သျှမ်းပြည်အရှေ့ပိုင်း တာချီလိတ်မြို့ရှိ ဟုန်ပန်းကွင်းအတွင်းဖွင့်ထားသည့် Harry Potter KTV အကြောင်းကို ရေးတင်သည့် စွပ်စွဲချက်ဖြင့် ဝန်ထမ်း ၁ ဦး ဖမ်းဆီးခံထားရပြီး၊ ၃ ဦး အလုပ်ထုတ်ခံရကြောင်း စုံစမ်းသိရသည်။
ပြီးခဲ့သည့် စက်တင်ဘာလ ၉ ရက်တွင် Harry Potter KTV မှ ဝန်ထမ်းများကို လစာတိုးပေးရန် တောင်းဆိုမှုတွင် ဦးဆောင်ခြင်း၊ ဆိုရှယ်မီဒီယာ (Facebook ) ပေါ်တင်ခြင်းစသည့် စွပ်စွဲချက်များဖြင့် ဝန်ထမ်းတစ်ဦး ဖမ်းဆီးခံရပြီး၊ ဝန်ထမ်း ၃ ဦးကိုလည်း အလုပ်ထုတ်လိုက်ရသည်။
လက်ရှိ Harry Potter KTV ၏ ဖြစ်စဥ်နှင့် အကြောင်းရင်းများကို အပြင်သို့ မပေါက်ကြားစေရန် ဝန်ထမ်းများကို ခြိမ်းခြောက်ပြောဆိုထားသည်ဟု နီးစပ်သူ ဒေသခံပြည်သူတစ်ဦးက သျှမ်းသံတော်ဆင့်ကို ပြောသည်။
“လစာတိုး မပေးတဲ့ကိစ္စကို လိုင်းပေါ်ရေးတင်လို့ ဆိုပြီး ဝန်ထမ်း ကောင်မလေး တစ်ယောက်ကို ဖမ်းထားတယ်။ စစ်ကောင်စီတပ်ဖွဲ့က လာဖမ်းတာတော့မဟုတ်ဘူး။ စစ်ပြောက်ကျားဝတ်စုံနဲ့လာဖမ်းတယ်။ အဲ့ KTV ကလုံခြုံရေးဝန်ထမ်းတွေကလည်း စစ်ပြောက်ကျားဝတ်စုံပဲဝတ်တယ်” ဟု လုံခြုံရေးအရ အမည်မဖော်လိုသည့် ဒေသခံ တစ်ဦးက ပြောသည်။
Harry Potter KTV သည် “ဝ” စီးပွားရေး လုပ်ငန်းရှင်တစ်ဦးမှ ပိုင်ဆိုင်ထားသည်ဟု သတင်းသိရပြီး အာဏာပိုင်များ က ထိုနေရာများနှင့်ပတ်သက်သော အမှုများကို ရှောင်ကြဥ်ကြသည်။
“ဒီနေရာမှာ စကစ/စရဖတွေက ဘာမှမလုပ်နိုင်ဘူး။ ရဲကအစ ဝင်ကိုမပတ်သက်တာ အခုလည်း ဒီအကြောင်းကို အပြင် ရေးရင် ပြောရင် “ဝ” တပ်နဲ့ လာဖမ်းခိုင်းမယ်လို့ဆိုပြီး ခြိမ်းခြောက် ထားပါတယ်” ဟု လုံခြုံရေးအရ အမည်မဖော်လိုသူ ဒေသခံတစ်ဦးက သျှမ်းသံတော်ဆင့်ကို ပြောသည်။
လက်ရှိဖမ်းဆီးခံထားရသည့် Harry Potter KTV မှ အမျိုးသမီးဝန်ထမ်းသည် မည်သည့်နေရာသို့ ဖမ်းခေါ်သွားသည် ကို မသိရကြောင်း နှင့် ကျန်ရှိ ဝန်ထမ်းများလည်း ခြိမ်းခြောက်ပြောဆိုမှုများကြောင့် ပုံမှန်အတိုင်း အလုပ် ဆင်းနေရ ကြောင်းလည်း သိရသည်။
“အဲ့မှာ အသွားများတာတော့ ထိုင်း၊ တရုတ်၊ ဗီယက်နမ်က ဖြစ်ကြတယ်။ တွေ့သလောက်တော့ ရန်ခိုက်မှုက နည်းတယ်၊ လုံခြုံရေးတွေက တအားစောင့်ကြပ်တယ်လေ။ အဲ့မှာက “ဝ” တွေပဲအသုံးပြုပုံရတယ်။ ပုံစံကိုက စစ်သားရုပ်ပဲ” ဟု Harry Potter KTV သို့ သွားရောက် လည်ပတ်ဖူးသူ အမျိုးသားလူငယ်တစ်ဦးက သျှမ်းသံတော်ဆင့်ကို ပြောသည်။
တာချီလိတ်မြို့သည် မြန်မာ – ထိုင်း နယ်စပ်မြို့ဖြစ်သည့်အပြင် အလုပ်အကိုင်အခွင့်အလမ်းအများစုမှာ KTV၊ Bar၊ ကလပ်၊ တရားမဝင် ကာစီနိုနှင့် အွန်လိုင်းလောင်းကစားလုပ်ငန်းများ ပေါများလာသည့်အပြင် ထိုင်း၊ တရုတ်၊ ဗီယက်နမ် နှင့် လာအို မှ စီးပွားရေးသမားများ၊ အလုပ်သမားများ တရားမဝင်လာရောက်နေထိုင်ကြသည်။
