သျှမ်းပြည်မြောက်ပိုင်း ကျောက်မဲခရိုင် နောင်ချိုမြို့နယ်မှ အမျိုးသားတစ်ဦးသည် တောထဲတစ်ခုတွင် ချိပ်ဆေးသွားရှာရင်း စက်တင်ဘာလ ၁၃ ရက်နေ့က မြေမြှုပ်မိုင်းနင်းမိပြီး သေဆုံးသွားခဲ့ကြောင်း စုံစမ်းသိရှိရသည်။
စက်တင်ဘာလ ၁၃ ရက် မနက်ပိုင်း ၁၀ နာရီတွင် နောင်ချိုမြို့နယ် ပိန်းအွေကျေးရွာမှ အသက် (၄၅) နှစ်ရှိ အမျိုးသားတစ်ဦးသည် ၎င်းကျေးရွာ နှင့် (၆) မိုင်ခန့်ဝေးသော တောထဲတစ်ခုတွင် ချိပ်ဆေးသွားရှာရင်း မတော်တဆ မြေမြှုပ်မိုင်းနင်းမိကာ သေဆုံးသွားကြောင်း ပိန်းအွေကျေးရွာမှ ဒေသခံတစ်ဦးက သျှမ်းသံတော်ဆင့် ကို ပြောသည်။
“သူ့သားနဲ့အတူ တောထဲမှာ ချိပ်ဆေးသွားရှာတာ။ လမ်းခွဲတစ်နေရာမှာ သူ့အဖေက မြေမြှုပ်မိုင်းနင်းမိတာ။ သူ့သား ကတော့ဘာမှ မဖြစ်ဘူး။ သူ့အဖေကတော့ အဲ့ဒီနေရာမှာ တစ်ခါထဲ ပွဲပြီးသွားတာ။ အလောင်းကတော့ ပြန်မရဘူး”ဟု ၎င်း ဒေသခံ တစ်ဦး ကပြောသည်။
အဆိုပါ ဖခင်မှာ မြေမြှုပ် မိုင်းနင်းမိပြီးနောက် သားဖြစ်သူက ရွာသားနှင့်အတူ လာရောက် အလောင်းသယ်ယူသော်လည်း ပြန်မရခဲ့ကြောင်း သိရသည်။
“အဲ့နေရာမှာ ပြည်သူ့ကာကွယ်ရေး PDF အဖွဲ့တွေ လှုပ်ရှားတယ်။ သူ့အဖေ မိုင်းနင်းမိပြီဆိုတော့ သူ့သားက ရွာသားတွေကို လာခေါ်တယ်။ ရွာသားတွေက အလာင်းပြန်လာသယ်တော့လည်း အလောင်းကမရှိတော့ဘူး “ ဟု ၎င်းအထက် ပုဂ္ဂိုလ်တစ်ဦးက ထပ်လောင်းပြောသည်။
အလားတူ မြေမြှုပ်မိုင်း တပ်ဆင်သည့် နေရာတွင် ပြည်သူ့ကာကွယ်ရေး PDF တပ်ဖွဲ့ လက်ချက်ဖြစ်ပြီး ၎င်းမိုင်းနင်းမိပြီး သေဆုံးသူအလောင်းကိုလည်း ပြည်သူ့ကာကွယ်ရေး PDF တပ်ဖွဲ့က သယ်ဆောင်သွားပြီး မြေမြှုပ်ထားလိုက်ကြောင်း ဒေသခံများ ပြောချက်အရ သိရသည်။
