မိုးဗြဲမြို့ စစ်ကောင်စီမှ ပြည်သူကို ဒိုင်းကာအဖြစ် အသုံးပြုပြီး တိုက်ခိုက် PDF တပ်ဖွဲ့ဝင် ၂ ဦး သေဆုံး

0

သျှမ်းပြည်တောင်ပိုင်း မိုးဗြဲမြို့ ယမန်နေ့ စက်တင်ဘာ ၁၉ ရက် တွင် စစ်ကောင်စီက ပြည်သူများကို ဒိုင်းကာအဖြစ်အသုံးပြုပြီး တိုက်ခိုက်ခဲ့သဖြင့် မိုးဗြဲ PDF တပ်ဖွဲ့ ဝင် (၂) ဦး ကျဆုံးသွားကြောင်း စုံစမ်းသိရှိရသည်။

ယမန်နေ့ (စက်တင်ဘာ ၁၉ ) ရက် တွင် စစ်ကောင်စီက မွေတော်ဘုန်းကြီးကျောင်း၊ ပွဲကုန်းရပ်ကွက် ၂ ၊ ၃ ထဲတွင် တိုက်ပွဲဖြစ်ပွားခဲ့ပြီး စစ်ကောင်စီဘက်မှ တင့်ကား၊ လက်နက်ကြီး အင်အားအလုံးအရင်းဖြင့် ဝင်ရောက်တိုက်ခိုက်ခဲ့ကြောင်း အမည်မဖော်လိုသည့် မိုးဗြဲ PDF မှ တပ်ဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။

ကျဆုံးသွားသည့် PDF တပ်သား

“မိုးဗြဲ PDF တပ်ဖွဲ့ထဲက ၂ ယောက် ကျဆုံးသွားတယ်။ သူတို့ဘက်တော့ ဘယ်လောက်သေလဲမသိဘူး။ သူတို့က လက်နက်ကြီးတွေ၊ တင့်ကား နဲ့ ဝင်ရောက်တိုက်ခိုက်လာတာ။ သူတို့ဘက်က လက်နက်ကြီးတွေပဲ အများဆုံးသုံးတာ။ ပြီးတော့ ပြည်သူ ၁၀၀ နီးပါးကိုလည်း ဒိုင်းကာလုပ်ပြီးတော့ တိုက်ခိုက်လာကြတာ” ဟု အမည်မဖော်လိုသည့် PDF တပ်ဖွဲ့ဝင်တစ်ဦး က ပြောသည်။

ထိုအပြင် တိုက်ပွဲတွင် လက်နက် အင်အား မလုံလောက်သောကြောင့် တပ်ဆုတ်ခွာခဲ့ရကြောင်း၊ လက်ရှိမှာ မိုးဗြဲမြို့အတွင်း ပြည်သူများ ထွက်ပြေးတိမ်းရှောင်နေရကြောင်း ဖယ်ခုံ PDF တပ်ဖွဲ့ဝင် တစ်ဦးက ပြောသည်။

“ဒီနေ့တော့ တိုက်ပွဲမဖြစ်သေးဘူး။ ငြိမ်နေတယ်။ မိုးဗြဲမြို့ထဲမှာ အခုက စစ်ကောင်စီ တွေပဲနေနေတာ။ ပြည်သူတွေ၊ ကျနော်တို့ PDF တွေလည်း တပ်ဆုတ်လာခဲ့ရတယ်။ ကျနော်တို့အတွက် လက်နက်အင်အား မလုံလောက်လို့ တပ်ဆုတ်လာခဲ့ရတာပါ” ဟု ၎င်း က ပြောသည်။

ကျဆုံးသွားသည့် PDF တပ်သား

အလားတူ ယမန်နေ့ တွင် ဖယ်ခုံမြို့ စစ်ကောင်စီ၏ ရဲစခန်း နှင့် ထွေအုပ်ရုံးကိုလည်း ဖယ်ခုံမြို့ PDF တပ်ရင်း ၂ က ဝင်ရောက်တိုက်ခိုက်ခဲ့ကြောင်း သိရသည်။

“ဟုတ်ပါတယ်။ ကျနော်တို့ ဖယ်ခုံက ရဲစခန်း နဲ့ ထွေအုပ်ရုံးကို ဝင်ရောက်တိုက်ခိုက်ခဲ့တယ်။ ၁၅ မိနစ်လောက်ပဲကြာတယ်။ ထိခိုက်မှု ဘယ်လောက်ရှိလဲတော့ ကျနော်တို့လည်း မသိရဘူး” ဟု ဖယ်ခုံမြို့ PDF တပ်ရင်း ၂ က တာဝန်ရှိသူ တစ်ဦးကပြောသည်။

မိုးဗြဲမြို့တွင် စက်တင်ဘာ ၈ ရက်နေ့ကစပြီး ယနေ့အချိန်ထိ တိုက်ပွဲဖြစ်ပွားခဲ့ကြောင်း သိရသည်။

စစ်ကောင်စီသည် လက်နက်ကြီးများကို အသုံးချ တိုက်ခိုက်လာသောကြောင့် ကားသမားများအနေဖြင့် မိုးဗြဲမြို့ထဲသို့ အသွားအလာ သတိထားသွားလာကြပါရန် PDF တပ်ဖွဲ့များက ပြောဆိုလိုက်သည်။

Leave a Comments