သျှမ်းပြည်မြောက်ပိုင်း လားရှိုးမြို့နယ် ပြည်သူ့ဆေးရုံတွင် ယနေ့ (စက်တင်ဘာ ၁၆ ) ရက် ကိုဗစ် – ၁၉ အတည်ပြု လူနာတစ်ဦးသည် သေဆုံးသွားကြောင်း စုံစမ်းသိရှိရသည်။

ယနေ့ (စက်တင်ဘာ ၁၆ ) ရက် နေ့လည်ပိုင်းတွင် လားရှိုးမြို့နယ် ပြည်သူ့ဆေးရုံမှ ကိုဗစ် – ၁၉ ကူးစက်ခံ ရသော အသက် (၅၈) နှစ်ရှိ အမျိုးသားတစ်ဦးက ဆေးရုံ၌ သေဆုံးသွားခဲ့ကြောင်း ကမ္ဘောဇ နာရေးကူညီမှု အသင်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“ကိုဗစ် ကတော့ သြဂုတ်လကုန်ပိုင်းမှာ ပြန်ပြီးဖြစ်လာတာ။ လားရှိုးမှာ ကိုဗစ် ရောဂါ ကူးစက်ခံရတဲ့သူတွေက ပြန်များလာပါတယ်။ ပြည်သူဘယ်နှစ်ယောက် ကူးစက်ခံရတယ်ဆိုတာတော့ ကျနော်တို့က သေချာမသိရ သေးဘူး။ ကြိုတင်ကာကွယ်ဖို့ နှာခေါင်းစည်း တပ်ပေးဖို့ လိုတယ် “ ဟု ၎င်းတာဝန်ရှိသူ တစ်ဦးက ပြောသည်။

ယခုလက်ရှိ ကိုဗစ်ရောဂါ ကူးစက်ခံရသော သူများသည် မည်သည့်ရောဂါအမည်ဖြင့် ကူးစက်ခံရ၍ သေဆုံးသွားခဲ့ကြောင်း လားရှိုးမြို့နယ် ပြည်သူ့ဆေးရုံက ထုတ်ပြန်ပေးခြင်းမရှိသေးကြောင်း ၎င်းက ဆက်ပြောသည်။

ထို့အပြင် လားရှိုးမြို့နယ်မှာ ကိုဗစ်ရောဂါ တကြော့ပြန်ဖြစ်ပွားလာသဖြင့် ပြည်သူများ အနေဖြင့် ကြိုတင်ကာကွယ် ရန် နှနှာခေါင်းစည်းတပ်ဆင်ပေးခြင်းများ ပြုလုပ်စေလိုကြောင်း ကမ္ဘောဇ လူမှုကူညီရေးအသင်းမှ တိုက်တွန်းထားသည်။

“ဒီနေ့ ဆိုရင် မြို့နယ်အုပ်ချုပ်ရေးမှူး နဲ့ စည်ပင်ကတော့ လားရှိုးမိုတယ်ရှေ့မှာ mask တွေလိုက်ဝေနေတယ်။ အခုတော့ ကိုဗစ် ရောဂါ ကြိုတင်ကာကွယ်ဖို့တော့ လိုတယ်။ mask တပ်ပေးဖို့ နဲ့ လက်ကိုသေချာစွာ ဆေးကြောပေးဖို့ပဲ လိုပါတယ်။ အခု ကိုဗစ်က ကူးစက်မြန်တယ်လို့ ပြောကြတယ်။ ပြည်သူအနေနဲ့ မပေါ့ဆဖို့လိုတယ် “ ဟု ၎င်းက ဆိုသည်။

အလားတူ လားရှိုးမြို့နယ် ပြည်သူ့ဆေးရုံတွင် စက်တင်ဘာလမှ စတင်ပြီး ကိုဗစ်ရောဂါ ကူးစက်ခံ၍ သေဆုံးသူ (၃) ဦးရှိကြောင်း သိရသည်။