သျှမ်းပြည်မြောက်ပိုင်း မူဆယ်မြို့နယ်အတွင်း စက်တင်ဘာ (၈) ရက်နေ့မှ စက်တင်ဘာ (၁၃) ရက်နေ့ထိ လျှပ်စစ်မီးပြတ်တောက်မည်ဖြစ်သည့်အတွက်ကြောင့် ပြည်သူများတစ်ချို့က အလုပ်ရပ်ဆိုင်းထားရမည် ဖြစ်ကြောင်း စုံးစမ်းသိရှိရသည်။
ရွှေလီ (၁) ရေအားလျှပ်စစ်ဓာတ်အားပေးစက်ရုံ စက်အမှတ် (၆) Main Transformer ကို ပြင်ဆင်မည့်အတွက်ကြောင့် မူဆယ်မြို့နယ်တွင်း လျှပ်စစ်မီး (၆) ရက် ပျက်မည်ဟု စစ်ကောင်စီ လက်အောက်ခံ လျှပ်စစ်ဝန်ကြီးဌာနက ထုတ်ပြန်ခဲ့သည်။
ထိုသို့ မီးပျက်မှာဖြစ်သည့်အတွက်ကြောင့် လုပ်ငန်းခွင်များကို ရပ်ဆိုင်းထားရမည်ဖြစ်ပြီး ပြည်သူများတစ်ချို့က ဝင်ငွေ မရှိနိုင်တော့ကြောင်း မူဆယ်မြို့ မုန့်တိုက်ပိုင်ရှင် အမျိုးသားတစ်ဦးက ပြောသည်။
“ဒီတစ်ပတ်လုံး ဝင်ငွေတွေမရှိတော့ဘူးပေါ့။ ထွက်ငွေတွေကိုပဲ ရှိတော့မယ်။ အလုပ်လည်းရပ်ထားရမယ်။ မီးစက်သုံးတော့ လည်း ကျနော်တို့ လုပ်ငန်းနဲ့က မကိုက်ဘူးလေ။ အခုတော့ ရှိတဲ့ မုန့်တွေကို ရောင်းပြီးတော့ပဲ လုပ်နေရတာပေါ့” ဟု ၎င်းကို ပြောသည်။
ထိုအပြင် မီးပျက်သောကြောင့် အိမ်ရှင်မ နှင့် လျှပ်စစ်မီးကို အသုံးပြုသည့် လုပ်ငန်းများလည်း ခက်ခဲလာနိုင်ကြောင်း ဒေသခံများက ဆိုကြသည်။
“ကျနော်တို့က လျှပ်စစ်မီးကို အသုံးပြုပြီးတော့ အလုပ်လုပ်ရတာပဲလေ။ လျှပ်စစ်မီးပျက်တော့ ကျနော်တို့လည်း အလုပ်မလုပ်ရတော့ဘူး။ အလုပ်နောက်ကျတယ်လေ။ ဗွီနိုင်း မထုတ်ပေးနိုင်တော့ဘူး။ ဝင်ငွေ ခနပျက်တာပေါ့” ဟု မူဆယ်မြို့ အသေးစား လုပ်ငန်း လုပ်ကိုင် သူတစ်ဦး က ပြောသည်။
အလားတူ အိမ်ရှင်မတစ်ဦးကလည်း “ကျမတို့တော့ အလုပ်ပိုလာတာပေါ့။ ထမင်းကို ထင်း၊ မီးသွေးနဲ့ ပြန်ချက်ရတာပေါ့။ အရင်ကတော့ ထမင်းကို လျှပ်စစ်အိုးနဲ့ တည်ထားပြီးတော့ တစ်ခြားဟာလုပ်နေလို့ရတာပေါ့” ဟု ပြောသည်။
အလားတူ မီးပျက်မည်ဖြစ်သောကြောင့် ပြည်သူများက ရေအခက်ခဲ ပိုပြီးရှိလာနိုင်ကြောင်း ဒေသခံများက ပြောသည်။
“ရေက ပိုခက်ခဲလာနိုင်တယ်။ အခုတောင် ရေတွေကို အပြည့်တင်ထားရတယ်။ မီးပျက်ရင် ရေတင်လို့မရတော့ဘူး။ မီးစက်နဲ့တင်ရင်လည်း ဒီဇယ်ဆီတွေက ဈေးကြီးတယ်။ ရေက နေ့တိုင်းသုံးရတော့ ပိုခက်ခဲတယ်။ စားသောက်တာက gas နဲ့ ချက်ပြုတ်လို့ရသေးတယ်” ဟု မူဆယ်မြို့ ဒေသခံ အမျိုးသားတစ်ဦး ကပြောသည်။
အလားတူ ရေရောင်းသူများကလည်း ရေရောင်းရန် ရပ်ဆိုင်းလာနိုင်ကြောင်း ဒေသခံများကပြောသည်။
မူဆယ်မြို့နယ်သည် လျှပ်စစ်မီး (၆) ရက် ပျက်မည်ဖြစ်သည့် အတွက်ကြောင့် ညအချိန်မှာ သူခိုး၊ ဓားပြများကို အခွင့်အရေး ပေးနေမှာကိုလည်း စိုးရိမ်နေကြသည်။
“ မီးပျက်မယ်ဆိုတော့ ညကျရင် သူခိုးတွေ များလာမှာကိုပဲ စိုးရိမ်ရတယ်။ မီးပျက်တော့ ဘာမှမတွေ့ရဘူးလေ။ သူခိုးတွေ ပိုပြီးသောင်းကြမ်းလာမှာကို စိုးရိမ်ရတယ်။ အခုကလည်း သူခိုးတွေက များနေပြီပဲလေ” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။
ထိုအပြင် လျှပ်စစ်မီး ပြတ်တောက်မှုကြောင့်လည်း ဖယောင်းတိုင်မှ တစ်ဆင့် မီးလောင်မှုဖြစ်ပွားမှာကို ဒေသခံများက စိုးရိမ်နေကြောင်းသိရသည်။
စစ်တပ်က အာဏာသိမ်းပြီးနောက်ပိုင်း လျှပ်စစ်မီး ပုံမှန်မရရှိသည့်အပြင် မီတာခကိုလည်း ယခင်ထက် ဈေးနှုန်းမြင့် ကောက်ခံနေကြောင်း သိရသည်။
ယခင်က မူဆယ်မြို့နယ်အတွင်းတွင် ဓာတ်အားပေးစက်ရုံကို ပြင်ဆင်နေချိန်တွင်လည်း လျှပ်စစ်မီးကို အလှည့်ကျပေးသည့် အတွက်ကြောင့် ယခုအခါတွင်လည်း အလှည့်ကျပေးရန်အတွက် ပြည်သူများက တောင်းဆိုနေကြသည်။
