ကိုဗစ် – ၁၉ ကူးစက်မှု ပြန်ရှိလာသည့် အတွက် နယ်စပ်ဂိတ်များ ပြန်ပိတ်

မြန်မာ – တရုတ်နယ်စပ် တရုတ်ပြည် ရွှေလီမြို့ အတွင်း ကိုဗစ်-၁၉ ကူးစက်မှု ပြန်ရှိလာသည့် နယ်စပ်ဂိတ်သည် ပြန်လည်ပိတ်လိုက်ပြီ ဖြစ်ကြောင်း စုံစမ်းသိရှိရသည်။

ယမန်နေ့ စက်တင်ဘာ ၁၆ ရက်၊ ည ၁၂ နာရီမှ စတင်ပြီး ရွှေလီမြို့တွင်း Lockdown ချထားပြီး နယ်စပ်ဂိတ် များလည်း (၇) ရက် နှင့် (၁၀) ရက် ကြား ရက်အကန့်အသတ်ဖြင့် ပိတ်လိုက်ပြီဖြစ်ကြောင်း ရွှေလီမြို့ ဒေသခံ ကုန်သည် တစ်ဦးက သျှမ်းသံတော်ဆင့်ကို ပြောသည်။

“ မိုင်းမောဝ်မှာ လွန်ခဲ့တဲ့ ၅ ရက်က ကိုဗစ်-၁၉ ကူးစက်ခံရတဲ့သူ ပိုများလာတယ်။ တမြို့လုံးကတော့ Lockdown ချထားပြီ။ နယ်စပ်ဂိတ်တွေလည်း ပြန်ပြီး ပိတ်ထားလိုက်တယ်။ အဝင်အထွက်ကတော့ မရှိတော့ဘူး“ ဟု ၎င်း ကုန်သည်တစ်ဦးက ပြောသည်။

အဆိုပါ တရုတ်နယ်စပ် ရွှေလီဂိတ် ပြန်လည်ပိတ်လိုက်ပြီ ဖြစ်သောကြောင့် နယ်စပ်တလျှောက်ရှိ ကုန်သည် နှင့် ပြည်သူများက အခက်ခဲ ကြုံတွေ့နေရပြီဖြစ်ကြောင်း ရွှေလီမြို့ဒေသခံတစ်ဦး ပြောသည်။

“အခု လက်ရှိမှာတော့ ကုန်သွင်း၊ ကုန်ထုတ် လို့မရတော့ဘူး။ နယ်စပ်တလျောက်ရှိ ဂိတ်တွေက အကုန်ပိတ် သွားပြီ။ ဒီချိန်မှာ ကုန်ပစ္စည်း ဈေတက်နေတာနဲ့လည်း ခက်ခဲပါတယ်။ တချို့တောင် ဒီကာလမှာ အသုဘရှိရင် တောင်လုပ်လို့မရတော့ဘူး “ ဟု ၎င်းဒေသခံ တစ်ဦး ကပြောသည်။

လက်ရှိ Lockdown ကာလအတွင်း ရွှေလီမြို့တွင်း နေထိုင်သည့် သူအားလုံးကို နေ့တိုင်း အာခေါင်ထိုး ပိုးစစ်ရမည်ဟု ကြေညာထားကြောင်း သိရသည်။

အဆိုပါ ကိုဗစ် – ၁၉ ကူးစက်ခံရသူ ပြန်လည်မြင့်တက်လာသဖြင့် ရွှေလီမြို့ ကုန်သည်များအားလုံးလည်း ထုတ်ကုန်၊ သွင်းကုန်များ ရပ်ဆိုင်းလိုက်ရကြောင်း ရွှေလီမြို့တွင် နေထိုင်သည့် မြန်မာကုန်သည်တစ်ဦးက သျှမ်းသံတော်ဆင့် ကို ပြောသည်။

“အခုတော့ တမြို့လုံး Lockdown ချထားတော့ ကုန်သည်တွေလည်း အလုပ်နားထားရတယ်။ အဝင်အထွက်က အားလုံးပိတ်ထားပြီ။ ကျောင်းနေတဲ့ ကလေးတွေလည်း ကျောင်းမသွားရတော့ဘူး။ အခုကာလမှာ အားလုံးတော့ ခက်ခဲသွားပါတယ် “ ဟု ၎င်းကုန်သည်တစ်ဦးက ပြောသည်။

အဆိုပါ Lockdown ကာလ ကို ၅ ရက် သတ်မှတ်ထားပြီး ရွှေလီမြို့တွင် နေထိုင်သည့် သူအားလုံးကို နေ့တိုင်း အာခေါင်ထိုး ပိုးစစ်ရမည်ဟု ကြေညာထားသောကြောင့် ကိုဗစ်-၁၉ ကူးစက်မှု မကျဆင်းပါက Lockdown ကာလကို ထပ်မံကြေညာသွားမည် ဖြစ်ကြောင်း သိရသည်။