Saturday, December 3, 2022

လားရှိုးမြို့နယ် ဓားပြ သောင်းကျန်းမှု နေ့စဥ်နီးပါး ရှိနေ

Must read

သျှမ်းပြည်မြောက်ပိုင်း လားရှိုးမြို့နယ်အတွင်းရှိ သေနတ်ကိုင်ဆောင်ထားသည့် သူခိုး၊ဓားပြများ နေ့စဥ် သောင်းကျန်းနေကြောင်း သတင်းသိရသည်။

ပြီးခဲ့သည့် သြဂုတ်လမှ လက်ရှိ စက်တင်ဘာလ အထိ နှစ်လတာ ကာလအတွင်းတွင် သေနတ်ကိုင်ဆောင်သည့် သူခိုး၊ ဓားပြများက နေ့စဥ်နီးပါး သောင်းကျန်းနေသည့်အတွက် လားရှိုးဒေသခံ ပြည်သူများက လုံခြုံရေးအတွက် အထူးသတိထားနေရကြောင်း သိရသည်။

ပြီးခဲ့သည့် စက်တင်ဘာလ ၁၇ ရက်နေ့ မွန်းလွဲ ၁၂ နာရီဝန်းကျင် အချိန်တွင် အမည်မသိ လက်နက်ကိုင် တပ်ဖွဲ့ တစ်ခုမှ လားရှိုးမြို့ အမှတ် ၅ ရပ်ကွက် နယ်မြေ ၁၃ ဘက်ရှိ အလှပြင်ဆိုင်အတွင်း ဝင်ရောက်ဓားပြ တိုက်မှုဖြစ်ပွားခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

သူခိုး/ဓားပြ မှ နေအိမ်တွင်းဝင်ရောက် မွှေနှောက်

“ဆိုင်ရှင်တော့ ဘာမှမဖြစ်ခဲ့လိုက်ဘူး၊ ဆိုင်ထဲက တန်ဖိုးရှိတဲ့ ပစ္စည်း နဲ့ ငွေကြေးတော်တော်များများ ပါသွားတယ်၊ အတိအကျတော့ မသိရဘူး၊ ဘယ်မှာမှ မသွားပြောဖို့ ဓါးပြအဖွဲ့က ဆိုင်ရှင်ကို ခြိမ်းခြောက်သွားတယ်၊ သေနတ်တွေ လည်း ပါကြတယ်ဆိုတော့ အရမ်းကြောက်ဖို့ကောင်းတယ်” ဟု ၎င်းက ပြောသည်။

စက်တင်ဘာ ဒုတိယပတ်တွင်လည်း လားရှိုးမြို့ မန်အိုင်ရွာတွင် လက်နက်ကိုင် ဓါးပြအဖွဲ့တစ်ဖွဲ့မှ တရုတ်ငွေ လှဲလှယ်သည့် နေအိမ်အတွင်း ဝင်ရောက်ဓားပြတိုက်သွားပြီး တရုတ်ငွေ ၁ သိန်းကျော် ပါသွားကြောင်း သိရသည်။

“အဲ့ဒီ မန်အိုင်က ဓားပြတိုက်မှုမှာကျတော့ တရုတ်ငွေ ၁ သိန်းကျော် ဆုံးရှုံးလိုက်ရတယ်၊ ဓားပြတိုက်အဖွဲ့က သေနတ်တွေ ဓားတွေ ပါတယ်၊ လက်ရှိ လားရှိုးမြို့ရဲ့ အခြေအနေက အရမ်းကို ကြောက်ရတယ်၊ ဘာလုံခြုံမှုမှ မရှိတော့ဘူး” ဟု လားရှိုးမြို့မှ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် သြဂုတ်လ အတွင်းတွင်လည်း ကားတစ်စီးဖြင့်ရောက်လာသည့် အမည်မသိ လက်နက်ကိုင် အဖွဲ့ တစ်ဖွဲ့သည် ခရီးသွား ပြည်သူတစ်ဦး၏ ကားရှေ့ ပိတ်ရပ်ကာ ၎င်းတို့သည် စစ်ကောင်စီတပ်ဖွဲ့ဝင်များဖြစ်ကြောင်း နှင့် စစ်ဆေးမေးမြန်းရန်ရှိသည်ဟု ဆိုကာ အဆိုပါ ပြည်သူကားကို မောင်းနှင်ထွက်ပြေးရာ ကားပေါ်ရှိသည့် ငွေကြေးအားလုံးလည်း ဆုံးရှုံးလိုက်ရကြောင်း သိရသည်။

ထို့အပြင် လက်ရှိ လားရှိုးမြို့နယ် အတွင်း၌ အခြေခံ စားသောက်ကုန်ဈေးနှုန်းများ ဈေးနှုန်းမြင့်တက်မှု၊ ငွေကြေး တန်ဖိုး ကျဆင်းမှု၊ လောင်းကစားများ ပေါများမှုတို့ကြောင့် သူခိုး ဓါးပြ များကလည်း သူဌေးအိမ်ရာများနှင့် တရုတ်အိမ်များတွင် ဦးတည် ဓါးပြတိုက်နေကြောင်း ဒေသခံများက ပြောသည်။

Leave a Comments

- Advertisement -spot_img

Latest article