါးခက်ခဲနေကြာင်း ထုတ်ပြန်ပြီး အလှူငွေကောက်ခံမှု ပြုလုပ်နေသည်။

သျှမ်းသံတော်ဆင့် စုံစမ်းချက်အရ လဲချားမြို့နယ်အတွင်း PDF လက်နက်ကိုင်တပ်ဖွဲ့ မရှိကြောင်း သိရသည်။

“ကျနော်တို့ လဲချားမှာက PDF မရှိနိုင်ဘူး။ မြို့ကလည်း သေးသေးလေး။ သူတို့တွေ ဒီလိုထုတ်ပြန်လာတာတော့ ဘာရည်ရွယ်ချက်လည်းတော့ မသိဘူး။ ဒီမှာ စစ်ကောက်နေလို့ လူငယ်တွေက တစ်ခြားကို ထွက်ပြေးသွားတာပဲရှိတယ်” ဟု လဲချားမြို့ ဒေသခံ အမျိုးသမီးတစ်ဦးက ပြောသည်။

အလားတူ လဲချားမြို့ အသက် ၂၂ နှစ် ဒေသခံအမျိုးသားတစ်ဦးကလည်း “ မရှိလောက်ဘူး။ ကျနော်တို့တောင် တပ်သားကောက်လို့ ထွက်ပြေးနေတာ။ ကျနော်တို့ လဲချားမှာ RCSS နဲ့ SSPP ပဲတွေ့ဖူးတယ်။ PDF ဆိုတာ မမြင်ဖူးဘူး” ဟု ပြောသည်။

လက်ရှိ PDF တပ်ဖွဲ့အတုတွေ ပေါ်ပေါက်လာသောကြောင့် ပြည်သူများကလည်း စားဝတ်နေရေးအတွက် စိုးရိမ်နေ ကြရသည်။

“အတုတွေ ပေါ်လာတော့လည်း စိတ်ပူရတယ်လေ။ လုပ်စားကြတယ်။ အခုလည်း နိုင်ငံရေး မကောင်းတော့ ရှာစားရတာခက်လာတယ်။ PDF တွေ နာမည်သုံးပြီး လာလိမ်နေတော့ မသိတဲ့သူက လှူလိုက်ရင်လည်း မကောင်းဘူးလေ။ ပြီးတော့ သူခိုးတွေဖြစ်မှာလည်း စိုးရိမ်ရတယ်” ဟု လဲချားမြို့ ဒေသခံ အမျိုးသားတစ်ဦးက ပြောသည်။

အလားတူ စက်တင်ဘာ ၂၁ ရက်နေ့တွင်လည်း သျှမ်းပြည်မြောက်ပိုင်း လားရှိုးမြို့နယ် အခြေစိုက် သျှမ်းပြည်မြောက်ပိုင်း ပြည်သူ့ကာကွယ်ရေးတပ်ဖွဲ့ (NSSPDF) ဖွဲ့စည်းပြီးကြောင်း ထုတ်ပြန်ခဲ့သည်။

အဆိုပါ ထုတ်ပြန်ချက်တွင်လည်း (NSSPDF) တပ်ဖွဲ့သည့် ကိုးကန့်တပ်မတော် MNDAA နှင့် မဟာမိတ်ဖွဲ့စည်းထားပြီး အမျိုးသားညီညွတ်ရေးအစိုးရ NUG လက်အောက်တွင် တည်ရှိကြောင်း ထုတ်ပြန်ထားသည်။

တိုင်းရင်းသားလက်နက်ကိုင် လက်အောင်တွင် ရှိနေသည့် PDF တပ်ဖွဲ့များသည်လည်း ကိုယ်ပိုင်ဆုံးဖြတ်ခွင့် မရဘဲ အသုံးခံဖြစ်နေသည့် PDF တပ်ဖွဲ့များသာဖြစ်ကြောင်း လားရှိုးမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဟုတ်တယ်။ ပြည်မကြီးက PDF တွေကတော့ ကောင်းတာပေါ့။ ကျနော်တို့ သျှမ်းမြောက်မှာရှိနေတဲ့ PDF တွေကတော့ တိုင်းရင်းသား လက်နက်ကိုင် အောက်တွေပဲဖြစ်တယ်။ ကိုယ်ပိုင်ဆုံးဖြတ်ခွင့်လည်း မရှိကြဘူး။ ပြီးတော့ တိုင်းရင်းသား လက်နက်ကိုင်တွေရဲ့ နိုင်ငံရေး ကစားကွက်လည်း ဖြစ်တတ်တယ်” ဟု ၎င်းက ပြောသည်။

ပြီးခဲ့သည့် ဩဂုတ် ၃၀ တွင်လည်း သျှမ်းပြည်မြောက်ပိုင်း မိုင်းရယ် နှင့် သျှမ်းပြည်တောင်ပိုင်း လဲချားမြို့တို့တွင် PDF နာမည်သုံးပြီး ငွေကြေးတောင်းခံနေကြောင်း သိရသည်။

မိုင်းရယ်မြို့တွင်လည်း PDF တပ်ဖွဲ့ဟု အမည်ခံပြီး ပြည်သူများကို ငွေကြေးတောင်းခံပြီး လက်နက်ဝယ်ယူရန်ဟု ခြိမ်းခြောက်ကာ ဓာတ်ဆီဆိုင်ပိုင်ရှင်တစ်ဦးကို သတ်ဖြတ်လိုက်ကြောင်း ဒေသခံတစ်ဦးက သျှမ်းသံတော်ဆင့်ကို ပြီးခဲ့သည့် ဩဂုတ် ၂၉ က ပြောခဲ့သည်။

ထိုနောက် သျှမ်းသံတော်ဆင့် မှ သတင်းထုတ်ဖော်ခဲ့ ပြီးနောက်တွင် မိုင်းရယ် PDF တပ်ဖွဲ့လည်း ပျောက်ဆုံးသွားကြောင်းသိရသည်။