သျှမ်းပြည်တောင်ပိုင်း ပင်လုံမြို့ – လဲချားမြို့နယ်ကြားရှိ လမ်းလုပ်သား တစ်ဦးသည် မိုင်းနင်းမိပြီး သေဆုံးခဲ့ရကြောင်း သတင်းသိရသည်။
ယမန်နေ့ (စက်တင်ဘာ ၁၂) ရက် မွန်းလွဲပိုင်း ၂ နာရီဝန်းကျင်တွင် ပင်လုံ – လဲချား ကြားရှိ နောင်လိုင်ကျေးရွာဘက် ကျောက်မိုင်းခွဲနေသည့် လမ်းလုပ်သားအုပ်စုမှ အသက် ၁၆ နှစ်အရွယ် မောင်ခန့်ညားနိုင်သည် မိုင်းနင်းမိပြီး သေဆုံးသွားကြောင်း ဖြစ်စဥ်ကိုသိသည့် ဒေသခံ အမျိုးသားတစ်ဦးက သျှမ်းသံတော်ဆင့် ကိုပြောသည်။
“မနေ့မိုးရွာတော့ အလုပ်နားတယ်။ ဒါကြောင့် ဟင်းစားဖို့အတွက် တောထဲကို မှိုသွားရှာရင်း နဲ့ မိုင်းနင်းမိတာ၊ နှစ်ယောက်အတူ သွားတာ သူတစ်ယောက်ပဲ မိုင်းနင်းမိတယ်။ သူတို့ ကျောက်ခွဲနေတဲ့ တောင်ရဲ့ ဟိုဘက်မှာပဲ နင်းမိတာ။ ဆေးရုံကို ပို့လိုက်ပေမဲ့ ဒဏ်ရာကပြင်းတော့ ဆေးရုံမှာပဲ ဆုံးသွားတယ်” ဟု ဖြစ်စဥ်ကို သိရှိရသည့် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မိုင်းနင်းမိသေဆုံးသူ မောင်ခန့်ညားနိုင်သည် ဖခင် ဦးနိုင်ဝင်း မိခင် ဒေါ်ကြည်ဖြစ်ပြီး နေပြည်တော် ပျော်ဘွယ်ဘက် မှ လဲချားမြို့နယ်အတွင်းရောက်လာကြသည့် ကျောက်ခွဲ လမ်းလုပ်သားဖြစ်ကြောင်း သိရသည်။
အဆိုပါ မိုင်းနင်းမိမှုကြောင့် မောင်ခန့်ညားနိုင်သည် ခါးပိုင်းတစ်ဝိုက် နှင့် မျက်လုံးတစ်ဝိုက်တို့တွင် ထိခိုက် ဒဏ်ရာ ပြင်းထန်စွာရရှိပြီး လွိုင်လင်ပြည်သူ့ဆေးရုံသို့ ပို့ဆောင်ကုသစဥ်မှာပင် သေဆုံးသွားကြောင်း သိရသည်။
“ဆေးရုံမှာပဲ သေဆုံးသွားတာပါ။ ခါးပိုင်းမှာ ဒဏ်ရာတော်တော်နက်တယ်။ ပြီးတော့ မျက်စိနားတွေမှာလည်း ထိထားတယ်။ အလုပ်သမားခေါင်းဆောင်က ဒီကျောက်ခွဲတဲ့ တောင်ကနေကျော်ပြီး တခြားနေရာ မသွားဖို့လည်း ပြောထားတယ်။ အဲ့နားတစ်ဝိုက်မှာ စစ်ကောင်စီတပ်တွေလည်းရှိတယ်။ ဒီကွဲတဲ့မိုင်းက ဘယ်သူ့ဟာလဲတော့ မသိရဘူး” ဟု အထက်ပါ ပုဂ္ဂိုလ်က ဆက်လက်ပြောသည်။
အဆိုပါ လမ်းလုပ်သား ကျောက်ခွဲသမားတို့ စခန်းချ နေထိုင်သည့် တောင်ကြော နှင့် မိုင်းနင်းမိသည့် နေရာအနီးတစ်ဝိုက်တွင် စစ်ကောင်စီတပ်သားများလည်း စခန်းချနေထိုင်နေကြောင်း ဒေသခံများ၏ ပြောပြချက်အရ သိရသည်။
လဲချားမြို့နယ်အတွင်းတွင် အာဏာသိမ်း စစ်ကောင်စီတပ်ဖွဲ့များအပြင် သျှမ်းပြည်တပ်မတော်များဖြစ်ကြသည့် RCSS နှင့် SSPP တို့လည်း သွားလာလှုပ်ရှားလျက်ရှိကြောင်း သိရသည်။
